৭. ধনসুত্তং

৪৭. ‘‘পঞ্চিমানি, ভিক্খৱে, ধনানি. কতমানি পঞ্চ? সদ্ধাধনং, সীলধনং, সুতধনং, চাগধনং, পঞ্ঞাধনং.

‘‘কতমঞ্চ, ভিক্খৱে, সদ্ধাধনং? ইধ, ভিক্খৱে, অৰিযসাৱকো সদ্ধো হোতি, সদ্দহতি তথাগতস্স বোধিং – ‘ইতিপি সো ভগৱা…পে… সত্থা দেৱমনুস্সানং বুদ্ধো ভগৱা’তি. ইদং ৱুচ্চতি, ভিক্খৱে, সদ্ধাধনং.

‘‘কতমঞ্চ, ভিক্খৱে, সীলধনং? ইধ, ভিক্খৱে, অৰিযসাৱকো পাণাতিপাতা পটিৱিৰতো হোতি…পে… সুৰামেৰযমজ্জপমাদট্ঠানা পটিৱিৰতো হোতি. ইদং ৱুচ্চতি, ভিক্খৱে, সীলধনং.

‘‘কতমঞ্চ, ভিক্খৱে, সুতধনং? ইধ, ভিক্খৱে, অৰিযসাৱকো বহুস্সুতো হোতি…পে… দিট্ঠিযা সুপ্পটিৱিদ্ধো. ইদং ৱুচ্চতি, ভিক্খৱে, সুতধনং.

‘‘কতমঞ্চ, ভিক্খৱে, চাগধনং? ইধ, ভিক্খৱে, অৰিযসাৱকো ৱিগতমলমচ্ছেৰেন চেতসা অগাৰং অজ্ঝাৱসতি মুত্তচাগো পযতপাণি ৱোস্সগ্গৰতো যাচযোগো দানসংৱিভাগৰতো. ইদং ৱুচ্চতি, ভিক্খৱে, চাগধনং.

‘‘কতমঞ্চ, ভিক্খৱে, পঞ্ঞাধনং? ইধ, ভিক্খৱে, অৰিযসাৱকো পঞ্ঞৱা হোতি, উদযত্থগামিনিযা পঞ্ঞায সমন্নাগতো অৰিযায নিব্বেধিকায সম্মা দুক্খক্খযগামিনিযা. ইদং ৱুচ্চতি, ভিক্খৱে, পঞ্ঞাধনং. ইমানি খো, ভিক্খৱে, পঞ্চ ধনানী’’তি.

[অ. নি. ৪.৫২] ‘‘যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অৰিযকন্তং পসংসিতং.

‘‘সঙ্ঘে পসাদো যস্সত্থি, উজুভূতঞ্চ দস্সনং;

অদলিদ্দোতি তং আহু, অমোঘং তস্স জীৱিতং.

‘‘তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৱী, সৰং বুদ্ধান সাসন’’ন্তি. সত্তমং;