২. পৰিযেসনাসুত্তং

২৫৫. ‘‘চতস্সো ইমা, ভিক্খৱে, অনৰিযপৰিযেসনা. কতমা চতস্সো? ইধ, ভিক্খৱে, একচ্চো অত্তনা জৰাধম্মো সমানো জৰাধম্মংযেৱ পৰিযেসতি; অত্তনা ব্যাধিধম্মো সমানো ব্যাধিধম্মংযেৱ পৰিযেসতি; অত্তনা মৰণধম্মো সমানো মৰণধম্মংযেৱ পৰিযেসতি; অত্তনা সংকিলেসধম্মো সমানো সংকিলেসধম্মংযেৱ পৰিযেসতি. ইমা খো, ভিক্খৱে, চতস্সো অনৰিযপৰিযেসনা.

‘‘চতস্সো ইমা, ভিক্খৱে, অৰিযপৰিযেসনা. কতমা চতস্সো? ইধ, ভিক্খৱে, একচ্চো অত্তনা জৰাধম্মো সমানো জৰাধম্মে আদীনৱং ৱিদিত্ৱা অজৰং অনুত্তৰং যোগক্খেমং নিব্বানং পৰিযেসতি; অত্তনা ব্যাধিধম্মো সমানো ব্যাধিধম্মে আদীনৱং ৱিদিত্ৱা অব্যাধিং অনুত্তৰং যোগক্খেমং নিব্বানং পৰিযেসতি; অত্তনা মৰণধম্মো সমানো মৰণধম্মে আদীনৱং ৱিদিত্ৱা অমতং অনুত্তৰং যোগক্খেমং নিব্বানং পৰিযেসতি; অত্তনা সংকিলেসধম্মো সমানো সংকিলেসধম্মে আদীনৱং ৱিদিত্ৱা অসংকিলিট্ঠং অনুত্তৰং যোগক্খেমং নিব্বানং পৰিযেসতি. ইমা খো, ভিক্খৱে, চতস্সো অৰিযপৰিযেসনা’’তি. দুতিযং.