৪. দুতিযখতসুত্তং

৪. ‘‘চতূসু, ভিক্খৱে, মিচ্ছা পটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেসু চতূসু? মাতৰি, ভিক্খৱে, মিচ্ছা পটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. পিতৰি, ভিক্খৱে, মিচ্ছা পটিপজ্জমানো…পে… তথাগতে, ভিক্খৱে, মিচ্ছা পটিপজ্জমানো…পে… তথাগতসাৱকে, ভিক্খৱে, মিচ্ছা পটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. ইমেসু খো, ভিক্খৱে, চতূসু মিচ্ছা পটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি.

‘‘চতূসু, ভিক্খৱে, সম্মা পটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেসু চতূসু? মাতৰি, ভিক্খৱে, সম্মা পটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. পিতৰি, ভিক্খৱে, সম্মা পটিপজ্জমানো…পে… তথাগতে, ভিক্খৱে, সম্মা পটিপজ্জমানো…পে… তথাগতসাৱকে, ভিক্খৱে, সম্মা পটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. ইমেসু খো, ভিক্খৱে, চতূসু সম্মা পটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

‘‘মাতৰি পিতৰি চাপি, যো মিচ্ছা পটিপজ্জতি;

তথাগতে ৱা সম্বুদ্ধে, অথ ৱা তস্স সাৱকে;

বহুঞ্চ সো পসৱতি, অপুঞ্ঞং তাদিসো নৰো.

‘‘তায নং অধম্মচৰিযায [তায অধম্মচৰিযায (সী. স্যা. কং. পী.)], মাতাপিতূসু পণ্ডিতা;

ইধেৱ নং গৰহন্তি, পেচ্চাপাযঞ্চ গচ্ছতি.

‘‘মাতৰি পিতৰি চাপি, যো সম্মা পটিপজ্জতি;

তথাগতে ৱা সম্বুদ্ধে, অথ ৱা তস্স সাৱকে;

বহুঞ্চ সো পসৱতি, পুঞ্ঞং এতাদিসো [পুঞ্ঞম্পি তাদিসো (সী. স্যা. কং.)] নৰো.

‘‘তায নং ধম্মচৰিযায, মাতাপিতূসু পণ্ডিতা;

ইধেৱ [ইধ চেৱ (সী.)] নং পসংসন্তি, পেচ্চ সগ্গে পমোদতী’’তি [সগ্গে চ মোদতীতি (সী.)]. চতুত্থং;