(২৬) ৬. উপসম্পদাৱগ্গো

১. উপসম্পাদেতব্বসুত্তং

২৫১. [মহাৱ. ৮৪] ‘‘পঞ্চহি, ভিক্খৱে, ধম্মেহি সমন্নাগতেন ভিক্খুনা উপসম্পাদেতব্বং. কতমেহি পঞ্চহি? ইধ, ভিক্খৱে, ভিক্খু অসেখেন সীলক্খন্ধেন সমন্নাগতো হোতি; অসেখেন সমাধিক্খন্ধেন সমন্নাগতো হোতি; অসেখেন পঞ্ঞাক্খন্ধেন সমন্নাগতো হোতি; অসেখেন ৱিমুত্তিক্খন্ধেন সমন্নাগতো হোতি; অসেখেন ৱিমুত্তিঞাণদস্সনক্খন্ধেন সমন্নাগতো হোতি. ইমেহি খো, ভিক্খৱে, পঞ্চহি ধম্মেহি সমন্নাগতেন ভিক্খুনা উপসম্পাদেতব্ব’’ন্তি. পঠমং.

২. নিস্সযসুত্তং

২৫২. [মহাৱ. ৮৪] ‘‘পঞ্চহি, ভিক্খৱে, ধম্মেহি সমন্নাগতেন ভিক্খুনা নিস্সযো দাতব্বো. কতমেহি পঞ্চহি? ইধ, ভিক্খৱে, ভিক্খু অসেখেন সীলক্খন্ধেন সমন্নাগতো হোতি…পে… অসেখেন ৱিমুত্তিঞাণদস্সনক্খন্ধেন সমন্নাগতো হোতি. ইমেহি…পে… নিস্সযো দাতব্বো’’তি. দুতিযং.

৩. সামণেৰসুত্তং

২৫৩. [মহাৱ. ৮৪] ‘‘পঞ্চহি, ভিক্খৱে, ধম্মেহি সমন্নাগতেন ভিক্খুনা সামণেৰো উপট্ঠাপেতব্বো. কতমেহি পঞ্চহি? ইধ, ভিক্খৱে, ভিক্খু অসেখেন সীলক্খন্ধেন সমন্নাগতো হোতি; অসেখেন সমাধিক্খন্ধেন… অসেখেন পঞ্ঞাক্খন্ধেন… অসেখেন ৱিমুত্তিক্খন্ধেন… অসেখেন ৱিমুত্তিঞাণদস্সনক্খন্ধেন সমন্নাগতো হোতি. ইমেহি খো, ভিক্খৱে, পঞ্চহি ধম্মেহি সমন্নাগতেন ভিক্খুনা সামণেৰো উপট্ঠাপেতব্বো’’তি. ততিযং.

৪. পঞ্চমচ্ছৰিযসুত্তং

২৫৪. ‘‘পঞ্চিমানি, ভিক্খৱে, মচ্ছৰিযানি. কতমানি পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, ধম্মমচ্ছৰিযং – ইমানি খো, ভিক্খৱে, পঞ্চ মচ্ছৰিযানি. ইমেসং খো, ভিক্খৱে, পঞ্চন্নং মচ্ছৰিযানং এতং পটিকুট্ঠং [পতিকিট্ঠং (সী. পী.), পটিক্কিট্ঠং (স্যা. কং.), পটিকিট্ঠং (ক.)], যদিদং ধম্মমচ্ছৰিয’’ন্তি. চতুত্থং.

৫. মচ্ছৰিযপ্পহানসুত্তং

২৫৫. ‘‘পঞ্চন্নং, ভিক্খৱে, মচ্ছৰিযানং পহানায সমুচ্ছেদায ব্ৰহ্মচৰিযং ৱুস্সতি. কতমেসং পঞ্চন্নং? আৱাসমচ্ছৰিযস্স পহানায সমুচ্ছেদায ব্ৰহ্মচৰিযং ৱুস্সতি; কুলমচ্ছৰিযস্স…পে… লাভমচ্ছৰিযস্স… ৱণ্ণমচ্ছৰিযস্স… ধম্মমচ্ছৰিযস্স পহানায সমুচ্ছেদায ব্ৰহ্মচৰিযং ৱুস্সতি. ইমেসং খো, ভিক্খৱে, পঞ্চন্নং মচ্ছৰিযানং পহানায সমুচ্ছেদায ব্ৰহ্মচৰিযং ৱুস্সতী’’তি. পঞ্চমং.

৬. পঠমঝানসুত্তং

২৫৬. ‘‘পঞ্চিমে, ভিক্খৱে, ধম্মে অপ্পহায অভব্বো পঠমং ঝানং উপসম্পজ্জ ৱিহৰিতুং. কতমে পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, ধম্মমচ্ছৰিযং – ইমে খো, ভিক্খৱে, পঞ্চ ধম্মে অপ্পহায অভব্বো পঠমং ঝানং উপসম্পজ্জ ৱিহৰিতুং.

