২. আনণ্যসুত্তং

৬২. অথ খো অনাথপিণ্ডিকো গহপতি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো অনাথপিণ্ডিকং গহপতিং ভগৱা এতদৱোচ –

‘‘চত্তাৰিমানি, গহপতি, সুখানি অধিগমনীযানি গিহিনা কামভোগিনা কালেন কালং সমযেন সমযং উপাদায. কতমানি চত্তাৰি? অত্থিসুখং, ভোগসুখং, আনণ্যসুখং [অণণসুখং (সী. স্যা. কং. পী.)], অনৱজ্জসুখং.

‘‘কতমঞ্চ, গহপতি, অত্থিসুখং? ইধ, গহপতি, কুলপুত্তস্স ভোগা হোন্তি উট্ঠানৱীৰিযাধিগতা বাহাবলপৰিচিতা সেদাৱক্খিত্তা ধম্মিকা ধম্মলদ্ধা. সো ‘ভোগা মে অত্থি উট্ঠানৱীৰিযাধিগতা বাহাবলপৰিচিতা সেদাৱক্খিত্তা ধম্মিকা ধম্মলদ্ধা’তি অধিগচ্ছতি সুখং, অধিগচ্ছতি সোমনস্সং. ইদং ৱুচ্চতি, গহপতি, অত্থিসুখং.

‘‘কতমঞ্চ, গহপতি, ভোগসুখং? ইধ, গহপতি, কুলপুত্তো উট্ঠানৱীৰিযাধিগতেহি ভোগেহি বাহাবলপৰিচিতেহি সেদাৱক্খিত্তেহি ধম্মিকেহি ধম্মলদ্ধেহি পৰিভুঞ্জতি পুঞ্ঞানি চ কৰোতি. সো ‘উট্ঠানৱীৰিযাধিগতেহি ভোগেহি বাহাবলপৰিচিতেহি সেদাৱক্খিত্তেহি ধম্মিকেহি ধম্মলদ্ধেহি পৰিভুঞ্জামি পুঞ্ঞানি চ কৰোমী’তি অধিগচ্ছতি সুখং, অধিগচ্ছতি সোমনস্সং. ইদং ৱুচ্চতি, গহপতি, ভোগসুখং.

‘‘কতমঞ্চ, গহপতি, আনণ্যসুখং? ইধ, গহপতি, কুলপুত্তো ন কস্সচি কিঞ্চি ধাৰেতি অপ্পং ৱা বহুং ৱা. সো ‘ন কস্সচি কিঞ্চি ধাৰেমি [কিঞ্চি ৱা দেতি (ক.)] অপ্পং ৱা বহুং ৱা’তি অধিগচ্ছতি সুখং, অধিগচ্ছতি সোমনস্সং. ইদং ৱুচ্চতি, গহপতি, আনণ্যসুখং.

‘‘কতমঞ্চ, গহপতি, অনৱজ্জসুখং? ইধ, গহপতি, অৰিযসাৱকো অনৱজ্জেন কাযকম্মেন সমন্নাগতো হোতি, অনৱজ্জেন ৱচীকম্মেন সমন্নাগতো হোতি, অনৱজ্জেন মনোকম্মেন সমন্নাগতো হোতি. সো ‘অনৱজ্জেনম্হি কাযকম্মেন সমন্নাগতো, অনৱজ্জেন ৱচীকম্মেন সমন্নাগতো, অনৱজ্জেন মনোকম্মেন সমন্নাগতো’তি অধিগচ্ছতি সুখং, অধিগচ্ছতি সোমনস্সং. ইদং ৱুচ্চতি, গহপতি, অনৱজ্জসুখং. ইমানি খো, গহপতি, চত্তাৰি সুখানি অধিগমনীযানি গিহিনা কামভোগিনা কালেন কালং সমযেন সমযং উপাদাযা’’তি.

‘‘আনণ্যসুখং ঞত্ৱান, অথো অত্থিসুখং পৰং;

ভুঞ্জং ভোগসুখং মচ্চো, ততো পঞ্ঞা ৱিপস্সতি.

‘‘ৱিপস্সমানো জানাতি, উভো ভোগে সুমেধসো;

অনৱজ্জসুখস্সেতং, কলং নাগ্ঘতি সোড়সি’’ন্তি. দুতিযং;