১. অত্তানুৱাদসুত্তং

১২১. ‘‘চত্তাৰিমানি, ভিক্খৱে, ভযানি. কতমানি চত্তাৰি? অত্তানুৱাদভযং, পৰানুৱাদভযং, দণ্ডভযং, দুগ্গতিভযং.

‘‘কতমঞ্চ, ভিক্খৱে, অত্তানুৱাদভযং? ইধ, ভিক্খৱে, একচ্চো ইতি পটিসঞ্চিক্খতি – ‘অহঞ্চেৱ [অহঞ্চে (?)] খো পন কাযেন দুচ্চৰিতং চৰেয্যং, ৱাচায দুচ্চৰিতং চৰেয্যং, মনসা দুচ্চৰিতং চৰেয্যং, কিঞ্চ তং যং মং [কিঞ্চ তং মং (সী.), কিঞ্চ মং (স্যা. কং.), কিঞ্চ তং কম্মং (পী. ক.)] অত্তা সীলতো ন উপৱদেয্যা’তি! সো অত্তানুৱাদভযস্স ভীতো কাযদুচ্চৰিতং পহায কাযসুচৰিতং ভাৱেতি, ৱচীদুচ্চৰিতং পহায ৱচীসুচৰিতং ভাৱেতি, মনোদুচ্চৰিতং পহায মনোসুচৰিতং ভাৱেতি, সুদ্ধং অত্তানং পৰিহৰতি. ইদং ৱুচ্চতি, ভিক্খৱে, অত্তানুৱাদভযং.

‘‘কতমঞ্চ, ভিক্খৱে, পৰানুৱাদভযং? ইধ, ভিক্খৱে, একচ্চো ইতি পটিসঞ্চিক্খতি – ‘অহঞ্চেৱ খো পন কাযেন দুচ্চৰিতং চৰেয্যং, ৱাচায দুচ্চৰিতং চৰেয্যং, মনসা দুচ্চৰিতং চৰেয্যং, কিঞ্চ তং যং মং পৰে সীলতো ন উপৱদেয্যু’ন্তি! সো পৰানুৱাদভযস্স ভীতো কাযদুচ্চৰিতং পহায কাযসুচৰিতং ভাৱেতি, ৱচীদুচ্চৰিতং পহায ৱচীসুচৰিতং ভাৱেতি, মনোদুচ্চৰিতং পহায মনোসুচৰিতং ভাৱেতি, সুদ্ধং অত্তানং পৰিহৰতি. ইদং ৱুচ্চতি, ভিক্খৱে, পৰানুৱাদভযং.

‘‘কতমঞ্চ, ভিক্খৱে, দণ্ডভযং? ইধ, ভিক্খৱে, একচ্চো পস্সতি চোৰং আগুচাৰিং, ৰাজানো গহেত্ৱা ৱিৱিধা কম্মকাৰণা কাৰেন্তে, কসাহিপি তাড়েন্তে, ৱেত্তেহিপি তাড়েন্তে, অদ্ধদণ্ডকেহিপি তাড়েন্তে, হত্থম্পি ছিন্দন্তে, পাদম্পি ছিন্দন্তে, হত্থপাদম্পি ছিন্দন্তে, কণ্ণম্পি ছিন্দন্তে, নাসম্পি ছিন্দন্তে, কণ্ণনাসম্পি ছিন্দন্তে, বিলঙ্গথালিকম্পি কৰোন্তে, সঙ্খমুণ্ডিকম্পি কৰোন্তে, ৰাহুমুখম্পি কৰোন্তে, জোতিমালিকম্পি কৰোন্তে, হত্থপজ্জোতিকম্পি কৰোন্তে, এৰকৱত্তিকম্পি কৰোন্তে, চীৰকৱাসিকম্পি কৰোন্তে, এণেয্যকম্পি কৰোন্তে, বলিসমংসিকম্পি কৰোন্তে, কহাপণকম্পি কৰোন্তে, খাৰাপতচ্ছিকম্পি কৰোন্তে, পলিঘপৰিৱত্তিকম্পি কৰোন্তে, পলালপীঠকম্পি কৰোন্তে, তত্তেনপি তেলেন ওসিঞ্চন্তে, সুনখেহিপি খাদাপেন্তে, জীৱন্তম্পি সূলে উত্তাসেন্তে, অসিনাপি সীসং ছিন্দন্তে.