‘‘পঞ্চিমে, ভিক্খৱে, ধম্মে পহায ভব্বো পঠমং ঝানং উপসম্পজ্জ ৱিহৰিতুং. কতমে পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, ধম্মমচ্ছৰিযং – ইমে খো, ভিক্খৱে, পঞ্চ ধম্মে পহায ভব্বো পঠমং ঝানং উপসম্পজ্জ ৱিহৰিতু’’ন্তি. ছট্ঠং.

৭-১৩. দুতিযঝানসুত্তাদিসত্তকং

২৫৭-২৬৩. ‘‘পঞ্চিমে, ভিক্খৱে, ধম্মে অপ্পহায অভব্বো দুতিযং ঝানং…পে… অভব্বো ততিযং ঝানং… অভব্বো চতুত্থং ঝানং… অভব্বো সোতাপত্তিফলং… অভব্বো সকদাগামিফলং… অভব্বো অনাগামিফলং… অভব্বো অৰহত্তং [অৰহত্তফলং (সী.)] সচ্ছিকাতুং. কতমে পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, ধম্মমচ্ছৰিযং – ইমে খো, ভিক্খৱে, পঞ্চ ধম্মে অপ্পহায অভব্বো অৰহত্তং সচ্ছিকাতুং.

‘‘পঞ্চিমে, ভিক্খৱে, ধম্মে পহায ভব্বো দুতিযং ঝানং…পে… ভব্বো ততিযং ঝানং… ভব্বো চতুত্থং ঝানং… ভব্বো সোতাপত্তিফলং… ভব্বো সকদাগামিফলং… ভব্বো অনাগামিফলং… ভব্বো অৰহত্তং সচ্ছিকাতুং. কতমে পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, ধম্মমচ্ছৰিযং – ইমে খো, ভিক্খৱে, পঞ্চ ধম্মে পহায ভব্বো অৰহত্তং সচ্ছিকাতু’’ন্তি. তেৰসমং.

১৪. অপৰপঠমঝানসুত্তং

২৬৪. ‘‘পঞ্চিমে, ভিক্খৱে, ধম্মে অপ্পহায অভব্বো পঠমং ঝানং উপসম্পজ্জ ৱিহৰিতুং. কতমে পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, অকতঞ্ঞুতং অকতৱেদিতং – ইমে খো, ভিক্খৱে, পঞ্চ ধম্মে অপ্পহায অভব্বো পঠমং ঝানং উপসম্পজ্জ ৱিহৰিতুং.

‘‘পঞ্চিমে, ভিক্খৱে, ধম্মে পহায ভব্বো পঠমং ঝানং উপসম্পজ্জ ৱিহৰিতুং. কতমে পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, অকতঞ্ঞুতং অকতৱেদিতং – ইমে খো, ভিক্খৱে, পঞ্চ ধম্মে পহায ভব্বো পঠমং ঝানং উপসম্পজ্জ ৱিহৰিতু’’ন্তি. চুদ্দসমং.

১৫-২১. অপৰদুতিযঝানসুত্তাদিসত্তকং

২৬৫-২৭১. ‘‘পঞ্চিমে, ভিক্খৱে, ধম্মে অপ্পহায অভব্বো দুতিযং ঝানং…পে… ততিযং ঝানং… চতুত্থং ঝানং… সোতাপত্তিফলং… সকদাগামিফলং… অনাগামিফলং… অৰহত্তং সচ্ছিকাতুং. কতমে পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, অকতঞ্ঞুতং অকতৱেদিতং – ইমে খো, ভিক্খৱে, পঞ্চ ধম্মে অপ্পহায অভব্বো অৰহত্তং সচ্ছিকাতুং.

‘‘পঞ্চিমে, ভিক্খৱে, ধম্মে পহায ভব্বো দুতিযং ঝানং…পে… ততিযং ঝানং… চতুত্থং ঝানং… সোতাপত্তিফলং… সকদাগামিফলং… অনাগামিফলং… অৰহত্তং সচ্ছিকাতুং. কতমে পঞ্চ? আৱাসমচ্ছৰিযং, কুলমচ্ছৰিযং, লাভমচ্ছৰিযং, ৱণ্ণমচ্ছৰিযং, অকতঞ্ঞুতং অকতৱেদিতং – ইমে খো, ভিক্খৱে, পঞ্চ ধম্মে পহায ভব্বো অৰহত্তং সচ্ছিকাতু’’ন্তি. একৱীসতিমং.

উপসম্পদাৱগ্গো ছট্ঠো.