(২১) ১. সপ্পুৰিসৱগ্গো

১. সিক্খাপদসুত্তং

২০১. ‘‘অসপ্পুৰিসঞ্চ ৱো, ভিক্খৱে, দেসেস্সামি, অসপ্পুৰিসেন অসপ্পুৰিসতৰঞ্চ; সপ্পুৰিসঞ্চ, সপ্পুৰিসেন সপ্পুৰিসতৰঞ্চ. তং সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘কতমো চ, ভিক্খৱে, অসপ্পুৰিসো? ইধ, ভিক্খৱে, একচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচাৰী হোতি, মুসাৱাদী হোতি, সুৰামেৰযমজ্জপমাদট্ঠাযী হোতি. অযং ৱুচ্চতি, ভিক্খৱে, অসপ্পুৰিসো.

‘‘কতমো চ, ভিক্খৱে, অসপ্পুৰিসেন অসপ্পুৰিসতৰো? ইধ, ভিক্খৱে, একচ্চো অত্তনা চ পাণাতিপাতী হোতি, পৰঞ্চ পাণাতিপাতে সমাদপেতি; অত্তনা চ অদিন্নাদাযী হোতি, পৰঞ্চ অদিন্নাদানে সমাদপেতি; অত্তনা চ কামেসুমিচ্ছাচাৰী হোতি, পৰঞ্চ কামেসুমিচ্ছাচাৰে সমাদপেতি; অত্তনা চ মুসাৱাদী হোতি, পৰঞ্চ মুসাৱাদে সমাদপেতি; অত্তনা চ সুৰামেৰযমজ্জপমাদট্ঠাযী হোতি, পৰঞ্চ সুৰামেৰযমজ্জপমাদট্ঠানে সমাদপেতি. অযং ৱুচ্চতি, ভিক্খৱে, অসপ্পুৰিসেন অসপ্পুৰিসতৰো.

‘‘কতমো চ, ভিক্খৱে, সপ্পুৰিসো? ইধ, ভিক্খৱে, একচ্চো পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, সুৰামেৰযমজ্জপমাদট্ঠানা পটিৱিৰতো হোতি. অযং ৱুচ্চতি, ভিক্খৱে, সপ্পুৰিসো.

‘‘কতমো চ, ভিক্খৱে, সপ্পুৰিসেন সপ্পুৰিসতৰো? ইধ, ভিক্খৱে, একচ্চো অত্তনা চ পাণাতিপাতা পটিৱিৰতো হোতি, পৰঞ্চ পাণাতিপাতা ৱেৰমণিযা সমাদপেতি; অত্তনা চ অদিন্নাদানা পটিৱিৰতো হোতি, পৰঞ্চ অদিন্নাদানা ৱেৰমণিযা সমাদপেতি; অত্তনা চ কামেসুমিচ্ছাচাৰা পটিৱিৰতো হোতি, পৰঞ্চ কামেসুমিচ্ছাচাৰা ৱেৰমণিযা সমাদপেতি; অত্তনা চ মুসাৱাদা পটিৱিৰতো হোতি, পৰঞ্চ মুসাৱাদা ৱেৰমণিযা সমাদপেতি; অত্তনা চ সুৰামেৰযমজ্জপমাদট্ঠানা পটিৱিৰতো হোতি, পৰঞ্চ সুৰামেৰযমজ্জপমাদট্ঠানা ৱেৰমণিযা সমাদপেতি. অযং ৱুচ্চতি, ভিক্খৱে, সপ্পুৰিসেন সপ্পুৰিসতৰো’’তি [পু. প. ১৩৫]. পঠমং.

২. অস্সদ্ধসুত্তং

২০২. ‘‘অসপ্পুৰিসঞ্চ ৱো, ভিক্খৱে, দেসেস্সামি, অসপ্পুৰিসেন অসপ্পুৰিসতৰঞ্চ; সপ্পুৰিসঞ্চ, সপ্পুৰিসেন সপ্পুৰিসতৰঞ্চ. তং সুণাথ…পে….

‘‘কতমো চ, ভিক্খৱে, অসপ্পুৰিসো? ইধ, ভিক্খৱে, একচ্চো অস্সদ্ধো হোতি, অহিৰিকো হোতি, অনোত্তপ্পী হোতি, অপ্পস্সুতো হোতি, কুসীতো হোতি, মুট্ঠস্সতি হোতি, দুপ্পঞ্ঞো হোতি. অযং ৱুচ্চতি, ভিক্খৱে, অসপ্পুৰিসো.

