১০. উদাযীসুত্তং

৪০. অথ খো উদাযী [উদাযি (সব্বত্থ)] ব্ৰাহ্মণো যেন ভগৱা তেনুপসঙ্কমি; উপসঙ্কমিত্ৱা ভগৱতা …পে… একমন্তং নিসিন্নো খো উদাযী ব্ৰাহ্মণো ভগৱন্তং এতদৱোচ – ‘‘ভৱম্পি নো গোতমো যঞ্ঞং ৱণ্ণেতী’’তি? ‘‘ন খো অহং, ব্ৰাহ্মণ, সব্বং যঞ্ঞং ৱণ্ণেমি; ন পনাহং, ব্ৰাহ্মণ, সব্বং যঞ্ঞং ন ৱণ্ণেমি. যথাৰূপে খো, ব্ৰাহ্মণ, যঞ্ঞে গাৱো হঞ্ঞন্তি, অজেড়কা হঞ্ঞন্তি, কুক্কুটসূকৰা হঞ্ঞন্তি, ৱিৱিধা পাণা সঙ্ঘাতং আপজ্জন্তি; এৱৰূপং খো অহং, ব্ৰাহ্মণ, সাৰম্ভং যঞ্ঞং ন ৱণ্ণেমি. তং কিস্স হেতু? এৱৰূপঞ্হি, ব্ৰাহ্মণ, সাৰম্ভং যঞ্ঞং ন উপসঙ্কমন্তি অৰহন্তো ৱা অৰহত্তমগ্গং ৱা সমাপন্না.

‘‘যথাৰূপে চ খো, ব্ৰাহ্মণ, যঞ্ঞে নেৱ গাৱো হঞ্ঞন্তি, ন অজেড়কা হঞ্ঞন্তি, ন কুক্কুটসূকৰা হঞ্ঞন্তি, ন ৱিৱিধা পাণা সঙ্ঘাতং আপজ্জন্তি; এৱৰূপং খো অহং, ব্ৰাহ্মণ, নিৰাৰম্ভং যঞ্ঞং ৱণ্ণেমি, যদিদং নিচ্চদানং অনুকুলযঞ্ঞং. তং কিস্স হেতু? এৱৰূপঞ্হি, ব্ৰাহ্মণ, নিৰাৰম্ভং যঞ্ঞং উপসঙ্কমন্তি অৰহন্তো ৱা অৰহত্তমগ্গং ৱা সমাপন্না’’তি.

‘‘অভিসঙ্খতং নিৰাৰম্ভং, যঞ্ঞং কালেন কপ্পিযং;

তাদিসং উপসংযন্তি, সঞ্ঞতা ব্ৰহ্মচাৰযো.

‘‘ৱিৱটচ্ছদা [ৱিৱত্তচ্ছদা (সী. পী.), ৱিৱট্টচ্ছদা (ক.)] যে লোকে, ৱীতিৱত্তা কুলং গতিং;

যঞ্ঞমেতং পসংসন্তি, বুদ্ধা যঞ্ঞস্স [পুঞ্ঞস্স (স্যা. কং. পী.)] কোৱিদা.

‘‘যঞ্ঞে ৱা যদি ৱা সদ্ধে, হব্যং [হৱ্যং (সী. পী.), হুঞ্ঞং (স্যা. কং.)] কত্ৱা যথাৰহং;

পসন্নচিত্তো যজতি [পসন্নচিত্তা যজন্তি (ক.)], সুখেত্তে ব্ৰহ্মচাৰিসু.

‘‘সুহুতং সুযিট্ঠং সুপ্পত্তং [সম্পত্তং (স্যা. কং. ক.)], দক্খিণেয্যেসু যং কতং;

যঞ্ঞো চ ৱিপুলো হোতি, পসীদন্তি চ দেৱতা.

‘‘এৱং [এতং (ক.) অ. নি. ৬.৩৭] যজিত্ৱা মেধাৱী, সদ্ধো মুত্তেন চেতসা;

অব্যাবজ্ঝং সুখং লোকং, পণ্ডিতো উপপজ্জতী’’তি. দসমং;

চক্কৱগ্গো চতুত্থো.