(৯) ৪. থেৰৱগ্গো

১. ৰজনীযসুত্তং

৮১. ‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ. কতমেহি পঞ্চহি? ৰজনীযে ৰজ্জতি, দুস্সনীযে [দুসনীযে (সী. স্যা. কং. পী.)] দুস্সতি, মোহনীযে মুয্হতি, কুপ্পনীযে [কুপনীযে (সী. স্যা. কং.), কোপনীযে (পী.)] কুপ্পতি, মদনীযে মজ্জতি – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ.

‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চ. কতমেহি পঞ্চহি? ৰজনীযে ন ৰজ্জতি, দুস্সনীযে ন দুস্সতি, মোহনীযে ন মুয্হতি, কুপ্পনীযে ন কুপ্পতি, মদনীযে ন মজ্জতি – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চা’’তি. পঠমং.

২. ৱীতৰাগসুত্তং

৮২. ‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ. কতমেহি পঞ্চহি? অৱীতৰাগো হোতি, অৱীতদোসো হোতি, অৱীতমোহো হোতি, মক্খী চ, পড়াসী চ – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ.

‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চ. কতমেহি পঞ্চহি? ৱীতৰাগো হোতি, ৱীতদোসো হোতি, ৱীতমোহো হোতি, অমক্খী চ, অপড়াসী চ – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চা’’তি. দুতিযং.

৩. কুহকসুত্তং

৮৩. ‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ. কতমেহি পঞ্চহি? কুহকো চ হোতি, লপকো চ, নেমিত্তিকো [নিমিত্তিকো (স্যা. কং.), নিমিত্তকো (ক.)] চ, নিপ্পেসিকো চ, লাভেন চ লাভং নিজিগীসিতা [নিজিগিংসিতা (সী. স্যা. কং. পী.)] – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ.

‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চ. কতমেহি পঞ্চহি? ন চ কুহকো হোতি, ন চ লপকো, ন চ নেমিত্তিকো, ন চ নিপ্পেসিকো, ন চ লাভেন লাভং নিজিগীসিতা – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চা’’তি. ততিযং.

৪. অস্সদ্ধসুত্তং

৮৪. ‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি, অমনাপো চ অগৰু চ অভাৱনীযো চ. কতমেহি পঞ্চহি? অস্সদ্ধো হোতি, অহিৰিকো হোতি, অনোত্তপ্পী হোতি, কুসীতো হোতি, দুপ্পঞ্ঞো হোতি – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ.

‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চ. কতমেহি পঞ্চহি? সদ্ধো হোতি, হিৰীমা হোতি, ওত্তপ্পী হোতি, আৰদ্ধৱীৰিযো হোতি, পঞ্ঞৱা হোতি – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চা’’তি. চতুত্থং.

৫. অক্খমসুত্তং

৮৫. ‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ. কতমেহি পঞ্চহি? অক্খমো হোতি ৰূপানং, অক্খমো সদ্দানং, অক্খমো গন্ধানং, অক্খমো ৰসানং, অক্খমো ফোট্ঠব্বানং – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং অপ্পিযো চ হোতি অমনাপো চ অগৰু চ অভাৱনীযো চ.

‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চ. কতমেহি পঞ্চহি? খমো হোতি ৰূপানং, খমো সদ্দানং, খমো গন্ধানং, খমো ৰসানং, খমো ফোট্ঠব্বানং – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চা’’তি. পঞ্চমং.

৬. পটিসম্ভিদাপত্তসুত্তং

৮৬. ‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চ. কতমেহি পঞ্চহি? অত্থপটিসম্ভিদাপত্তো হোতি, ধম্মপটিসম্ভিদাপত্তো হোতি, নিৰুত্তিপটিসম্ভিদাপত্তো হোতি, পটিভানপটিসম্ভিদাপত্তো হোতি, যানি তানি সব্ৰহ্মচাৰীনং উচ্চাৱচানি কিংকৰণীযানি তত্থ দক্খো হোতি অনলসো তত্ৰুপাযায ৱীমংসায সমন্নাগতো অলং কাতুং অলং সংৱিধাতুং – ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চা’’তি. ছট্ঠং.