‘‘কতমো চ, ভিক্খৱে, অসপ্পুৰিসেন অসপ্পুৰিসতৰো? ইধ, ভিক্খৱে, একচ্চো অত্তনা চ অস্সদ্ধো হোতি, পৰঞ্চ অস্সদ্ধিযে [অসদ্ধায (ক.)] সমাদপেতি; অত্তনা চ অহিৰিকো হোতি, পৰঞ্চ অহিৰিকতায সমাদপেতি; অত্তনা চ অনোত্তপ্পী হোতি, পৰঞ্চ অনোত্তপ্পে সমাদপেতি; অত্তনা চ অপ্পস্সুতো হোতি, পৰঞ্চ অপ্পস্সুতে সমাদপেতি; অত্তনা চ কুসীতো হোতি, পৰঞ্চ কোসজ্জে সমাদপেতি; অত্তনা চ মুট্ঠস্সতি হোতি, পৰঞ্চ মুট্ঠস্সচ্চে [মুট্ঠসচ্চে (সী. স্যা. কং. পী.)] সমাদপেতি; অত্তনা চ দুপ্পঞ্ঞো হোতি, পৰঞ্চ দুপ্পঞ্ঞতায সমাদপেতি. অযং ৱুচ্চতি, ভিক্খৱে, অসপ্পুৰিসেন অসপ্পুৰিসতৰো.

‘‘কতমো চ, ভিক্খৱে, সপ্পুৰিসো? ইধ, ভিক্খৱে, একচ্চো সদ্ধো হোতি, হিৰিমা হোতি, ওত্তপ্পী হোতি, বহুস্সুতো হোতি, আৰদ্ধৱীৰিযো হোতি, সতিমা হোতি, পঞ্ঞৱা হোতি. অযং ৱুচ্চতি, ভিক্খৱে, সপ্পুৰিসো.

‘‘কতমো চ, ভিক্খৱে, সপ্পুৰিসেন সপ্পুৰিসতৰো? ইধ, ভিক্খৱে, একচ্চো অত্তনা চ সদ্ধাসম্পন্নো হোতি, পৰঞ্চ সদ্ধাসম্পদায সমাদপেতি; অত্তনা চ হিৰিমা হোতি, পৰঞ্চ হিৰিমতায [হিৰিসম্পদায (ক.)] সমাদপেতি; অত্তনা চ ওত্তপ্পী হোতি, পৰঞ্চ ওত্তপ্পে সমাদপেতি; অত্তনা চ বহুস্সুতো হোতি, পৰঞ্চ বাহুসচ্চে সমাদপেতি; অত্তনা চ আৰদ্ধৱীৰিযো হোতি, পৰঞ্চ ৱীৰিযাৰম্ভে সমাদপেতি; অত্তনা চ উপট্ঠিতস্সতি হোতি, পৰঞ্চ সতিউপট্ঠানে [সতিপট্ঠানে (সী. স্যা. কং. পী.)] সমাদপেতি; অত্তনা চ পঞ্ঞাসম্পন্নো হোতি, পৰঞ্চ পঞ্ঞাসম্পদায সমাদপেতি. অযং ৱুচ্চতি, ভিক্খৱে, সপ্পুৰিসেন সপ্পুৰিসতৰো’’তি. দুতিযং.

৩. সত্তকম্মসুত্তং

২০৩. ‘‘অসপ্পুৰিসঞ্চ ৱো, ভিক্খৱে, দেসেস্সামি, অসপ্পুৰিসেন অসপ্পুৰিসতৰঞ্চ; সপ্পুৰিসঞ্চ, সপ্পুৰিসেন সপ্পুৰিসতৰঞ্চ. তং সুণাথ…পে….

‘‘কতমো চ, ভিক্খৱে, অসপ্পুৰিসো? ইধ, ভিক্খৱে, একচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচাৰী হোতি, মুসাৱাদী হোতি, পিসুণৱাচো হোতি, ফৰুসৱাচো হোতি, সম্ফপ্পলাপী হোতি. অযং ৱুচ্চতি, ভিক্খৱে, অসপ্পুৰিসো.

