১০. পত্তপিণ্ডিকসুত্তং

১৯০. ‘‘পঞ্চিমে, ভিক্খৱে, পত্তপিণ্ডিকা. কতমে পঞ্চ? মন্দত্তা মোমূহত্তা পত্তপিণ্ডিকো হোতি, পাপিচ্ছো ইচ্ছাপকতো পত্তপিণ্ডিকো হোতি, উম্মাদা চিত্তক্খেপা পত্তপিণ্ডিকো হোতি, ‘ৱণ্ণিতং বুদ্ধেহি বুদ্ধসাৱকেহী’তি পত্তপিণ্ডিকো হোতি, অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায পত্তপিণ্ডিকো হোতি. ইমে খো, ভিক্খৱে, পঞ্চ পত্তপিণ্ডিকা. ইমেসং খো, ভিক্খৱে, পঞ্চন্নং পত্তপিণ্ডিকানং য্ৱাযং পত্তপিণ্ডিকো অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায পত্তপিণ্ডিকো হোতি, অযং ইমেসং পঞ্চন্নং পত্তপিণ্ডিকানং অগ্গো চ সেট্ঠো চ মোক্খো চ উত্তমো চ পৱৰো চ.

‘‘সেয্যথাপি, ভিক্খৱে, গৱা খীৰং, খীৰম্হা দধি, দধিম্হা নৱনীতং, নৱনীতম্হা সপ্পি, সপ্পিম্হা সপ্পিমণ্ডো, সপ্পিমণ্ডো তত্থ অগ্গমক্খাযতি; এৱমেৱং খো, ভিক্খৱে, ইমেসং পঞ্চন্নং পত্তপিণ্ডিকানং য্ৱাযং পত্তপিণ্ডিকো অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায পত্তপিণ্ডিকো হোতি, অযং ইমেসং পঞ্চন্নং পত্তপিণ্ডিকানং অগ্গো চ সেট্ঠো চ মোক্খো চ উত্তমো চ পৱৰো চা’’তি. দসমং.

অৰঞ্ঞৱগ্গো চতুত্থো.