১. অভিঞ্ঞাসুত্তং

২৫৪. ‘‘চত্তাৰোমে, ভিক্খৱে, ধম্মা. কতমে চত্তাৰো? অত্থি, ভিক্খৱে, ধম্মা অভিঞ্ঞা পৰিঞ্ঞেয্যা; অত্থি, ভিক্খৱে, ধম্মা অভিঞ্ঞা পহাতব্বা; অত্থি, ভিক্খৱে, ধম্মা অভিঞ্ঞা ভাৱেতব্বা; অত্থি, ভিক্খৱে, ধম্মা অভিঞ্ঞা সচ্ছিকাতব্বা.

‘‘কতমে চ, ভিক্খৱে, ধম্মা অভিঞ্ঞা পৰিঞ্ঞেয্যা? পঞ্চুপাদানক্খন্ধা [পঞ্চুপাদানক্খন্ধাতিস্স ৱচনীযং (ক.)] – ইমে ৱুচ্চন্তি, ভিক্খৱে, ধম্মা অভিঞ্ঞা পৰিঞ্ঞেয্যা.

‘‘কতমে চ, ভিক্খৱে, ধম্মা অভিঞ্ঞা পহাতব্বা? অৱিজ্জা চ ভৱতণ্হা চ – ইমে ৱুচ্চন্তি, ভিক্খৱে, ধম্মা অভিঞ্ঞা পহাতব্বা.

‘‘কতমে চ, ভিক্খৱে, ধম্মা অভিঞ্ঞা ভাৱেতব্বা? সমথো চ ৱিপস্সনা চ – ইমে ৱুচ্চন্তি, ভিক্খৱে, ধম্মা অভিঞ্ঞা ভাৱেতব্বা.

‘‘কতমে চ, ভিক্খৱে, ধম্মা অভিঞ্ঞা সচ্ছিকাতব্বা? ৱিজ্জা চ ৱিমুত্তি চ – ইমে ৱুচ্চন্তি, ভিক্খৱে, ধম্মা অভিঞ্ঞা সচ্ছিকাতব্বা. ইমে খো, ভিক্খৱে, চত্তাৰো ধম্মা’’তি. পঠমং.