‘‘কতমো চ, ভিক্খৱে, অসপ্পুৰিসেন অসপ্পুৰিসতৰো? ইধ, ভিক্খৱে, একচ্চো অত্তনা চ পাণাতিপাতী হোতি, পৰঞ্চ পাণাতিপাতে সমাদপেতি; অত্তনা চ অদিন্নাদাযী হোতি, পৰঞ্চ অদিন্নাদানে সমাদপেতি; অত্তনা চ কামেসুমিচ্ছাচাৰী হোতি, পৰঞ্চ কামেসুমিচ্ছাচাৰে সমাদপেতি; অত্তনা চ মুসাৱাদী হোতি, পৰঞ্চ মুসাৱাদে সমাদপেতি; অত্তনা চ পিসুণৱাচো হোতি, পৰঞ্চ পিসুণায ৱাচায সমাদপেতি; অত্তনা চ ফৰুসৱাচো হোতি, পৰঞ্চ ফৰুসায ৱাচায সমাদপেতি; অত্তনা চ সম্ফপ্পলাপী হোতি, পৰঞ্চ সম্ফপ্পলাপে সমাদপেতি. অযং ৱুচ্চতি, ভিক্খৱে, অসপ্পুৰিসেন অসপ্পুৰিসতৰো.

‘‘কতমো চ, ভিক্খৱে, সপ্পুৰিসো? ইধ, ভিক্খৱে, একচ্চো পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, পিসুণায ৱাচায পটিৱিৰতো হোতি, ফৰুসায ৱাচায পটিৱিৰতো, হোতি, সম্ফপ্পলাপা পটিৱিৰতো হোতি. অযং ৱুচ্চতি, ভিক্খৱে, সপ্পুৰিসো.

‘‘কতমো চ, ভিক্খৱে, সপ্পুৰিসেন সপ্পুৰিসতৰো? ইধ ভিক্খৱে, একচ্চো অত্তনা চ পাণাতিপাতা পটিৱিৰতো হোতি, পৰঞ্চ পাণাতিপাতা ৱেৰমণিযা সমাদপেতি; অত্তনা চ অদিন্নাদানা পটিৱিৰতো হোতি, পৰঞ্চ অদিন্নাদানা ৱেৰমণিযা সমাদপেতি; অত্তনা চ কামেসুমিচ্ছাচাৰা পটিৱিৰতো হোতি, পৰঞ্চ কামেসুমিচ্ছাচাৰা ৱেৰমণিযা সমাদপেতি; অত্তনা চ মুসাৱাদা পটিৱিৰতো হোতি, পৰঞ্চ মুসাৱাদা ৱেৰমণিযা সমাদপেতি; অত্তনা চ পিসুণায ৱাচায পটিৱিৰতো হোতি, পৰঞ্চ পিসুণায ৱাচায ৱেৰমণিযা সমাদপেতি; অত্তনা চ ফৰুসায ৱাচায পটিৱিৰতো হোতি, পৰঞ্চ ফৰুসায ৱাচায ৱেৰমণিযা সমাদপেতি; অত্তনা চ সম্ফপ্পলাপা পটিৱিৰতো হোতি, পৰঞ্চ সম্ফপ্পলাপা ৱেৰমণিযা সমাদপেতি. অযং ৱুচ্চতি, ভিক্খৱে, সপ্পুৰিসেন সপ্পুৰিসতৰো’’তি. ততিযং.

৪. দসকম্মসুত্তং

২০৪. ‘‘অসপ্পুৰিসঞ্চ ৱো, ভিক্খৱে, দেসেস্সামি, অসপ্পুৰিসেন অসপ্পুৰিসতৰঞ্চ; সপ্পুৰিসঞ্চ, সপ্পুৰিসেন সপ্পুৰিসতৰঞ্চ. তং সুণাথ…পে….

‘‘কতমো চ, ভিক্খৱে, অসপ্পুৰিসো? ইধ, ভিক্খৱে, একচ্চো পাণাতিপাতী হোতি, অদিন্নাদাযী হোতি, কামেসুমিচ্ছাচাৰী হোতি, মুসাৱাদী হোতি, পিসুণৱাচো হোতি, ফৰুসৱাচো হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠিকো হোতি. অযং ৱুচ্চতি, ভিক্খৱে, অসপ্পুৰিসো.

