৯. আনন্দঅচ্ছৰিযসুত্তং

১২৯. ‘‘চত্তাৰোমে, ভিক্খৱে, অচ্ছৰিযা অব্ভুতা ধম্মা আনন্দে. কতমে চত্তাৰো? সচে, ভিক্খৱে, ভিক্খুপৰিসা আনন্দং দস্সনায উপসঙ্কমতি, দস্সনেনপি সা অত্তমনা হোতি. তত্ৰ চে আনন্দো ধম্মং ভাসতি, ভাসিতেনপি সা অত্তমনা হোতি. অতিত্তাৱ, ভিক্খৱে, ভিক্খুপৰিসা হোতি, অথ আনন্দো তুণ্হী ভৱতি.

‘‘সচে, ভিক্খৱে, ভিক্খুনিপৰিসা আনন্দং দস্সনায উপসঙ্কমতি, দস্সনেনপি সা অত্তমনা হোতি. তত্থ চে আনন্দো ধম্মং ভাসতি, ভাসিতেনপি সা অত্তমনা হোতি. অতিত্তাৱ, ভিক্খৱে, ভিক্খুনিপৰিসা হোতি, অথ আনন্দো তুণ্হী ভৱতি.

‘‘সচে, ভিক্খৱে, উপাসকপৰিসা আনন্দং দস্সনায উপসঙ্কমতি, দস্সনেনপি সা অত্তমনা হোতি. তত্ৰ চে আনন্দো ধম্মং ভাসতি, ভাসিতেনপি সা অত্তমনা হোতি. অতিত্তাৱ, ভিক্খৱে, উপাসকপৰিসা হোতি, অথ আনন্দো তুণ্হী ভৱতি.

‘‘সচে, ভিক্খৱে, উপাসিকাপৰিসা আনন্দং দস্সনায উপসঙ্কমতি, দস্সনেনপি সা অত্তমনা হোতি. তত্ৰ চে আনন্দো ধম্মং ভাসতি, ভাসিতেনপি সা অত্তমনা হোতি. অতিত্তাৱ, ভিক্খৱে, উপাসিকাপৰিসা হোতি, অথ আনন্দো তুণ্হী ভৱতি. ইমে খো, ভিক্খৱে, চত্তাৰো অচ্ছৰিযা অব্ভুতা ধম্মা আনন্দে’’তি. নৱমং.