২. ৱিভত্তিসুত্তং

১৭২. তত্ৰ খো আযস্মা সাৰিপুত্তো ভিক্খূ আমন্তেসি – ‘‘আৱুসো ভিক্খৱে’’তি. ‘‘আৱুসো’’তি খো তে ভিক্খূ আযস্মতো সাৰিপুত্তস্স পচ্চস্সোসুং. আযস্মা সাৰিপুত্তো এতদৱোচ –

‘‘অদ্ধমাসূপসম্পন্নেন মে, আৱুসো, অত্থপটিসম্ভিদা সচ্ছিকতা ওধিসো ব্যঞ্জনসো. তমহং অনেকপৰিযাযেন আচিক্খামি দেসেমি পঞ্ঞাপেমি পট্ঠপেমি ৱিৱৰামি ৱিভজামি উত্তানীকৰোমি. যস্স খো পনস্স কঙ্খা ৱা ৱিমতি ৱা, সো মং পঞ্হেন. অহং ৱেয্যাকৰণেন সম্মুখীভূতো নো সত্থা যো নো ধম্মানং সুকুসলো.

‘‘অদ্ধমাসূপসম্পন্নেন মে, আৱুসো, ধম্মপটিসম্ভিদা সচ্ছিকতা ওধিসো ব্যঞ্জনসো. তমহং অনেকপৰিযাযেন আচিক্খামি দেসেমি পঞ্ঞাপেমি পট্ঠপেমি ৱিৱৰামি ৱিভজামি উত্তানীকৰোমি. যস্স খো পনস্স কঙ্খা ৱা ৱিমতি ৱা, সো মং পঞ্হেন. অহং ৱেয্যাকৰণেন সম্মুখীভূতো নো সত্থা যো নো ধম্মানং সুকুসলো.

‘‘অদ্ধমাসূপসম্পন্নেন মে, আৱুসো, নিৰুত্তিপটিসম্ভিদা সচ্ছিকতা ওধিসো ব্যঞ্জনসো. তমহং অনেকপৰিযাযেন আচিক্খামি দেসেমি পঞ্ঞাপেমি পট্ঠপেমি ৱিৱৰামি ৱিভজামি উত্তানীকৰোমি. যস্স খো পনস্স কঙ্খা ৱা ৱিমতি ৱা, সো মং পঞ্হেন. অহং ৱেয্যাকৰণেন সম্মুখীভূতো নো সত্থা যো নো ধম্মানং সুকুসলো.

‘‘অদ্ধমাসূপসম্পন্নেন মে, আৱুসো, পটিভানপটিসম্ভিদা সচ্ছিকতা ওধিসো ব্যঞ্জনসো. তমহং অনেকপৰিযাযেন আচিক্খামি দেসেমি পঞ্ঞাপেমি পট্ঠপেমি ৱিৱৰামি ৱিভজামি উত্তানীকৰোমি. যস্স খো পনস্স কঙ্খা ৱা ৱিমতি ৱা, সো মং পঞ্হেন. অহং ৱেয্যাকৰণেন সম্মুখীভূতো নো সত্থা যো নো ধম্মানং সুকুসলো’’তি. দুতিযং.