‘‘তস্স এৱং হোতি – ‘যথাৰূপানং খো পাপকানং কম্মানং হেতু চোৰং আগুচাৰিং ৰাজানো গহেত্ৱা ৱিৱিধা কম্মকাৰণা কাৰেন্তি, কসাহিপি তাড়েন্তি…পে… অসিনাপি সীসং ছিন্দন্তি, অহঞ্চেৱ খো পন এৱৰূপং পাপকম্মং কৰেয্যং, মম্পি ৰাজানো গহেত্ৱা এৱৰূপা ৱিৱিধা কম্মকাৰণা কাৰেয্যুং, কসাহিপি তাড়েয্যুং, ৱেত্তেহিপি তাড়েয্যুং, অদ্ধদণ্ডকেহিপি তাড়েয্যুং, হত্থম্পি ছিন্দেয্যুং, পাদম্পি ছিন্দেয্যুং, হত্থপাদম্পি ছিন্দেয্যুং, কণ্ণম্পি ছিন্দেয্যুং, নাসম্পি ছিন্দেয্যুং, কণ্ণনাসম্পি ছিন্দেয্যুং, বিলঙ্গথালিকম্পি কৰেয্যুং, সঙ্খমুণ্ডিকম্পি কৰেয্যুং; ৰাহুমুখম্পি কৰেয্যুং, জোতিমালিকম্পি কৰেয্যুং, হত্থপজ্জোতিকম্পি কৰেয্যুং, এৰকৱত্তিকম্পি কৰেয্যুং, চীৰকৱাসিকম্পি কৰেয্যুং, এণেয্যকম্পি কৰেয্যুং, বলিসমংসিকম্পি কৰেয্যুং, কহাপণকম্পি কৰেয্যুং, খাৰাপতচ্ছিকম্পি কৰেয্যুং, পলিঘপৰিৱত্তিকম্পি কৰেয্যুং, পলালপীঠকম্পি কৰেয্যুং, তত্তেনপি তেলেন ওসিঞ্চেয্যুং, সুনখেহিপি খাদাপেয্যুং, জীৱন্তম্পি সূলে উত্তাসেয্যুং, অসিনাপি সীসং ছিন্দেয্যু’ন্তি. সো দণ্ডভযস্স ভীতো ন পৰেসং পাভতং ৱিলুম্পন্তো চৰতি. কাযদুচ্চৰিতং পহায…পে… সুদ্ধং অত্তানং পৰিহৰতি. ইদং ৱুচ্চতি, ভিক্খৱে, দণ্ডভযং.

‘‘কতমঞ্চ, ভিক্খৱে, দুগ্গতিভযং? ইধ, ভিক্খৱে, একচ্চো ইতি পটিসঞ্চিক্খতি – ‘কাযদুচ্চৰিতস্স খো পাপকো ৱিপাকো অভিসম্পৰাযং, ৱচীদুচ্চৰিতস্স পাপকো ৱিপাকো অভিসম্পৰাযং, মনোদুচ্চৰিতস্স পাপকো ৱিপাকো অভিসম্পৰাযং. অহঞ্চেৱ খো পন কাযেন দুচ্চৰিতং চৰেয্যং, ৱাচায দুচ্চৰিতং চৰেয্যং, মনসা দুচ্চৰিতং চৰেয্যং, কিঞ্চ তং যাহং ন কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জেয্য’ন্তি! সো দুগ্গতিভযস্স ভীতো কাযদুচ্চৰিতং পহায কাযসুচৰিতং ভাৱেতি, ৱচীদুচ্চৰিতং পহায ৱচীসুচৰিতং ভাৱেতি, মনোদুচ্চৰিতং পহায মনোসুচৰিতং ভাৱেতি, সুদ্ধং অত্তানং পৰিহৰতি. ইদং ৱুচ্চতি, ভিক্খৱে, দুগ্গতিভযং. ইমানি খো, ভিক্খৱে, চত্তাৰি ভযানী’’তি. পঠমং.