৯. উজ্জযসুত্তং

৩৯. অথ খো উজ্জযো ব্ৰাহ্মণো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো উজ্জযো ব্ৰাহ্মণো ভগৱন্তং এতদৱোচ – ‘‘ভৱম্পি নো গোতমো যঞ্ঞং ৱণ্ণেতী’’তি? ‘‘ন খো অহং, ব্ৰাহ্মণ, সব্বং যঞ্ঞং ৱণ্ণেমি; ন পনাহং, ব্ৰাহ্মণ, সব্বং যঞ্ঞং ন ৱণ্ণেমি. যথাৰূপে খো, ব্ৰাহ্মণ, যঞ্ঞে গাৱো হঞ্ঞন্তি, অজেড়কা হঞ্ঞন্তি, কুক্কুটসূকৰা হঞ্ঞন্তি, ৱিৱিধা পাণা সঙ্ঘাতং আপজ্জন্তি; এৱৰূপং খো অহং, ব্ৰাহ্মণ, সাৰম্ভং যঞ্ঞং ন ৱণ্ণেমি. তং কিস্স হেতু? এৱৰূপঞ্হি, ব্ৰাহ্মণ, সাৰম্ভং যঞ্ঞং ন উপসঙ্কমন্তি অৰহন্তো ৱা অৰহত্তমগ্গং ৱা সমাপন্না.

‘‘যথাৰূপে চ খো, ব্ৰাহ্মণ, যঞ্ঞে নেৱ গাৱো হঞ্ঞন্তি, ন অজেড়কা হঞ্ঞন্তি, ন কুক্কুটসূকৰা হঞ্ঞন্তি, ন ৱিৱিধা পাণা সঙ্ঘাতং আপজ্জন্তি; এৱৰূপং খো অহং, ব্ৰাহ্মণ, নিৰাৰম্ভং যঞ্ঞং ৱণ্ণেমি, যদিদং নিচ্চদানং অনুকুলযঞ্ঞং. তং কিস্স হেতু? এৱৰূপঞ্হি, ব্ৰাহ্মণ, নিৰাৰম্ভং যঞ্ঞং উপসঙ্কমন্তি অৰহন্তো ৱা অৰহত্তমগ্গং ৱা সমাপন্না’’তি.

‘‘অস্সমেধং পুৰিসমেধং, সম্মাপাসং ৱাজপেয্যং নিৰগ্গড়ং;

মহাযঞ্ঞা মহাৰম্ভা [সম্মাপাসং ৱাজপেয্যং; নিৰগ্গড়ং মহাৰম্ভা (পী.) সং. নি. ১.১২০], ন তে হোন্তি মহপ্ফলা.

‘‘অজেড়কা চ গাৱো চ, ৱিৱিধা যত্থ হঞ্ঞৰে;

ন তং সম্মগ্গতা যঞ্ঞং, উপযন্তি মহেসিনো.

‘‘যে চ যঞ্ঞা নিৰাৰম্ভা, যজন্তি অনুকুলং সদা;

অজেড়কা চ গাৱো চ, ৱিৱিধা নেত্থ হঞ্ঞৰে [নাজেড়কা চ গাৱো চ, ৱিৱিধা যত্থ হঞ্ঞৰে (স্যা. কং.)];

তঞ্চ সম্মগ্গতা যঞ্ঞং, উপযন্তি মহেসিনো.

‘‘এতং [এৱং (স্যা. কং.)] যজেথ মেধাৱী, এসো যঞ্ঞো মহপ্ফলো;

এতং [এৱং (স্যা. কং. ক.)] হি যজমানস্স, সেয্যো হোতি ন পাপিযো;

যঞ্ঞো চ ৱিপুলো হোতি, পসীদন্তি চ দেৱতা’’তি. নৱমং;