৮. দুতিযতথাগতঅচ্ছৰিযসুত্তং

১২৮. ‘‘তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা চত্তাৰো অচ্ছৰিযা অব্ভুতা ধম্মা পাতুভৱন্তি. কতমে চত্তাৰো? আলযাৰামা [আলযৰামা (অঞ্ঞসুত্তেসু)], ভিক্খৱে, পজা আলযৰতা আলযসম্মুদিতা; সা তথাগতেন অনালযে ধম্মে দেসিযমানে সুস্সূসতি সোতং ওদহতি অঞ্ঞা চিত্তং উপট্ঠপেতি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা অযং পঠমো অচ্ছৰিযো অব্ভুতো ধম্মো পাতুভৱতি.

‘‘মানাৰামা, ভিক্খৱে, পজা মানৰতা মানসম্মুদিতা. সা তথাগতেন মানৱিনযে ধম্মে দেসিযমানে সুস্সূসতি সোতং ওদহতি অঞ্ঞা চিত্তং উপট্ঠপেতি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা অযং দুতিযো অচ্ছৰিযো অব্ভুতো ধম্মো পাতুভৱতি.

‘‘অনুপসমাৰামা, ভিক্খৱে, পজা অনুপসমৰতা অনুপসমসম্মুদিতা. সা তথাগতেন ওপসমিকে ধম্মে দেসিযমানে সুস্সূসতি সোতং ওদহতি অঞ্ঞা চিত্তং উপট্ঠপেতি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা অযং ততিযো অচ্ছৰিযো অব্ভুতো ধম্মো পাতুভৱতি.

‘‘অৱিজ্জাগতা, ভিক্খৱে, পজা অণ্ডভূতা পৰিযোনদ্ধা. সা তথাগতেন অৱিজ্জাৱিনযে ধম্মে দেসিযমানে সুস্সূসতি সোতং ওদহতি অঞ্ঞা চিত্তং উপট্ঠপেতি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা অযং চতুত্থো অচ্ছৰিযো অব্ভুতো ধম্মো পাতুভৱতি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা ইমে চত্তাৰো অচ্ছৰিযা অব্ভুতা ধম্মা পাতুভৱন্তী’’তি. অট্ঠমং.