৭. সীলৱন্তসুত্তং

৮৭. ‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চ. কতমেহি পঞ্চহি? সীলৱা হোতি, পাতিমোক্খসংৱৰসংৱুতো ৱিহৰতি. আচাৰগোচৰসম্পন্নো অণুমত্তেসু ৱজ্জেসু ভযদস্সাৱী, সমাদায সিক্খতি সিক্খাপদেসু; বহুস্সুতো হোতি সুতধৰো সুতসন্নিচযো, যে তে ধম্মা আদিকল্যাণা মজ্ঝেকল্যাণা পৰিযোসানকল্যাণা সাত্থং সব্যঞ্জনং [সাত্থা সব্যঞ্জনা (সী.)] কেৱলপৰিপুণ্ণং পৰিসুদ্ধং ব্ৰহ্মচৰিযং অভিৱদন্তি, তথাৰূপাস্স ধম্মা বহুস্সুতা হোন্তি ধাতা [ধতা (সী. স্যা. কং. পী.)] ৱচসা পৰিচিতা মনসানুপেক্খিতা দিট্ঠিযা সুপ্পটিৱিদ্ধা; কল্যাণৱাচো হোতি কল্যাণৱাক্কৰণো পোৰিযা ৱাচায সমন্নাগতো ৱিস্সট্ঠায অনেলগড়ায অত্থস্স ৱিঞ্ঞাপনিযা; চতুন্নং ঝানানং আভিচেতসিকানং দিট্ঠধম্মসুখৱিহাৰানং নিকামলাভী হোতি অকিচ্ছলাভী অকসিৰলাভী; আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু সব্ৰহ্মচাৰীনং পিযো চ হোতি মনাপো চ গৰু চ ভাৱনীযো চা’’তি. সত্তমং.

৮. থেৰসুত্তং

৮৮. ‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু বহুজনঅহিতায পটিপন্নো হোতি বহুজনঅসুখায বহুনো জনস্স অনত্থায অহিতায দুক্খায দেৱমনুস্সানং.

‘‘কতমেহি পঞ্চহি? থেৰো হোতি ৰত্তঞ্ঞূ চিৰপব্বজিতো; ঞাতো হোতি যসস্সী সগহট্ঠপব্বজিতানং [গহট্ঠপব্বজিতানং (সী.)] বহুজনপৰিৱাৰো; লাভী হোতি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং; বহুস্সুতো হোতি সুতধৰো সুতসন্নিচযো, যে তে ধম্মা আদিকল্যাণা মজ্ঝেকল্যাণা পৰিযোসানকল্যাণা সাত্থং সব্যঞ্জনং কেৱলপৰিপুণ্ণং পৰিসুদ্ধং ব্ৰহ্মচৰিযং অভিৱদন্তি, তথাৰূপাস্স ধম্মা বহুস্সুতা হোন্তি ধাতা ৱচসা পৰিচিতা মনসানুপেক্খিতা দিট্ঠিযা অপ্পটিৱিদ্ধা; মিচ্ছাদিট্ঠিকো হোতি ৱিপৰীতদস্সনো, সো বহুজনং সদ্ধম্মা ৱুট্ঠাপেত্ৱা অসদ্ধম্মে পতিট্ঠাপেতি. থেৰো ভিক্খু ৰত্তঞ্ঞূ চিৰপব্বজিতো ইতিপিস্স দিট্ঠানুগতিং আপজ্জন্তি, ঞাতো থেৰো ভিক্খু যসস্সী সগহট্ঠপব্বজিতানং বহুজনপৰিৱাৰো ইতিপিস্স দিট্ঠানুগতিং আপজ্জন্তি, লাভী থেৰো ভিক্খু চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং ইতিপিস্স দিট্ঠানুগতিং আপজ্জন্তি, বহুস্সুতো থেৰো ভিক্খু সুতধৰো সুতসন্নিচযো ইতিপিস্স দিট্ঠানুগতিং আপজ্জন্তি. ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু বহুজনঅহিতায পটিপন্নো হোতি বহুজনঅসুখায বহুনো জনস্স অনত্থায অহিতায দুক্খায দেৱমনুস্সানং.

‘‘পঞ্চহি, ভিক্খৱে, ধম্মেহি সমন্নাগতো থেৰো ভিক্খু বহুজনহিতায পটিপন্নো হোতি বহুজনসুখায বহুনো জনস্স অত্থায হিতায সুখায দেৱমনুস্সানং.

