৩. ইট্ঠসুত্তং

৪৩. অথ খো অনাথপিণ্ডিকো গহপতি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৱা এতদৱোচ –

‘‘পঞ্চিমে, গহপতি, ধম্মা ইট্ঠা কন্তা মনাপা দুল্লভা লোকস্মিং. কতমে পঞ্চ? আযু, গহপতি, ইট্ঠো কন্তো মনাপো দুল্লভো লোকস্মিং; ৱণ্ণো ইট্ঠো কন্তো মনাপো দুল্লভো লোকস্মিং; সুখং ইট্ঠং কন্তং মনাপং দুল্লভং লোকস্মিং; যসো ইট্ঠো কন্তো মনাপো দুল্লভো লোকস্মিং; সগ্গা ইট্ঠা কন্তা মনাপা দুল্লভা লোকস্মিং. ইমে খো, গহপতি, পঞ্চ ধম্মা ইট্ঠা কন্তা মনাপা দুল্লভা লোকস্মিং.

‘‘ইমেসং খো, গহপতি, পঞ্চন্নং ধম্মানং ইট্ঠানং কন্তানং মনাপানং দুল্লভানং লোকস্মিং ন আযাচনহেতু ৱা পত্থনাহেতু ৱা [ন পত্থনাহেতু ৱা (স্যা. কং. পী.)] পটিলাভং ৱদামি. ইমেসং খো, গহপতি, পঞ্চন্নং ধম্মানং ইট্ঠানং কন্তানং মনাপানং দুল্লভানং লোকস্মিং আযাচনহেতু ৱা পত্থনাহেতু ৱা পটিলাভো অভৱিস্স, কো ইধ কেন হাযেথ?

‘‘ন খো, গহপতি, অৰহতি অৰিযসাৱকো আযুকামো আযুং আযাচিতুং ৱা অভিনন্দিতুং ৱা আযুস্স ৱাপি হেতু. আযুকামেন, গহপতি, অৰিযসাৱকেন আযুসংৱত্তনিকা পটিপদা পটিপজ্জিতব্বা. আযুসংৱত্তনিকা হিস্স পটিপদা পটিপন্না আযুপটিলাভায সংৱত্ততি. সো লাভী হোতি আযুস্স দিব্বস্স ৱা মানুসস্স ৱা.

‘‘ন খো, গহপতি, অৰহতি অৰিযসাৱকো ৱণ্ণকামো ৱণ্ণং আযাচিতুং ৱা অভিনন্দিতুং ৱা ৱণ্ণস্স ৱাপি হেতু. ৱণ্ণকামেন, গহপতি, অৰিযসাৱকেন ৱণ্ণসংৱত্তনিকা পটিপদা পটিপজ্জিতব্বা. ৱণ্ণসংৱত্তনিকা হিস্স পটিপদা পটিপন্না ৱণ্ণপটিলাভায সংৱত্ততি. সো লাভী হোতি ৱণ্ণস্স দিব্বস্স ৱা মানুসস্স ৱা.

‘‘ন খো, গহপতি, অৰহতি অৰিযসাৱকো সুখকামো সুখং আযাচিতুং ৱা অভিনন্দিতুং ৱা সুখস্স ৱাপি হেতু. সুখকামেন, গহপতি, অৰিযসাৱকেন সুখসংৱত্তনিকা পটিপদা পটিপজ্জিতব্বা. সুখসংৱত্তনিকা হিস্স পটিপদা পটিপন্না সুখপটিলাভায সংৱত্ততি. সো লাভী হোতি সুখস্স দিব্বস্স ৱা মানুসস্স ৱা.

‘‘ন খো, গহপতি, অৰহতি অৰিযসাৱকো যসকামো যসং আযাচিতুং ৱা অভিনন্দিতুং ৱা যসস্স ৱাপি হেতু. যসকামেন, গহপতি, অৰিযসাৱকেন যসসংৱত্তনিকা পটিপদা পটিপজ্জিতব্বা. যসসংৱত্তনিকা হিস্স পটিপদা পটিপন্না যসপটিলাভায সংৱত্ততি. সো লাভী হোতি যসস্স দিব্বস্স ৱা মানুসস্স ৱা.

‘‘ন খো, গহপতি, অৰহতি অৰিযসাৱকো সগ্গকামো সগ্গং আযাচিতুং ৱা অভিনন্দিতুং ৱা সগ্গানং ৱাপি হেতু. সগ্গকামেন, গহপতি, অৰিযসাৱকেন সগ্গসংৱত্তনিকা পটিপদা পটিপজ্জিতব্বা. সগ্গসংৱত্তনিকা হিস্স পটিপদা পটিপন্না সগ্গপটিলাভায সংৱত্ততি. সো লাভী হোতি সগ্গান’’ন্তি.

‘‘আযুং ৱণ্ণং যসং কিত্তিং, সগ্গং উচ্চাকুলীনতং;

ৰতিযো পত্থযানেন [পত্থযমানেন (ক.)], উড়াৰা অপৰাপৰা.

‘‘অপ্পমাদং পসংসন্তি, পুঞ্ঞকিৰিযাসু পণ্ডিতা;

‘‘অপ্পমত্তো উভো অত্থে, অধিগণ্হাতি পণ্ডিতো.

‘‘দিট্ঠে ধম্মে চ [দিট্ঠেৱ ধম্মে (সী.)] যো অত্থো, যো চত্থো সম্পৰাযিকো;

অত্থাভিসমযা ধীৰো, পণ্ডিতোতি পৱুচ্চতী’’তি. ততিযং;