‘‘কতমো চ, ভিক্খৱে, অসপ্পুৰিসেন অসপ্পুৰিসতৰো? ইধ, ভিক্খৱে, একচ্চো অত্তনা চ পাণাতিপাতী হোতি, পৰঞ্চ পাণাতিপাতে সমাদপেতি…পে… অত্তনা চ অভিজ্ঝালু হোতি, পৰঞ্চ অভিজ্ঝায সমাদপেতি; অত্তনা চ ব্যাপন্নচিত্তো হোতি, পৰঞ্চ ব্যাপাদে সমাদপেতি, অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি. অযং ৱুচ্চতি, ভিক্খৱে, অসপ্পুৰিসেন অসপ্পুৰিসতৰো.

‘‘কতমো চ, ভিক্খৱে, সপ্পুৰিসো? ইধ, ভিক্খৱে, একচ্চো পাণাতিপাতা পটিৱিৰতো হোতি…পে… অনভিজ্ঝালু হোতি, অব্যাপন্নচিত্তো হোতি, সম্মাদিট্ঠিকো হোতি. অযং ৱুচ্চতি, ভিক্খৱে, সপ্পুৰিসো.

‘‘কতমো চ, ভিক্খৱে, সপ্পুৰিসেন সপ্পুৰিসতৰো? ইধ, ভিক্খৱে, একচ্চো অত্তনা চ পাণাতিপাতা পটিৱিৰতো হোতি, পৰঞ্চ পাণাতিপাতা ৱেৰমণিযা সমাদপেতি…পে… অত্তনা চ অনভিজ্ঝালু হোতি, পৰঞ্চ অনভিজ্ঝায সমাদপেতি; অত্তনা চ অব্যাপন্নচিত্তো হোতি, পৰঞ্চ অব্যাপাদে সমাদপেতি; অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি. অযং ৱুচ্চতি, ভিক্খৱে, সপ্পুৰিসেন সপ্পুৰিসতৰো’’তি. চতুত্থং.

৫. অট্ঠঙ্গিকসুত্তং

২০৫. ‘‘অসপ্পুৰিসঞ্চ ৱো, ভিক্খৱে, দেসেস্সামি, অসপ্পুৰিসেন অসপ্পুৰিসতৰঞ্চ; সপ্পুৰিসঞ্চ, সপ্পুৰিসেন সপ্পুৰিসতৰঞ্চ. তং সুণাথ…পে….

‘‘কতমো চ, ভিক্খৱে, অসপ্পুৰিসো? ইধ, ভিক্খৱে, একচ্চো মিচ্ছাদিট্ঠিকো হোতি, মিচ্ছাসঙ্কপ্পো হোতি, মিচ্ছাৱাচো হোতি, মিচ্ছাকম্মন্তো হোতি, মিচ্ছাআজীৱো হোতি, মিচ্ছাৱাযামো হোতি, মিচ্ছাসতি হোতি, মিচ্ছাসমাধি হোতি. অযং ৱুচ্চতি, ভিক্খৱে, অসপ্পুৰিসো.

‘‘কতমো চ, ভিক্খৱে, অসপ্পুৰিসেন অসপ্পুৰিসতৰো? ইধ ভিক্খৱে, একচ্চো অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি; অত্তনা চ মিচ্ছাসঙ্কপ্পো হোতি, পৰঞ্চ মিচ্ছাসঙ্কপ্পে সমাদপেতি; অত্তনা চ মিচ্ছাৱাচো হোতি, পৰঞ্চ মিচ্ছাৱাচায সমাদপেতি; অত্তনা চ মিচ্ছাকম্মন্তো হোতি, পৰঞ্চ মিচ্ছাকম্মন্তে সমাদপেতি; অত্তনা চ মিচ্ছাআজীৱো হোতি, পৰঞ্চ মিচ্ছাআজীৱে সমাদপেতি; অত্তনা চ মিচ্ছাৱাযামো হোতি, পৰঞ্চ মিচ্ছাৱাযামে সমাদপেতি; অত্তনা চ মিচ্ছাসতি হোতি, পৰঞ্চ মিচ্ছাসতিযা সমাদপেতি; অত্তনা চ মিচ্ছাসমাধি হোতি, পৰঞ্চ মিচ্ছাসমাধিম্হি সমাদপেতি. অযং ৱুচ্চতি, ভিক্খৱে, অসপ্পুৰিসেন অসপ্পুৰিসতৰো.