‘‘কতমেহি পঞ্চহি? থেৰো হোতি ৰত্তঞ্ঞূ চিৰপব্বজিতো; ঞাতো হোতি যসস্সী সগহট্ঠপব্বজিতানং বহুজনপৰিৱাৰো; লাভী হোতি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং; বহুস্সুতো হোতি সুতধৰো সুতসন্নিচযো, যে তে ধম্মা আদিকল্যাণা মজ্ঝেকল্যাণা পৰিযোসানকল্যাণা সাত্থং সব্যঞ্জনং কেৱলপৰিপুণ্ণং পৰিসুদ্ধং ব্ৰহ্মচৰিযং অভিৱদন্তি, তথাৰূপাস্স ধম্মা বহুস্সুতা হোন্তি ধাতা ৱচসা পৰিচিতা মনসানুপেক্খিতা দিট্ঠিযা সুপ্পটিৱিদ্ধা; সম্মাদিট্ঠিকো হোতি অৱিপৰীতদস্সনো, সো বহুজনং অসদ্ধম্মা ৱুট্ঠাপেত্ৱা সদ্ধম্মে পতিট্ঠাপেতি. থেৰো ভিক্খু ৰত্তঞ্ঞূ চিৰপব্বজিতো ইতিপিস্স দিট্ঠানুগতিং আপজ্জন্তি, ঞাতো থেৰো ভিক্খু যসস্সী সগহট্ঠপব্বজিতানং বহুজনপৰিৱাৰো ইতিপিস্স দিট্ঠানুগতিং আপজ্জন্তি, লাভী থেৰো ভিক্খু চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং ইতিপিস্স দিট্ঠানুগতিং আপজ্জন্তি, বহুস্সুতো থেৰো ভিক্খু সুতধৰো সুতসন্নিচযো ইতিপিস্স দিট্ঠানুগতিং আপজ্জন্তি. ইমেহি খো, ভিক্খৱে, পঞ্চহি ধম্মেহি সমন্নাগতো থেৰো ভিক্খু বহুজনহিতায পটিপন্নো হোতি বহুজনসুখায বহুনো জনস্স অত্থায হিতায সুখায দেৱমনুস্সান’’ন্তি. অট্ঠমং.

৯. পঠমসেখসুত্তং

৮৯. ‘‘পঞ্চিমে, ভিক্খৱে, ধম্মা সেখস্স ভিক্খুনো পৰিহানায সংৱত্তন্তি. কতমে পঞ্চ? কম্মাৰামতা, ভস্সাৰামতা, নিদ্দাৰামতা, সঙ্গণিকাৰামতা, যথাৱিমুত্তং চিত্তং ন পচ্চৱেক্খতি – ইমে খো, ভিক্খৱে, পঞ্চ ধম্মা সেখস্স ভিক্খুনো পৰিহানায সংৱত্তন্তি.

‘‘পঞ্চিমে, ভিক্খৱে, ধম্মা সেখস্স ভিক্খুনো অপৰিহানায সংৱত্তন্তি. কতমে পঞ্চ? ন কম্মাৰামতা, ন ভস্সাৰামতা, ন নিদ্দাৰামতা, ন সঙ্গণিকাৰামতা, যথাৱিমুত্তং চিত্তং পচ্চৱেক্খতি – ইমে খো, ভিক্খৱে, পঞ্চ ধম্মা সেখস্স ভিক্খুনো অপৰিহানায সংৱত্তন্তী’’তি. নৱমং.

১০. দুতিযসেখসুত্তং

৯০. ‘‘পঞ্চিমে, ভিক্খৱে, ধম্মা সেখস্স ভিক্খুনো পৰিহানায সংৱত্তন্তি. কতমে পঞ্চ? ইধ, ভিক্খৱে, সেখো ভিক্খু বহুকিচ্চো হোতি বহুকৰণীযো ৱিযত্তো কিংকৰণীযেসু; ৰিঞ্চতি পটিসল্লানং, নানুযুঞ্জতি অজ্ঝত্তং চেতোসমথং. অযং, ভিক্খৱে, পঠমো ধম্মো সেখস্স ভিক্খুনো পৰিহানায সংৱত্ততি.

‘‘পুন চপৰং, ভিক্খৱে, সেখো ভিক্খু অপ্পমত্তকেন কম্মেন দিৱসং অতিনামেতি; ৰিঞ্চতি পটিসল্লানং, নানুযুঞ্জতি অজ্ঝত্তং চেতোসমথং. অযং, ভিক্খৱে, দুতিযো ধম্মো সেখস্স ভিক্খুনো পৰিহানায সংৱত্ততি.

‘‘পুন চপৰং, ভিক্খৱে, সেখো ভিক্খু সংসট্ঠো ৱিহৰতি গহট্ঠপব্বজিতেহি অননুলোমিকেন গিহিসংসগ্গেন; ৰিঞ্চতি পটিসল্লানং, নানুযুঞ্জতি অজ্ঝত্তং চেতোসমথং. অযং, ভিক্খৱে, ততিযো ধম্মো সেখস্স ভিক্খুনো পৰিহানায সংৱত্ততি.

‘‘পুন চপৰং, ভিক্খৱে, সেখো ভিক্খু অকালেন গামং পৱিসতি, অতিদিৱা পটিক্কমতি; ৰিঞ্চতি পটিসল্লানং, নানুযুঞ্জতি অজ্ঝত্তং চেতোসমথং. অযং, ভিক্খৱে, চতুত্থো ধম্মো সেখস্স ভিক্খুনো পৰিহানায সংৱত্ততি.

