৪. অগ্গপ্পসাদসুত্তং

৩৪. ‘‘চত্তাৰোমে, ভিক্খৱে, অগ্গপ্পসাদা. কতমে চত্তাৰো? যাৱতা, ভিক্খৱে, সত্তা অপদা ৱা দ্ৱিপদা [দিপদা (সী. পী.) অ. নি. ৫.৩২; ইতিৱু. ৯০] ৱা চতুপ্পদা ৱা বহুপ্পদা ৱা ৰূপিনো ৱা অৰূপিনো ৱা সঞ্ঞিনো ৱা অসঞ্ঞিনো ৱা নেৱসঞ্ঞিনাসঞ্ঞিনো ৱা, তথাগতো তেসং অগ্গমক্খাযতি অৰহং সম্মাসম্বুদ্ধো. যে, ভিক্খৱে, বুদ্ধে পসন্না, অগ্গে তে পসন্না. অগ্গে খো পন পসন্নানং অগ্গো ৱিপাকো হোতি.

‘‘যাৱতা, ভিক্খৱে, ধম্মা সঙ্খতা, অৰিযো অট্ঠঙ্গিকো মগ্গো তেসং অগ্গমক্খাযতি. যে, ভিক্খৱে, অৰিযে অট্ঠঙ্গিকে মগ্গে পসন্না, অগ্গে তে পসন্না. অগ্গে খো পন পসন্নানং অগ্গো ৱিপাকো হোতি.

‘‘যাৱতা, ভিক্খৱে, ধম্মা সঙ্খতা ৱা অসঙ্খতা ৱা, ৱিৰাগো তেসং অগ্গমক্খাযতি, যদিদং মদনিম্মদনো পিপাসৱিনযো আলযসমুগ্ঘাতো ৱট্টুপচ্ছেদো তণ্হাক্খযো ৱিৰাগো নিৰোধো নিব্বানং. যে, ভিক্খৱে, ৱিৰাগে ধম্মে পসন্না, অগ্গে তে পসন্না. অগ্গে খো পন পসন্নানং অগ্গো ৱিপাকো হোতি.

‘‘যাৱতা, ভিক্খৱে, সঙ্ঘা ৱা গণা ৱা, তথাগতসাৱকসঙ্ঘো তেসং অগ্গমক্খাযতি, যদিদং চত্তাৰি পুৰিসযুগানি অট্ঠ পুৰিসপুগ্গলা এস ভগৱতো সাৱকসঙ্ঘো আহুনেয্যো পাহুনেয্যো দক্খিণেয্যো অঞ্জলিকৰণীযো অনুত্তৰং পুঞ্ঞক্খেত্তং লোকস্স. যে, ভিক্খৱে, সঙ্ঘে পসন্না, অগ্গে তে পসন্না. অগ্গে খো পন পসন্নানং অগ্গো ৱিপাকো হোতি. ইমে খো, ভিক্খৱে, চত্তাৰো অগ্গপ্পসাদা’’তি.

‘‘অগ্গতো ৱে পসন্নানং, অগ্গং ধম্মং ৱিজানতং;

অগ্গে বুদ্ধে পসন্নানং, দক্খিণেয্যে অনুত্তৰে.

‘‘অগ্গে ধম্মে পসন্নানং, ৱিৰাগূপসমে সুখে;

অগ্গে সঙ্ঘে পসন্নানং, পুঞ্ঞক্খেত্তে অনুত্তৰে.

‘‘অগ্গস্মিং দানং দদতং, অগ্গং পুঞ্ঞং পৱড্ঢতি;

অগ্গং আযু চ ৱণ্ণো চ, যসো কিত্তি সুখং বলং.

‘‘অগ্গস্স দাতা মেধাৱী, অগ্গধম্মসমাহিতো;

দেৱভূতো মনুস্সো ৱা, অগ্গপ্পত্তো পমোদতী’’তি [ইতিৱু. ৯০]. চতুত্থং;