‘‘কতমো চ, ভিক্খৱে, সপ্পুৰিসো? ইধ, ভিক্খৱে, একচ্চো সম্মাদিট্ঠিকো হোতি, সম্মাসঙ্কপ্পো হোতি, সম্মাৱাচো হোতি, সম্মাকম্মন্তো হোতি, সম্মাআজীৱো হোতি, সম্মাৱাযামো হোতি, সম্মাসতি হোতি, সম্মাসমাধি হোতি. অযং ৱুচ্চতি, ভিক্খৱে, সপ্পুৰিসো.

‘‘কতমো চ, ভিক্খৱে, সপ্পুৰিসেন সপ্পুৰিসতৰো? ইধ, ভিক্খৱে, একচ্চো অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি; অত্তনা চ সম্মাসঙ্কপ্পো হোতি, পৰঞ্চ সম্মাসঙ্কপ্পে সমাদপেতি; অত্তনা চ সম্মাৱাচো হোতি, পৰঞ্চ সম্মাৱাচায সমাদপেতি; অত্তনা চ সম্মাকম্মন্তো হোতি, পৰঞ্চ সম্মাকম্মন্তে সমাদপেতি; অত্তনা চ সম্মাআজীৱো হোতি, পৰঞ্চ সম্মাআজীৱে সমাদপেতি; অত্তনা চ সম্মাৱাযামো হোতি, পৰঞ্চ সম্মাৱাযামে সমাদপেতি; অত্তনা চ সম্মাসতি হোতি, পৰঞ্চ সম্মাসতিযা সমাদপেতি; অত্তনা চ সম্মাসমাধি হোতি, পৰঞ্চ সম্মাসমাধিম্হি সমাদপেতি. অযং ৱুচ্চতি, ভিক্খৱে, সপ্পুৰিসেন সপ্পুৰিসতৰো’’তি. পঞ্চমং.

৬. দসমগ্গসুত্তং

২০৬. ‘‘অসপ্পুৰিসঞ্চ ৱো, ভিক্খৱে, দেসেস্সামি, অসপ্পুৰিসেন অসপ্পুৰিসতৰঞ্চ; সপ্পুৰিসঞ্চ, সপ্পুৰিসেন সপ্পুৰিসতৰঞ্চ. তং সুণাথ…পে….

‘‘কতমো চ, ভিক্খৱে, অসপ্পুৰিসো? ইধ, ভিক্খৱে, একচ্চো মিচ্ছাদিট্ঠিকো হোতি …পে… মিচ্ছাঞাণী হোতি, মিচ্ছাৱিমুত্তি হোতি. অযং ৱুচ্চতি, ভিক্খৱে, অসপ্পুৰিসো.

‘‘কতমো চ, ভিক্খৱে, অসপ্পুৰিসেন অসপ্পুৰিসতৰো? ইধ, ভিক্খৱে, একচ্চো অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি…পে… অত্তনা চ মিচ্ছাঞাণী হোতি, পৰঞ্চ মিচ্ছাঞাণে সমাদপেতি; অত্তনা চ মিচ্ছাৱিমুত্তি হোতি, পৰঞ্চ মিচ্ছাৱিমুত্তিযা সমাদপেতি. অযং ৱুচ্চতি, ভিক্খৱে, অসপ্পুৰিসেন অসপ্পুৰিসতৰো.

‘‘কতমো চ, ভিক্খৱে, সপ্পুৰিসো? ইধ, ভিক্খৱে, একচ্চো সম্মাদিট্ঠিকো হোতি…পে… সম্মাঞাণী হোতি, সম্মাৱিমুত্তি হোতি. অযং ৱুচ্চতি, ভিক্খৱে, সপ্পুৰিসো.

‘‘কতমো চ, ভিক্খৱে, সপ্পুৰিসেন সপ্পুৰিসতৰো? ইধ, ভিক্খৱে, একচ্চো অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি…পে… অত্তনা চ সম্মাঞাণী হোতি, পৰঞ্চ সম্মাঞাণে সমাদপেতি; অত্তনা চ সম্মাৱিমুত্তি হোতি, পৰঞ্চ সম্মাৱিমুত্তিযা সমাদপেতি. অযং ৱুচ্চতি, ভিক্খৱে, সপ্পুৰিসেন সপ্পুৰিসতৰো’’তি. ছট্ঠং.

৭. পঠমপাপধম্মসুত্তং

২০৭. ‘‘পাপঞ্চ ৱো, ভিক্খৱে, দেসেস্সামি, পাপেন পাপতৰঞ্চ; কল্যাণঞ্চ, কল্যাণেন কল্যাণতৰঞ্চ. তং সুণাথ…পে….

