৭. পঠমতথাগতঅচ্ছৰিযসুত্তং

১২৭. ‘‘তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা চত্তাৰো অচ্ছৰিযা অব্ভুতা ধম্মা [অব্ভুতধম্মা (স্যা. কং. ক.)] পাতুভৱন্তি. কতমে চত্তাৰো? যদা, ভিক্খৱে, বোধিসত্তো তুসিতা কাযা চৱিত্ৱা সতো সম্পজানো মাতুকুচ্ছিং ওক্কমতি, অথ সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায অপ্পমাণো উড়াৰো ওভাসো পাতুভৱতি অতিক্কম্মেৱ দেৱানং দেৱানুভাৱং. যাপি তা লোকন্তৰিকা অঘা অসংৱুতা অন্ধকাৰা অন্ধকাৰতিমিসা যত্থপিমেসং [যত্থিমেসং (সী. স্যা. কং.)] চন্দিমসূৰিযানং এৱংমহিদ্ধিকানং এৱংমহানুভাৱানং আভা নানুভোন্তি, তত্থপি অপ্পমাণো উড়াৰো ওভাসো পাতুভৱতি অতিক্কম্মেৱ দেৱানং দেৱানুভাৱং. যেপি তত্থ সত্তা উপপন্না তেপি তেনোভাসেন অঞ্ঞমঞ্ঞং সঞ্জানন্তি – ‘অঞ্ঞেপি কিৰ, ভো, সন্তি সত্তা ইধূপপন্না’তি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা অযং পঠমো অচ্ছৰিযো অব্ভুতো ধম্মো [অব্ভুতধম্মো (স্যা. কং. ক.)] পাতুভৱতি.

‘‘পুন চপৰং, ভিক্খৱে, যদা বোধিসত্তো সতো সম্পজানো মাতুকুচ্ছিম্হা নিক্খমতি, অথ সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায অপ্পমাণো উড়াৰো ওভাসো পাতুভৱতি অতিক্কম্মেৱ দেৱানং দেৱানুভাৱং. যাপি তা লোকন্তৰিকা অঘা অসংৱুতা অন্ধকাৰা অন্ধকাৰতিমিসা যত্থপিমেসং চন্দিমসূৰিযানং এৱংমহিদ্ধিকানং এৱংমহানুভাৱানং আভা নানুভোন্তি, তত্থপি অপ্পমাণো উড়াৰো ওভাসো পাতুভৱতি অতিক্কম্মেৱ দেৱানং দেৱানুভাৱং. যেপি তত্থ সত্তা উপপন্না তেপি তেনোভাসেন অঞ্ঞমঞ্ঞং সঞ্জানন্তি – ‘অঞ্ঞেপি কিৰ, ভো, সন্তি সত্তা ইধূপপন্না’তি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা অযং দুতিযো অচ্ছৰিযো অব্ভুতো ধম্মো পাতুভৱতি.

‘‘পুন চপৰং, ভিক্খৱে, যদা তথাগতো অনুত্তৰং সম্মাসম্বোধিং অভিসম্বুজ্ঝতি, অথ সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায অপ্পমাণো উড়াৰো ওভাসো পাতুভৱতি অতিক্কম্মেৱ দেৱানং দেৱানুভাৱং. যাপি তা লোকন্তৰিকা অঘা অসংৱুতা অন্ধকাৰা অন্ধকাৰতিমিসা যত্থপিমেসং চন্দিমসূৰিযানং এৱংমহিদ্ধিকানং এৱংমহানুভাৱানং আভা নানুভোন্তি, তত্থপি অপ্পমাণো উড়াৰো ওভাসো পাতুভৱতি অতিক্কম্মেৱ দেৱানং দেৱানুভাৱং. যেপি তত্থ সত্তা উপপন্না তেপি তেনোভাসেন অঞ্ঞমঞ্ঞং সঞ্জানন্তি – ‘অঞ্ঞেপি কিৰ, ভো, সন্তি সত্তা ইধূপপন্না’তি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা অযং ততিযো অচ্ছৰিযো অব্ভুতো ধম্মো পাতুভৱতি.

‘‘পুন চপৰং, ভিক্খৱে, যদা তথাগতো অনুত্তৰং ধম্মচক্কং পৱত্তেতি, অথ সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায অপ্পমাণো উড়াৰো ওভাসো পাতুভৱতি অতিক্কম্মেৱ দেৱানং দেৱানুভাৱং. যাপি তা লোকন্তৰিকা অঘা অসংৱুতা অন্ধকাৰা অন্ধকাৰতিমিসা যত্থপিমেসং চন্দিমসূৰিযানং এৱংমহিদ্ধিকানং এৱংমহানুভাৱানং আভা নানুভোন্তি, তত্থপি অপ্পমাণো উড়াৰো ওভাসো পাতুভৱতি অতিক্কম্মেৱ দেৱানং দেৱানুভাৱং. যেপি তত্থ সত্তা উপপন্না তেপি তেনোভাসেন অঞ্ঞমঞ্ঞং সঞ্জানন্তি – ‘অঞ্ঞেপি কিৰ, ভো, সন্তি সত্তা ইধূপপন্না’তি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা অযং চতুত্থো অচ্ছৰিযো অব্ভুতো ধম্মো পাতুভৱতি. তথাগতস্স, ভিক্খৱে, অৰহতো সম্মাসম্বুদ্ধস্স পাতুভাৱা ইমে চত্তাৰো অচ্ছৰিযা অব্ভুতা ধম্মা পাতুভৱন্তী’’তি. সত্তমং.