৩. পতোদসুত্তং

১১৩. ‘‘চত্তাৰোমে, ভিক্খৱে, ভদ্ৰা অস্সাজানীযা সন্তো সংৱিজ্জমানা লোকস্মিং. কতমে চত্তাৰো? ইধ, ভিক্খৱে, একচ্চো ভদ্ৰো অস্সাজানীযো পতোদচ্ছাযং দিস্ৱা সংৱিজ্জতি সংৱেগং আপজ্জতি – ‘কিং নু খো মং অজ্জ অস্সদম্মসাৰথি কাৰণং কাৰেস্সতি, কিমস্সাহং [কথমস্সাহং (ক.)] পটিকৰোমী’তি! এৱৰূপোপি, ভিক্খৱে, ইধেকচ্চো ভদ্ৰো অস্সাজানীযো হোতি. অযং, ভিক্খৱে, পঠমো ভদ্ৰো অস্সাজানীযো সন্তো সংৱিজ্জমানো লোকস্মিং.

‘‘পুন চপৰং, ভিক্খৱে, ইধেকচ্চো ভদ্ৰো অস্সাজানীযো ন হেৱ খো পতোদচ্ছাযং দিস্ৱা সংৱিজ্জতি সংৱেগং আপজ্জতি, অপি চ খো লোমৱেধৱিদ্ধো সংৱিজ্জতি সংৱেগং আপজ্জতি – ‘কিং নু খো মং অজ্জ অস্সদম্মসাৰথি কাৰণং কাৰেস্সতি, কিমস্সাহং পটিকৰোমী’তি! এৱৰূপোপি, ভিক্খৱে, ইধেকচ্চো ভদ্ৰো অস্সাজানীযো হোতি. অযং, ভিক্খৱে, দুতিযো ভদ্ৰো অস্সাজানীযো সন্তো সংৱিজ্জমানো লোকস্মিং.

‘‘পুন চপৰং, ভিক্খৱে, ইধেকচ্চো ভদ্ৰো অস্সাজানীযো ন হেৱ খো পতোদচ্ছাযং দিস্ৱা সংৱিজ্জতি সংৱেগং আপজ্জতি নাপি লোমৱেধৱিদ্ধো সংৱিজ্জতি সংৱেগং আপজ্জতি, অপি চ খো চম্মৱেধৱিদ্ধো সংৱিজ্জতি সংৱেগং আপজ্জতি – ‘কিং নু খো মং অজ্জ অস্সদম্মসাৰথি কাৰণং কাৰেস্সতি, কিমস্সাহং পটিকৰোমী’তি! এৱৰূপোপি, ভিক্খৱে, ইধেকচ্চো ভদ্ৰো অস্সাজানীযো হোতি. অযং, ভিক্খৱে, ততিযো ভদ্ৰো অস্সাজানীযো সন্তো সংৱিজ্জমানো লোকস্মিং.

‘‘পুন চপৰং, ভিক্খৱে, ইধেকচ্চো ভদ্ৰো অস্সাজানীযো ন হেৱ খো পতোদচ্ছাযং দিস্ৱা সংৱিজ্জতি সংৱেগং আপজ্জতি নাপি লোমৱেধৱিদ্ধো সংৱিজ্জতি সংৱেগং আপজ্জতি নাপি চম্মৱেধৱিদ্ধো সংৱিজ্জতি সংৱেগং আপজ্জতি, অপি চ খো অট্ঠিৱেধৱিদ্ধো সংৱিজ্জতি সংৱেগং আপজ্জতি – ‘কিং নু খো মং অজ্জ অস্সদম্মসাৰথি কাৰণং কাৰেস্সতি, কিমস্সাহং পটিকৰোমী’তি! এৱৰূপোপি, ভিক্খৱে, ইধেকচ্চো ভদ্ৰো অস্সাজানীযো হোতি. অযং, ভিক্খৱে, চতুত্থো ভদ্ৰো অস্সাজানীযো সন্তো সংৱিজ্জমানো লোকস্মিং. ইমে খো, ভিক্খৱে, চত্তাৰো ভদ্ৰা অস্সাজানীযা সন্তো সংৱিজ্জমানা লোকস্মিং.

‘‘এৱমেৱং খো, ভিক্খৱে, চত্তাৰোমে ভদ্ৰা পুৰিসাজানীযা সন্তো সংৱিজ্জমানা লোকস্মিং. কতমে চত্তাৰো? ইধ, ভিক্খৱে, একচ্চো ভদ্ৰো পুৰিসাজানীযো সুণাতি – ‘অমুকস্মিং নাম গামে ৱা নিগমে ৱা ইত্থী ৱা পুৰিসো ৱা দুক্খিতো ৱা কালঙ্কতো [কালকতো (সী. স্যা. কং. পী.)] ৱা’তি. সো তেন সংৱিজ্জতি, সংৱেগং আপজ্জতি. সংৱিগ্গো যোনিসো পদহতি. পহিতত্তো কাযেন চেৱ পৰমসচ্চং [পৰমত্থসচ্চং (ক.) ম. নি. ২.১৮৩ পস্সিতব্বং] সচ্ছিকৰোতি, পঞ্ঞায চ অতিৱিজ্ঝ পস্সতি. সেয্যথাপি সো, ভিক্খৱে, ভদ্ৰো অস্সাজানীযো পতোদচ্ছাযং দিস্ৱা সংৱিজ্জতি সংৱেগং আপজ্জতি; তথূপমাহং, ভিক্খৱে, ইমং ভদ্ৰং পুৰিসাজানীযং ৱদামি. এৱৰূপোপি, ভিক্খৱে, ইধেকচ্চো ভদ্ৰো পুৰিসাজানীযো হোতি. অযং, ভিক্খৱে, পঠমো ভদ্ৰো পুৰিসাজানীযো সন্তো সংৱিজ্জমানো লোকস্মিং.

