৮. দুতিযপাপধম্মসুত্তং

২০৮. ‘‘পাপঞ্চ ৱো, ভিক্খৱে, দেসেস্সামি, পাপেন পাপতৰঞ্চ; কল্যাণঞ্চ, কল্যাণেন কল্যাণতৰঞ্চ. তং সুণাথ, সাধুকং মনসিকৰোথ; ভাসিস্সামী’’তি. এৱং…পে… এতদৱোচ –

‘‘কতমো চ, ভিক্খৱে, পাপো? ইধ, ভিক্খৱে, একচ্চো মিচ্ছাদিট্ঠিকো হোতি…পে… মিচ্ছাঞাণী হোতি, মিচ্ছাৱিমুত্তি হোতি. অযং ৱুচ্চতি, ভিক্খৱে, পাপো.

‘‘কতমো চ, ভিক্খৱে, পাপেন পাপতৰো? ইধ, ভিক্খৱে, একচ্চো অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি…পে… অত্তনা চ মিচ্ছাঞাণী হোতি, পৰঞ্চ মিচ্ছাঞাণে সমাদপেতি; অত্তনা চ মিচ্ছাৱিমুত্তি হোতি, পৰঞ্চ মিচ্ছাৱিমুত্তিযা সমাদপেতি. অযং ৱুচ্চতি, ভিক্খৱে, পাপেন পাপতৰো.

‘‘কতমো চ, ভিক্খৱে, কল্যাণো? ইধ, ভিক্খৱে, একচ্চো সম্মাদিট্ঠিকো হোতি …পে… সম্মাঞাণী হোতি, সম্মাৱিমুত্তি হোতি. অযং ৱুচ্চতি, ভিক্খৱে, কল্যাণো.

‘‘কতমো চ, ভিক্খৱে, কল্যাণেন কল্যাণতৰো? ইধ, ভিক্খৱে, একচ্চো অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি…পে… অত্তনা চ সম্মাঞাণী হোতি, পৰঞ্চ সম্মাঞাণে সমাদপেতি; অত্তনা চ সম্মাৱিমুত্তি হোতি, পৰঞ্চ সম্মাৱিমুত্তিযা সমাদপেতি. অযং ৱুচ্চতি, ভিক্খৱে, কল্যাণেন কল্যাণতৰো’’তি. অট্ঠমং.