১. অসুৰসুত্তং

৯১. ‘‘চত্তাৰোমে, ভিক্খৱে, পুগ্গলা সন্তো সংৱিজ্জমানা লোকস্মিং. কতমে চত্তাৰো? অসুৰো অসুৰপৰিৱাৰো, অসুৰো দেৱপৰিৱাৰো, দেৱো অসুৰপৰিৱাৰো, দেৱো দেৱপৰিৱাৰো.

‘‘কথঞ্চ, ভিক্খৱে, পুগ্গলো অসুৰো হোতি অসুৰপৰিৱাৰো? ইধ, ভিক্খৱে, একচ্চো পুগ্গলো দুস্সীলো হোতি পাপধম্মো, পৰিসাপিস্স হোতি দুস্সীলা পাপধম্মা. এৱং খো, ভিক্খৱে, পুগ্গলো অসুৰো হোতি অসুৰপৰিৱাৰো.

‘‘কথঞ্চ, ভিক্খৱে, পুগ্গলো অসুৰো হোতি দেৱপৰিৱাৰো? ইধ, ভিক্খৱে, একচ্চো পুগ্গলো দুস্সীলো হোতি পাপধম্মো, পৰিসা চ খ্ৱস্স হোতি সীলৱতী কল্যাণধম্মা. এৱং খো, ভিক্খৱে, পুগ্গলো অসুৰো হোতি দেৱপৰিৱাৰো.

‘‘কথঞ্চ, ভিক্খৱে, পুগ্গলো দেৱো হোতি অসুৰপৰিৱাৰো? ইধ, ভিক্খৱে, একচ্চো পুগ্গলো সীলৱা হোতি কল্যাণধম্মো, পৰিসা চ খ্ৱস্স হোতি দুস্সীলা পাপধম্মা. এৱং খো, ভিক্খৱে, পুগ্গলো দেৱো হোতি অসুৰপৰিৱাৰো.

‘‘কথঞ্চ, ভিক্খৱে, পুগ্গলো দেৱো হোতি দেৱপৰিৱাৰো? ইধ, ভিক্খৱে, একচ্চো পুগ্গলো সীলৱা হোতি কল্যাণধম্মো, পৰিসাপিস্স হোতি সীলৱতী কল্যাণধম্মা. এৱং খো, ভিক্খৱে, পুগ্গলো দেৱো হোতি, দেৱপৰিৱাৰো. ইমে খো, ভিক্খৱে, চত্তাৰো পুগ্গলা সন্তো সংৱিজ্জমানা লোকস্মি’’ন্তি. পঠমং.