‘‘পুন চপৰং, ভিক্খৱে, ইধেকচ্চো ভদ্ৰো পুৰিসাজানীযো ন হেৱ খো সুণাতি – ‘অমুকস্মিং নাম গামে ৱা নিগমে ৱা ইত্থী ৱা পুৰিসো ৱা দুক্খিতো ৱা কালঙ্কতো ৱা’তি, অপি চ খো সামং পস্সতি ইত্থিং ৱা পুৰিসং ৱা দুক্খিতং ৱা কালঙ্কতং ৱা. সো তেন সংৱিজ্জতি, সংৱেগং আপজ্জতি. সংৱিগ্গো যোনিসো পদহতি. পহিতত্তো কাযেন চেৱ পৰমসচ্চং সচ্ছিকৰোতি, পঞ্ঞায চ অতিৱিজ্ঝ পস্সতি. সেয্যথাপি সো, ভিক্খৱে, ভদ্ৰো অস্সাজানীযো লোমৱেধৱিদ্ধো সংৱিজ্জতি সংৱেগং আপজ্জতি; তথূপমাহং, ভিক্খৱে, ইমং ভদ্ৰং পুৰিসাজানীযং ৱদামি. এৱৰূপোপি, ভিক্খৱে, ইধেকচ্চো ভদ্ৰো পুৰিসাজানীযো হোতি. অযং, ভিক্খৱে, দুতিযো ভদ্ৰো পুৰিসাজানীযো সন্তো সংৱিজ্জমানো লোকস্মিং.

‘‘পুন চপৰং, ভিক্খৱে, ইধেকচ্চো ভদ্ৰো পুৰিসাজানীযো ন হেৱ খো সুণাতি – ‘অমুকস্মিং নাম গামে ৱা নিগমে ৱা ইত্থী ৱা পুৰিসো ৱা দুক্খিতো ৱা কালঙ্কতো ৱা’তি, নাপি সামং পস্সতি ইত্থিং ৱা পুৰিসং ৱা দুক্খিতং ৱা কালঙ্কতং ৱা, অপি চ খ্ৱস্স ঞাতি ৱা সালোহিতো ৱা দুক্খিতো ৱা হোতি কালঙ্কতো ৱা. সো তেন সংৱিজ্জতি, সংৱেগং আপজ্জতি. সংৱিগ্গো যোনিসো পদহতি. পহিতত্তো কাযেন চেৱ পৰমসচ্চং সচ্ছিকৰোতি, পঞ্ঞায চ অতিৱিজ্ঝ পস্সতি. সেয্যথাপি সো, ভিক্খৱে, ভদ্ৰো অস্সাজানীযো চম্মৱেধৱিদ্ধো সংৱিজ্জতি সংৱেগং আপজ্জতি; তথূপমাহং, ভিক্খৱে, ইমং ভদ্ৰং পুৰিসাজানীযং ৱদামি. এৱৰূপোপি, ভিক্খৱে, ইধেকচ্চো ভদ্ৰো পুৰিসাজানীযো হোতি. অযং, ভিক্খৱে, ততিযো ভদ্ৰো পুৰিসাজানীযো সন্তো সংৱিজ্জমানো লোকস্মিং.

‘‘পুন চপৰং, ভিক্খৱে, ইধেকচ্চো ভদ্ৰো পুৰিসাজানীযো ন হেৱ খো সুণাতি – ‘অমুকস্মিং নাম গামে ৱা নিগমে ৱা ইত্থী ৱা পুৰিসো ৱা দুক্খিতো ৱা কালঙ্কতো ৱা’তি, নাপি সামং পস্সতি ইত্থিং ৱা পুৰিসং ৱা দুক্খিতং ৱা কালঙ্কতং ৱা, নাপিস্স ঞাতি ৱা সালোহিতো ৱা দুক্খিতো ৱা হোতি কালঙ্কতো ৱা, অপি চ খো সামঞ্ঞেৱ ফুট্ঠো হোতি সাৰীৰিকাহি ৱেদনাহি দুক্খাহি তিব্বাহি [তিপ্পাহি (সী. পী.)] খৰাহি কটুকাহি অসাতাহি অমনাপাহি পাণহৰাহি. সো তেন সংৱিজ্জতি, সংৱেগং আপজ্জতি. সংৱিগ্গো যোনিসো পদহতি. পহিতত্তো কাযেন চেৱ পৰমসচ্চং সচ্ছিকৰোতি, পঞ্ঞায চ অতিৱিজ্ঝ পস্সতি. সেয্যথাপি সো, ভিক্খৱে, ভদ্ৰো অস্সাজানীযো অট্ঠিৱেধৱিদ্ধো সংৱিজ্জতি সংৱেগং আপজ্জতি; তথূপমাহং, ভিক্খৱে, ইমং ভদ্ৰং পুৰিসাজানীযং ৱদামি. এৱৰূপোপি, ভিক্খৱে, ইধেকচ্চো ভদ্ৰো পুৰিসাজানীযো হোতি. অযং, ভিক্খৱে, চতুত্থো ভদ্ৰো পুৰিসাজানীযো সন্তো সংৱিজ্জমানো লোকস্মিং. ইমে খো, ভিক্খৱে, চত্তাৰো ভদ্ৰা পুৰিসাজানীযা সন্তো সংৱিজ্জমানা লোকস্মি’’ন্তি. ততিযং.