৫. অনুসোতসুত্তং

৫. ‘‘চত্তাৰোমে, ভিক্খৱে, পুগ্গলা সন্তো সংৱিজ্জমানা লোকস্মিং. কতমে চত্তাৰো? অনুসোতগামী পুগ্গলো, পটিসোতগামী পুগ্গলো, ঠিতত্তো পুগ্গলো, তিণ্ণো পাৰঙ্গতো [পাৰগতো (সী. স্যা. কং.)] থলে তিট্ঠতি ব্ৰাহ্মণো. কতমো চ, ভিক্খৱে, অনুসোতগামী পুগ্গলো? ইধ, ভিক্খৱে, একচ্চো পুগ্গলো কামে চ পটিসেৱতি, পাপঞ্চ কম্মং কৰোতি. অযং ৱুচ্চতি, ভিক্খৱে, অনুসোতগামী পুগ্গলো.

‘‘কতমো চ, ভিক্খৱে, পটিসোতগামী পুগ্গলো? ইধ, ভিক্খৱে, একচ্চো পুগ্গলো কামে চ নপ্পটিসেৱতি, পাপঞ্চ কম্মং ন কৰোতি, সহাপি দুক্খেন সহাপি দোমনস্সেন অস্সুমুখোপি ৰুদমানো পৰিপুণ্ণং পৰিসুদ্ধং ব্ৰহ্মচৰিযং চৰতি. অযং ৱুচ্চতি, ভিক্খৱে, পটিসোতগামী পুগ্গলো.

‘‘কতমো চ, ভিক্খৱে, ঠিতত্তো পুগ্গলো? ইধ, ভিক্খৱে, একচ্চো পুগ্গলো পঞ্চন্নং ওৰম্ভাগিযানং সংযোজনানং পৰিক্খযা ওপপাতিকো হোতি, তত্থ পৰিনিব্বাযী, অনাৱত্তিধম্মো তস্মা লোকা. অযং ৱুচ্চতি, ভিক্খৱে, ঠিতত্তো পুগ্গলো.

‘‘কতমো চ, ভিক্খৱে, পুগ্গলো তিণ্ণো পাৰঙ্গতো থলে তিট্ঠতি ব্ৰাহ্মণো? ইধ, ভিক্খৱে, একচ্চো পুগ্গলো আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. অযং ৱুচ্চতি, ভিক্খৱে, পুগ্গলো তিণ্ণো পাৰঙ্গতো থলে তিট্ঠতি ব্ৰাহ্মণো. ইমে খো, ভিক্খৱে, চত্তাৰো পুগ্গলা সন্তো সংৱিজ্জমানা লোকস্মি’’ন্তি.

‘‘যে কেচি কামেসু অসঞ্ঞতা জনা,

অৱীতৰাগা ইধ কামভোগিনো;

পুনপ্পুনং জাতিজৰূপগামি তে [জাতিজৰূপগাহিনো (সী.), জাতিজৰূপগা হি তে (স্যা. কং.)],

তণ্হাধিপন্না অনুসোতগামিনো.

‘‘তস্মা হি ধীৰো ইধুপট্ঠিতস্সতী,

কামে চ পাপে চ অসেৱমানো;

সহাপি দুক্খেন জহেয্য কামে,

পটিসোতগামীতি তমাহু পুগ্গলং.

‘‘যো ৱে কিলেসানি পহায পঞ্চ,

পৰিপুণ্ণসেখো অপৰিহানধম্মো;

চেতোৱসিপ্পত্তো সমাহিতিন্দ্ৰিযো,

স ৱে ঠিতত্তোতি নৰো পৱুচ্চতি.

‘‘পৰোপৰা যস্স সমেচ্চ ধম্মা,

ৱিধূপিতা অত্থগতা ন সন্তি;

স ৱে মুনি [স ৱেদগূ (সী. স্যা. কং. পী.)] ৱুসিতব্ৰহ্মচৰিযো,

লোকন্তগূ পাৰগতোতি ৱুচ্চতী’’তি. পঞ্চমং;