‘‘কতমো চ, ভিক্খৱে, পাপো? ইধ, ভিক্খৱে, একচ্চো পাণাতিপাতী হোতি…পে… মিচ্ছাদিট্ঠিকো হোতি. অযং ৱুচ্চতি, ভিক্খৱে, পাপো.

‘‘কতমো চ, ভিক্খৱে, পাপেন পাপতৰো? ইধ, ভিক্খৱে, একচ্চো অত্তনা চ পাণাতিপাতী হোতি, পৰঞ্চ পাণাতিপাতে সমাদপেতি…পে… অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি. অযং ৱুচ্চতি, ভিক্খৱে, পাপেন পাপতৰো.

‘‘কতমো চ, ভিক্খৱে, কল্যাণো? ইধ, ভিক্খৱে, একচ্চো পাণাতিপাতা পটিৱিৰতো হোতি…পে… সম্মাদিট্ঠিকো হোতি. অযং ৱুচ্চতি, ভিক্খৱে, কল্যাণো.

‘‘কতমো চ, ভিক্খৱে, কল্যাণেন কল্যাণতৰো? ইধ, ভিক্খৱে, একচ্চো অত্তনা চ পাণাতিপাতা পটিৱিৰতো হোতি, পৰঞ্চ পাণাতিপাতা ৱেৰমণিযা সমাদপেতি…পে… অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি. অযং ৱুচ্চতি, ভিক্খৱে, কল্যাণেন কল্যাণতৰো’’তি. সত্তমং.

৮. দুতিযপাপধম্মসুত্তং

২০৮. ‘‘পাপঞ্চ ৱো, ভিক্খৱে, দেসেস্সামি, পাপেন পাপতৰঞ্চ; কল্যাণঞ্চ, কল্যাণেন কল্যাণতৰঞ্চ. তং সুণাথ, সাধুকং মনসিকৰোথ; ভাসিস্সামী’’তি. এৱং…পে… এতদৱোচ –

‘‘কতমো চ, ভিক্খৱে, পাপো? ইধ, ভিক্খৱে, একচ্চো মিচ্ছাদিট্ঠিকো হোতি…পে… মিচ্ছাঞাণী হোতি, মিচ্ছাৱিমুত্তি হোতি. অযং ৱুচ্চতি, ভিক্খৱে, পাপো.

‘‘কতমো চ, ভিক্খৱে, পাপেন পাপতৰো? ইধ, ভিক্খৱে, একচ্চো অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি…পে… অত্তনা চ মিচ্ছাঞাণী হোতি, পৰঞ্চ মিচ্ছাঞাণে সমাদপেতি; অত্তনা চ মিচ্ছাৱিমুত্তি হোতি, পৰঞ্চ মিচ্ছাৱিমুত্তিযা সমাদপেতি. অযং ৱুচ্চতি, ভিক্খৱে, পাপেন পাপতৰো.

‘‘কতমো চ, ভিক্খৱে, কল্যাণো? ইধ, ভিক্খৱে, একচ্চো সম্মাদিট্ঠিকো হোতি …পে… সম্মাঞাণী হোতি, সম্মাৱিমুত্তি হোতি. অযং ৱুচ্চতি, ভিক্খৱে, কল্যাণো.

‘‘কতমো চ, ভিক্খৱে, কল্যাণেন কল্যাণতৰো? ইধ, ভিক্খৱে, একচ্চো অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি…পে… অত্তনা চ সম্মাঞাণী হোতি, পৰঞ্চ সম্মাঞাণে সমাদপেতি; অত্তনা চ সম্মাৱিমুত্তি হোতি, পৰঞ্চ সম্মাৱিমুত্তিযা সমাদপেতি. অযং ৱুচ্চতি, ভিক্খৱে, কল্যাণেন কল্যাণতৰো’’তি. অট্ঠমং.

৯. ততিযপাপধম্মসুত্তং

২০৯. ‘‘পাপধম্মঞ্চ ৱো, ভিক্খৱে, দেসেস্সামি, পাপধম্মেন পাপধম্মতৰঞ্চ; কল্যাণধম্মঞ্চ, কল্যাণধম্মেন কল্যাণধম্মতৰঞ্চ. তং সুণাথ…পে….

