৯. ভোজনসুত্তং

৩৭. ‘‘ভোজনং, ভিক্খৱে, দদমানো দাযকো পটিগ্গাহকানং পঞ্চ ঠানানি দেতি. কতমানি পঞ্চ? আযুং দেতি, ৱণ্ণং দেতি, সুখং দেতি, বলং দেতি, পটিভানং [পটিভাণং (সী.)] দেতি. আযুং খো পন দত্ৱা আযুস্স ভাগী হোতি দিব্বস্স ৱা মানুসস্স ৱা; ৱণ্ণং দত্ৱা ৱণ্ণস্স ভাগী হোতি দিব্বস্স ৱা মানুসস্স ৱা; সুখং দত্ৱা সুখস্স ভাগী হোতি দিব্বস্স ৱা মানুসস্স ৱা; বলং দত্ৱা বলস্স ভাগী হোতি দিব্বস্স ৱা মানুসস্স ৱা; পটিভানং দত্ৱা পটিভানস্স ভাগী হোতি দিব্বস্স ৱা মানুসস্স ৱা. ভোজনং, ভিক্খৱে, দদমানো দাযকো পটিগ্গাহকানং ইমানি পঞ্চ ঠানানি দেতী’’তি.

‘‘আযুদো বলদো ধীৰো, ৱণ্ণদো পটিভানদো;

সুখস্স দাতা মেধাৱী, সুখং সো অধিগচ্ছতি.

‘‘আযুং দত্ৱা বলং ৱণ্ণং, সুখঞ্চ পটিভানকং [পটিভাণকং (সী.), পটিভানদো (স্যা. কং. পী. ক.)];

দীঘাযু যসৱা হোতি, যত্থ যত্থূপপজ্জতী’’তি. সত্তমং;