(১৯) ৪. অৰঞ্ঞৱগ্গো

১. আৰঞ্ঞিকসুত্তং

১৮১. ‘‘পঞ্চিমে, ভিক্খৱে, আৰঞ্ঞিকা [আৰঞ্ঞতা (সব্বত্থ) পৰি. ৪৪৩ পস্সিতব্বং]. কতমে পঞ্চ? মন্দত্তা মোমূহত্তা আৰঞ্ঞিকো হোতি, পাপিচ্ছো ইচ্ছাপকতো আৰঞ্ঞিকো হোতি, উম্মাদা চিত্তক্খেপা আৰঞ্ঞিকো হোতি, ৱণ্ণিতং বুদ্ধেহি বুদ্ধসাৱকেহীতি আৰঞ্ঞিকো হোতি, অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ [ইদমট্ঠিতংযেৱ (সী. পী.)] নিস্সায আৰঞ্ঞিকো হোতি. ইমে খো, ভিক্খৱে, পঞ্চ আৰঞ্ঞিকা. ইমেসং খো, ভিক্খৱে, পঞ্চন্নং আৰঞ্ঞিকানং য্ৱাযং আৰঞ্ঞিকো অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায আৰঞ্ঞিকো হোতি, অযং ইমেসং পঞ্চন্নং আৰঞ্ঞিকানং অগ্গো চ সেট্ঠো চ মোক্খো [পামোক্খো (অ. নি. ৪.৯৫; ১০.৯১)] চ উত্তমো চ পৱৰো চ.

‘‘সেয্যথাপি, ভিক্খৱে, গৱা খীৰং, খীৰম্হা দধি, দধিম্হা নৱনীতং, নৱনীতম্হা সপ্পি, সপ্পিম্হা সপ্পিমণ্ডো, সপ্পিমণ্ডো [সপ্পিম্হা সপ্পিমণ্ডো (ক.) সং. নি. ৩.৬৬২] তত্থ অগ্গমক্খাযতি; এৱমেৱং খো, ভিক্খৱে, ইমেসং পঞ্চন্নং আৰঞ্ঞিকানং য্ৱাযং আৰঞ্ঞিকো অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায আৰঞ্ঞিকো হোতি, অযং ইমেসং পঞ্চন্নং আৰঞ্ঞিকানং অগ্গো চ সেট্ঠো চ মোক্খো চ উত্তমো চ পৱৰো চা’’তি. পঠমং.

২. চীৱৰসুত্তং

১৮২. ‘‘পঞ্চিমে, ভিক্খৱে, পংসুকূলিকা. কতমে পঞ্চ? মন্দত্তা মোমূহত্তা পংসুকূলিকো হোতি…পে… ইদমত্থিতংযেৱ নিস্সায পংসুকূলিকো হোতি. ইমে খো, ভিক্খৱে, পঞ্চ পংসুকূলিকা’’তি. দুতিযং.

৩. ৰুক্খমূলিকসুত্তং

১৮৩. ‘‘পঞ্চিমে, ভিক্খৱে, ৰুক্খমূলিকা. কতমে পঞ্চ? মন্দত্তা মোমূহত্তা ৰুক্খমূলিকো হোতি…পে… ইদমত্থিতংযেৱ নিস্সায ৰুক্খমূলিকো হোতি. ইমে খো, ভিক্খৱে, পঞ্চ ৰুক্খমূলিকা’’তি. ততিযং.

৪. সোসানিকসুত্তং

১৮৪. ‘‘পঞ্চিমে, ভিক্খৱে, সোসানিকা. কতমে পঞ্চ? মন্দত্তা মোমূহত্তা সোসানিকো হোতি…পে… ইদমত্থিতংযেৱ নিস্সায সোসানিকো হোতি. ইমে খো, ভিক্খৱে, পঞ্চ সোসানিকা’’তি. চতুত্থং.

৫. অব্ভোকাসিকসুত্তং

১৮৫. ‘‘পঞ্চিমে, ভিক্খৱে, অব্ভোকাসিকা…পে…. পঞ্চমং.

৬. নেসজ্জিকসুত্তং

১৮৬. ‘‘পঞ্চিমে, ভিক্খৱে, নেসজ্জিকা…পে…. ছট্ঠং.

৭. যথাসন্থতিকসুত্তং

১৮৭. ‘‘পঞ্চিমে, ভিক্খৱে, যথাসন্থতিকা…পে…. সত্তমং.

৮. একাসনিকসুত্তং

১৮৮. ‘‘পঞ্চিমে, ভিক্খৱে, একাসনিকা…পে…. অট্ঠমং.

৯. খলুপচ্ছাভত্তিকসুত্তং

১৮৯. ‘‘পঞ্চিমে, ভিক্খৱে, খলুপচ্ছাভত্তিকা…পে…. নৱমং.

১০. পত্তপিণ্ডিকসুত্তং

১৯০. ‘‘পঞ্চিমে, ভিক্খৱে, পত্তপিণ্ডিকা. কতমে পঞ্চ? মন্দত্তা মোমূহত্তা পত্তপিণ্ডিকো হোতি, পাপিচ্ছো ইচ্ছাপকতো পত্তপিণ্ডিকো হোতি, উম্মাদা চিত্তক্খেপা পত্তপিণ্ডিকো হোতি, ‘ৱণ্ণিতং বুদ্ধেহি বুদ্ধসাৱকেহী’তি পত্তপিণ্ডিকো হোতি, অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায পত্তপিণ্ডিকো হোতি. ইমে খো, ভিক্খৱে, পঞ্চ পত্তপিণ্ডিকা. ইমেসং খো, ভিক্খৱে, পঞ্চন্নং পত্তপিণ্ডিকানং য্ৱাযং পত্তপিণ্ডিকো অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায পত্তপিণ্ডিকো হোতি, অযং ইমেসং পঞ্চন্নং পত্তপিণ্ডিকানং অগ্গো চ সেট্ঠো চ মোক্খো চ উত্তমো চ পৱৰো চ.

‘‘সেয্যথাপি, ভিক্খৱে, গৱা খীৰং, খীৰম্হা দধি, দধিম্হা নৱনীতং, নৱনীতম্হা সপ্পি, সপ্পিম্হা সপ্পিমণ্ডো, সপ্পিমণ্ডো তত্থ অগ্গমক্খাযতি; এৱমেৱং খো, ভিক্খৱে, ইমেসং পঞ্চন্নং পত্তপিণ্ডিকানং য্ৱাযং পত্তপিণ্ডিকো অপ্পিচ্ছতংযেৱ নিস্সায সন্তুট্ঠিংযেৱ নিস্সায সল্লেখংযেৱ নিস্সায পৱিৱেকংযেৱ নিস্সায ইদমত্থিতংযেৱ নিস্সায পত্তপিণ্ডিকো হোতি, অযং ইমেসং পঞ্চন্নং পত্তপিণ্ডিকানং অগ্গো চ সেট্ঠো চ মোক্খো চ উত্তমো চ পৱৰো চা’’তি. দসমং.

অৰঞ্ঞৱগ্গো চতুত্থো.