‘‘কতমো চ, ভিক্খৱে, পাপধম্মো? ইধ, ভিক্খৱে, একচ্চো পাণাতিপাতী হোতি…পে… মিচ্ছাদিট্ঠিকো হোতি. অযং ৱুচ্চতি, ভিক্খৱে, পাপধম্মো.

‘‘কতমো চ, ভিক্খৱে, পাপধম্মেন পাপধম্মতৰো? ইধ ভিক্খৱে, একচ্চো অত্তনা চ পাণাতিপাতী হোতি, পৰঞ্চ পাণাতিপাতে সমাদপেতি…পে… অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি. অযং ৱুচ্চতি, ভিক্খৱে, পাপধম্মেন পাপধম্মতৰো.

‘‘কতমো চ, ভিক্খৱে, কল্যাণধম্মো? ইধ, ভিক্খৱে, একচ্চো পাণাতিপাতা পটিৱিৰতো হোতি…পে… সম্মাদিট্ঠিকো হোতি. অযং ৱুচ্চতি, ভিক্খৱে, কল্যাণধম্মো.

‘‘কতমো চ, ভিক্খৱে, কল্যাণধম্মেন কল্যাণধম্মতৰো? ইধ, ভিক্খৱে, একচ্চো অত্তনা চ পাণাতিপাতা পটিৱিৰতো হোতি, পৰঞ্চ পাণাতিপাতা ৱেৰমণিযা সমাদপেতি…পে… অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি. অযং ৱুচ্চতি, ভিক্খৱে, কল্যাণধম্মেন কল্যাণধম্মতৰো’’তি. নৱমং.

১০. চতুত্থপাপধম্মসুত্তং

২১০. ‘‘পাপধম্মঞ্চ ৱো, ভিক্খৱে, দেসেস্সামি, পাপধম্মেন পাপধম্মতৰঞ্চ; কল্যাণধম্মঞ্চ, কল্যাণধম্মেন কল্যাণধম্মতৰঞ্চ. তং সুণাথ…পে….

‘‘কতমো চ, ভিক্খৱে, পাপধম্মো? ইধ, ভিক্খৱে, একচ্চো মিচ্ছাদিট্ঠিকো হোতি…পে… মিচ্ছাঞাণী হোতি, মিচ্ছাৱিমুত্তি হোতি. অযং ৱুচ্চতি, ভিক্খৱে, পাপধম্মো.

‘‘কতমো চ, ভিক্খৱে, পাপধম্মেন পাপধম্মতৰো? ইধ, ভিক্খৱে, একচ্চো অত্তনা চ মিচ্ছাদিট্ঠিকো হোতি, পৰঞ্চ মিচ্ছাদিট্ঠিযা সমাদপেতি…পে… অত্তনা চ মিচ্ছাঞাণী হোতি, পৰঞ্চ মিচ্ছাঞাণে সমাদপেতি; অত্তনা চ মিচ্ছাৱিমুত্তি হোতি, পৰঞ্চ মিচ্ছাৱিমুত্তিযা সমাদপেতি. অযং ৱুচ্চতি, ভিক্খৱে, পাপধম্মেন পাপধম্মতৰো.

‘‘কতমো চ, ভিক্খৱে, কল্যাণধম্মো? ইধ, ভিক্খৱে, একচ্চো সম্মাদিট্ঠিকো হোতি…পে… সম্মাঞাণী হোতি, সম্মাৱিমুত্তি হোতি. অযং ৱুচ্চতি, ভিক্খৱে, কল্যাণধম্মো.

‘‘কতমো চ, ভিক্খৱে, কল্যাণধম্মেন কল্যাণধম্মতৰো? ইধ, ভিক্খৱে, একচ্চো অত্তনা চ সম্মাদিট্ঠিকো হোতি, পৰঞ্চ সম্মাদিট্ঠিযা সমাদপেতি…পে… অত্তনা চ সম্মাঞাণী হোতি, পৰঞ্চ সম্মাঞাণে সমাদপেতি; অত্তনা চ সম্মাৱিমুত্তি হোতি, পৰঞ্চ সম্মাৱিমুত্তিযা সমাদপেতি. অযং ৱুচ্চতি, ভিক্খৱে, কল্যাণধম্মেন কল্যাণধম্মতৰো’’তি. দসমং.

সপ্পুৰিসৱগ্গো পঠমো.