৩. অস্সাজানীযসুত্তং

২০৩. ‘‘পঞ্চহি, ভিক্খৱে, অঙ্গেহি সমন্নাগতো ৰঞ্ঞো ভদ্ৰো [ভদ্দো (পী.)] অস্সাজানীযো ৰাজাৰহো হোতি ৰাজভোগ্গো, ৰঞ্ঞো অঙ্গন্ত্ৱেৱ সঙ্খং গচ্ছতি.

‘‘কতমেহি পঞ্চহি? অজ্জৱেন, জৱেন, মদ্দৱেন, খন্তিযা, সোৰচ্চেন – ইমেহি খো, ভিক্খৱে, পঞ্চহি অঙ্গেহি সমন্নাগতো ৰঞ্ঞো ভদ্ৰো অস্সাজানীযো ৰাজাৰহো হোতি ৰাজভোগ্গো, ৰঞ্ঞো অঙ্গন্ত্ৱেৱ সঙ্খং গচ্ছতি. ‘‘এৱমেৱং খো, ভিক্খৱে, পঞ্চহি ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্স.

‘‘কতমেহি পঞ্চহি? অজ্জৱেন, জৱেন, মদ্দৱেন, খন্তিযা, সোৰচ্চেন – ইমেহি খো, ভিক্খৱে, পঞ্চহি ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্সা’’তি. ততিযং.