৪. পঠমসিক্খাপদসুত্তং

২৩৫. ‘‘চত্তাৰিমানি, ভিক্খৱে, কম্মানি মযা সযং অভিঞ্ঞা সচ্ছিকত্ৱা পৱেদিতানি. কতমানি চত্তাৰি? অত্থি, ভিক্খৱে, কম্মং কণ্হং কণ্হৱিপাকং; অত্থি, ভিক্খৱে, কম্মং সুক্কং সুক্কৱিপাকং; অত্থি, ভিক্খৱে, কম্মং কণ্হসুক্কং কণ্হসুক্কৱিপাকং; অত্থি, ভিক্খৱে, কম্মং অকণ্হঅসুক্কং অকণ্হঅসুক্কৱিপাকং কম্মক্খযায সংৱত্ততি. কতমঞ্চ, ভিক্খৱে, কম্মং কণ্হং কণ্হৱিপাকং? ইধ, ভিক্খৱে, একচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচাৰী হোতি, মুসাৱাদী হোতি, সুৰামেৰযমজ্জপমাদট্ঠাযী হোতি. ইদং ৱুচ্চতি, ভিক্খৱে, কম্মং কণ্হং কণ্হৱিপাকং.

‘‘কতমঞ্চ, ভিক্খৱে, কম্মং সুক্কং সুক্কৱিপাকং? ইধ, ভিক্খৱে, একচ্চো পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, সুৰামেৰযমজ্জপমাদট্ঠানা পটিৱিৰতো হোতি. ইদং ৱুচ্চতি, ভিক্খৱে, কম্মং সুক্কং সুক্কৱিপাকং.

‘‘কতমঞ্চ, ভিক্খৱে, কম্মং কণ্হসুক্কং কণ্হসুক্কৱিপাকং? ইধ, ভিক্খৱে, একচ্চো সব্যাবজ্ঝম্পি অব্যাবজ্ঝম্পি কাযসঙ্খাৰং অভিসঙ্খৰোতি…পে… ইদং ৱুচ্চতি, ভিক্খৱে, কম্মং কণ্হসুক্কং কণ্হসুক্কৱিপাকং.

‘‘কতমঞ্চ, ভিক্খৱে, কম্মং অকণ্হঅসুক্কং অকণ্হঅসুক্কৱিপাকং কম্মক্খযায সংৱত্ততি? তত্ৰ, ভিক্খৱে, যমিদং কম্মং কণ্হং কণ্হৱিপাকং…পে… ইদং ৱুচ্চতি, ভিক্খৱে, কম্মং অকণ্হঅসুক্কং অকণ্হঅসুক্কৱিপাকং কম্মক্খযায সংৱত্ততি. ইমানি খো, ভিক্খৱে, চত্তাৰি কম্মানি মযা সযং অভিঞ্ঞা সচ্ছিকত্ৱা পৱেদিতানী’’তি. চতুত্থং.