৭. অহিৰাজসুত্তং

৬৭. একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সাৱত্থিযং অঞ্ঞতৰো ভিক্খু অহিনা দট্ঠো কালঙ্কতো হোতি. অথ খো সম্বহুলা ভিক্খূ যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘ইধ, ভন্তে, সাৱত্থিযং অঞ্ঞতৰো ভিক্খু অহিনা দট্ঠো কালঙ্কতো’’তি.

‘‘ন হি নূন [ন হ নূন (সী. স্যা. কং. পী.)] সো, ভিক্খৱে, ভিক্খু চত্তাৰি অহিৰাজকুলানি মেত্তেন চিত্তেন ফৰি. সচে হি সো, ভিক্খৱে, ভিক্খু চত্তাৰি অহিৰাজকুলানি মেত্তেন চিত্তেন ফৰেয্য, ন হি সো, ভিক্খৱে, ভিক্খু অহিনা দট্ঠো কালঙ্কৰেয্য.

‘‘কতমানি চত্তাৰি? ৱিৰূপক্খং অহিৰাজকুলং, এৰাপথং অহিৰাজকুলং, ছব্যাপুত্তং অহিৰাজকুলং, কণ্হাগোতমকং অহিৰাজকুলং. ন হি নূন সো, ভিক্খৱে, ভিক্খু ইমানি চত্তাৰি অহিৰাজকুলানি মেত্তেন চিত্তেন ফৰি. সচে হি সো, ভিক্খৱে, ভিক্খু ইমানি চত্তাৰি অহিৰাজকুলানি মেত্তেন চিত্তেন ফৰেয্য, ন হি সো, ভিক্খৱে, ভিক্খু অহিনা দট্ঠো কালঙ্কৰেয্য.

‘‘অনুজানামি, ভিক্খৱে, ইমানি চত্তাৰি অহিৰাজকুলানি মেত্তেন চিত্তেন ফৰিতুং অত্তগুত্তিযা অত্তৰক্খায অত্তপৰিত্তাযা’’তি.

[চূড়ৱ. ২৫১; জা. ১.২.১০৫ পস্সিতব্বং] ‘‘ৱিৰূপক্খেহি মে মেত্তং, মেত্তং এৰাপথেহি মে;

ছব্যাপুত্তেহি মে মেত্তং, মেত্তং কণ্হাগোতমকেহি চ.

‘‘অপাদকেহি মে মেত্তং, মেত্তং দ্ৱিপাদকেহি [দিপাদকেহি (সী. স্যা. কং. পী.)] মে;

চতুপ্পদেহি মে মেত্তং, মেত্তং বহুপ্পদেহি মে.

‘‘মা মং অপাদকো হিংসি, মা মং হিংসি দ্ৱিপাদকো [দিপাদকো (সী. স্যা. কং. পী.)];

মা মং চতুপ্পদো হিংসি, মা মং হিংসি বহুপ্পদো.

‘‘সব্বে সত্তা সব্বে পাণা, সব্বে ভূতা চ কেৱলা;

সব্বে ভদ্ৰানি পস্সন্তু, মা কঞ্চি [কিঞ্চি (স্যা. কং. ক.)] পাপমাগমা.

‘‘অপ্পমাণো বুদ্ধো, অপ্পমাণো ধম্মো;

অপ্পমাণো সঙ্ঘো, পমাণৱন্তানি সৰীসপানি [সিৰিংসপানি (সী. স্যা. কং. পী.)].

‘‘অহিৱিচ্ছিকা সতপদী, উণ্ণনাভী সৰবূ মূসিকা;

কতা মে ৰক্খা কতা মে পৰিত্তা [কতং মে পৰিত্তং (?)], পটিক্কমন্তু ভূতানি;

সোহং নমো ভগৱতো, নমো সত্তন্নং সম্মাসম্বুদ্ধান’’ন্তি. সত্তমং;