‘‘পুন চপৰং, ভিক্খৱে, সেখো ভিক্খু যাযং কথা আভিসল্লেখিকা চেতোৱিৱৰণসপ্পাযা, সেয্যথিদং – অপ্পিচ্ছকথা সন্তুট্ঠিকথা পৱিৱেককথা অসংসগ্গকথা ৱীৰিযাৰম্ভকথা সীলকথা সমাধিকথা পঞ্ঞাকথা ৱিমুত্তিকথা ৱিমুত্তিঞাণদস্সনকথা, এৱৰূপিযা কথায ন নিকামলাভী হোতি ন অকিচ্ছলাভী ন অকসিৰলাভী [কিচ্ছলাভী কসিৰলাভী (সী. স্যা. কং. পী)]; ৰিঞ্চতি পটিসল্লানং, নানুযুঞ্জতি অজ্ঝত্তং চেতোসমথং. অযং, ভিক্খৱে, পঞ্চমো ধম্মো সেখস্স ভিক্খুনো পৰিহানায সংৱত্ততি. ইমে খো, ভিক্খৱে, পঞ্চ ধম্মা সেখস্স ভিক্খুনো পৰিহানায সংৱত্তন্তি.

‘‘পঞ্চিমে, ভিক্খৱে, ধম্মা সেখস্স ভিক্খুনো অপৰিহানায সংৱত্তন্তি. কতমে পঞ্চ? ইধ, ভিক্খৱে, সেখো ভিক্খু ন বহুকিচ্চো হোতি ন বহুকৰণীযো ৱিযত্তো কিংকৰণীযেসু; ন ৰিঞ্চতি পটিসল্লানং, অনুযুঞ্জতি অজ্ঝত্তং চেতোসমথং. অযং, ভিক্খৱে, পঠমো ধম্মো সেখস্স ভিক্খুনো অপৰিহানায সংৱত্ততি.

‘‘পুন চপৰং, ভিক্খৱে, সেখো ভিক্খু ন অপ্পমত্তকেন কম্মেন দিৱসং অতিনামেতি; ন ৰিঞ্চতি পটিসল্লানং, অনুযুঞ্জতি অজ্ঝত্তং চেতোসমথং. অযং, ভিক্খৱে, দুতিযো ধম্মো সেখস্স ভিক্খুনো অপৰিহানায সংৱত্ততি.

‘‘পুন চপৰং, ভিক্খৱে, সেখো ভিক্খু অসংসট্ঠো ৱিহৰতি গহট্ঠপব্বজিতেহি অননুলোমিকেন গিহিসংসগ্গেন; ন ৰিঞ্চতি পটিসল্লানং, অনুযুঞ্জতি অজ্ঝত্তং চেতোসমথং. অযং, ভিক্খৱে, ততিযো ধম্মো সেখস্স ভিক্খুনো অপৰিহানায সংৱত্ততি.

‘‘পুন চপৰং, ভিক্খৱে, সেখো ভিক্খু ন অতিকালেন গামং পৱিসতি, নাতিদিৱা পটিক্কমতি; ন ৰিঞ্চতি পটিসল্লানং, অনুযুঞ্জতি অজ্ঝত্তং চেতোসমথং. অযং, ভিক্খৱে, চতুত্থো ধম্মো সেখস্স ভিক্খুনো অপৰিহানায সংৱত্ততি.

‘‘পুন চপৰং, ভিক্খৱে, সেখো ভিক্খু যাযং কথা আভিসল্লেখিকা চেতোৱিৱৰণসপ্পাযা, সেয্যথিদং – অপ্পিচ্ছকথা সন্তুট্ঠিকথা পৱিৱেককথা অসংসগ্গকথা ৱীৰিযাৰম্ভকথা সীলকথা সমাধিকথা পঞ্ঞাকথা ৱিমুত্তিকথা ৱিমুত্তিঞাণদস্সনকথা, এৱৰূপিযা কথায নিকামলাভী হোতি অকিচ্ছলাভী অকসিৰলাভী; ন ৰিঞ্চতি পটিসল্লানং, অনুযুঞ্জতি অজ্ঝত্তং চেতোসমথং. অযং, ভিক্খৱে, পঞ্চমো ধম্মো সেখস্স ভিক্খুনো অপৰিহানায সংৱত্ততি. ইমে খো, ভিক্খৱে, পঞ্চ ধম্মা সেখস্স ভিক্খুনো অপৰিহানায সংৱত্তন্তী’’তি. দসমং.

থেৰৱগ্গো চতুত্থো.