৬. আযাচনসুত্তং

১৭৬. ‘‘সদ্ধো, ভিক্খৱে, ভিক্খু এৱং সম্মা আযাচমানো আযাচেয্য – ‘তাদিসো হোমি যাদিসা সাৰিপুত্তমোগ্গল্লানা’তি [অ. নি. ২.১৩১ ইদং সুত্তং আগতং]. এসা, ভিক্খৱে, তুলা এতং পমাণং মম সাৱকানং ভিক্খূনং, যদিদং সাৰিপুত্তমোগ্গল্লানা.

‘‘সদ্ধা, ভিক্খৱে, ভিক্খুনী এৱং সম্মা আযাচমানা আযাচেয্য – ‘তাদিসা হোমি যাদিসা খেমা চ ভিক্খুনী উপ্পলৱণ্ণা চা’তি. এসা, ভিক্খৱে, তুলা এতং পমাণং মম সাৱিকানং ভিক্খুনীনং, যদিদং খেমা চ ভিক্খুনী উপ্পলৱণ্ণা চ.

‘‘সদ্ধো, ভিক্খৱে, উপাসকো এৱং সম্মা আযাচমানো আযাচেয্য – ‘তাদিসো হোমি যাদিসো চিত্তো চ গহপতি হত্থকো চ আড়ৱকো’তি. এসা, ভিক্খৱে, তুলা এতং পমাণং মম সাৱকানং উপাসকানং, যদিদং চিত্তো চ গহপতি হত্থকো চ আড়ৱকো.

‘‘সদ্ধা, ভিক্খৱে, উপাসিকা এৱং সম্মা আযাচমানা আযাচেয্য – ‘তাদিসা হোমি যাদিসা খুজ্জুত্তৰা চ উপাসিকা ৱেড়ুকণ্ডকিযা চ নন্দমাতা’তি. এসা, ভিক্খৱে, তুলা এতং পমাণং মম সাৱিকানং উপাসিকানং, যদিদং খুজ্জুত্তৰা চ উপাসিকা ৱেড়ুকণ্ডকিযা চ নন্দমাতা’’তি. ছট্ঠং.