৮. পতিলীনসুত্তং

৩৮. ‘‘পনুণ্ণপচ্চেকসচ্চো [পণুন্নপচ্চেকসচ্চো (?)], ভিক্খৱে, ভিক্খু ‘সমৱযসট্ঠেসনো পস্সদ্ধকাযসঙ্খাৰো পতিলীনো’তি ৱুচ্চতি. কথঞ্চ, ভিক্খৱে, ভিক্খু পনুণ্ণপচ্চেকসচ্চো হোতি? ইধ, ভিক্খৱে, ভিক্খুনো যানি তানি পুথুসমণব্ৰাহ্মণানং পুথুপচ্চেকসচ্চানি, সেয্যথিদং – সস্সতো লোকোতি ৱা, অসস্সতো লোকোতি ৱা, অন্তৱা লোকোতি ৱা, অনন্তৱা লোকোতি ৱা, তং জীৱং তং সৰীৰন্তি ৱা, অঞ্ঞং জীৱং অঞ্ঞং সৰীৰন্তি ৱা, হোতি তথাগতো পৰং মৰণাতি ৱা, ন হোতি তথাগতো পৰং মৰণাতি ৱা, হোতি চ ন চ হোতি তথাগতো পৰং মৰণাতি ৱা, নেৱ হোতি ন ন হোতি তথাগতো পৰং মৰণাতি ৱা; সব্বানি তানি নুণ্ণানি হোন্তি পনুণ্ণানি চত্তানি ৱন্তানি মুত্তানি পহীনানি পটিনিস্সট্ঠানি. এৱং খো, ভিক্খৱে, ভিক্খু পনুণ্ণপচ্চেকসচ্চো হোতি.

‘‘কথঞ্চ, ভিক্খৱে, ভিক্খু সমৱযসট্ঠেসনো হোতি? ইধ, ভিক্খৱে, ভিক্খুনো কামেসনা পহীনা হোতি, ভৱেসনা পহীনা হোতি, ব্ৰহ্মচৰিযেসনা পটিপ্পস্সদ্ধা. এৱং খো, ভিক্খৱে, ভিক্খু সমৱযসট্ঠেসনো হোতি.

‘‘কথঞ্চ, ভিক্খৱে, ভিক্খু পস্সদ্ধকাযসঙ্খাৰো হোতি? ইধ, ভিক্খৱে, ভিক্খু সুখস্স চ পহানা দুক্খস্স চ পহানা পুব্বেৱ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহৰতি. এৱং খো, ভিক্খৱে, ভিক্খু পস্সদ্ধকাযসঙ্খাৰো হোতি.

‘‘কথঞ্চ, ভিক্খৱে, ভিক্খু পতিলীনো হোতি? ইধ, ভিক্খৱে, ভিক্খুনো অস্মিমানো পহীনো হোতি উচ্ছিন্নমূলো তালাৱত্থুকতো অনভাৱংকতো আযতিং অনুপ্পাদধম্মো. এৱং খো, ভিক্খৱে, ভিক্খু পতিলীনো হোতি. পনুণ্ণপচ্চেকসচ্চো, ভিক্খৱে, ভিক্খু ‘সমৱযসট্ঠেসনো পস্সদ্ধকাযসঙ্খাৰো পতিলীনো’তি ৱুচ্চতী’’তি.

[ইতিৱু. ৫৫ ইতিৱুত্তকেপি] ‘‘কামেসনা ভৱেসনা, ব্ৰহ্মচৰিযেসনা সহ;

ইতি সচ্চপৰামাসো, দিট্ঠিট্ঠানা সমুস্সযা.

[ইতিৱু. ৫৫ ইতিৱুত্তকেপি] ‘‘সব্বৰাগৱিৰত্তস্স, তণ্হক্খযৱিমুত্তিনো;

এসনা পটিনিস্সট্ঠা, দিট্ঠিট্ঠানা সমূহতা.

‘‘স ৱে সন্তো সতো ভিক্খু, পস্সদ্ধো অপৰাজিতো;

মানাভিসমযা বুদ্ধো, পতিলীনোতি ৱুচ্চতী’’তি. অট্ঠমং;