(১৫) ৫. মঙ্গলৱগ্গো

১. অকুসলসুত্তং

১৪৭. ‘‘তীহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি তীহি? অকুসলেন কাযকম্মেন, অকুসলেন ৱচীকম্মেন, অকুসলেন মনোকম্মেন – ইমেহি খো, ভিক্খৱে, তীহি ধম্মেহি সমন্নাগতো যথাভতং নিক্খিত্তো এৱং নিৰযে.

‘‘তীহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি তীহি? কুসলেন কাযকম্মেন, কুসলেন ৱচীকম্মেন, কুসলেন মনোকম্মেন – ইমেহি খো, ভিক্খৱে, তীহি ধম্মেহি সমন্নাগতো যথাভতং নিক্খিত্তো এৱং সগ্গে’’তি. পঠমং.

২. সাৱজ্জসুত্তং

১৪৮. ‘‘তীহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি তীহি? সাৱজ্জেন কাযকম্মেন, সাৱজ্জেন ৱচীকম্মেন, সাৱজ্জেন মনোকম্মেন – ইমেহি খো, ভিক্খৱে, তীহি ধম্মেহি সমন্নাগতো যথাভতং নিক্খিত্তো এৱং নিৰযে.

‘‘তীহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি তীহি? অনৱজ্জেন কাযকম্মেন, অনৱজ্জেন ৱচীকম্মেন, অনৱজ্জেন মনোকম্মেন – ইমেহি খো…পে… এৱং সগ্গে’’তি. দুতিযং.

৩. ৱিসমসুত্তং

১৪৯. ‘‘তীহি, ভিক্খৱে…পে… ৱিসমেন কাযকম্মেন, ৱিসমেন ৱচীকম্মেন, ৱিসমেন মনোকম্মেন – ইমেহি খো…পে… এৱং নিৰযে.

‘‘তীহি, ভিক্খৱে, ধম্মেহি…পে… সমেন কাযকম্মেন, সমেন ৱচীকম্মেন, সমেন মনোকম্মেন – ইমেহি খো…পে… এৱং সগ্গে’’তি. ততিযং.

৪. অসুচিসুত্তং

১৫০. ‘‘তীহি, ভিক্খৱে…পে… অসুচিনা কাযকম্মেন, অসুচিনা ৱচীকম্মেন, অসুচিনা মনোকম্মেন – ইমেহি খো…পে… এৱং নিৰযে.

‘‘তীহি, ভিক্খৱে…পে… সুচিনা কাযকম্মেন, সুচিনা ৱচীকম্মেন, সুচিনা মনোকম্মেন – ইমেহি খো, ভিক্খৱে, তীহি ধম্মেহি সমন্নাগতো যথাভতং নিক্খিত্তো এৱং সগ্গে’’তি. চতুত্থং.

৫. পঠমখতসুত্তং

১৫১. ‘‘তীহি, ভিক্খৱে, ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেহি তীহি? অকুসলেন কাযকম্মেন, অকুসলেন ৱচীকম্মেন, অকুসলেন মনোকম্মেন – ইমেহি খো, ভিক্খৱে, তীহি ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি.

‘‘তীহি, ভিক্খৱে, ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেহি তীহি? কুসলেন কাযকম্মেন, কুসলেন ৱচীকম্মেন, কুসলেন মনোকম্মেন…পে…. পঞ্চমং.

৬. দুতিযখতসুত্তং

১৫২. ‘‘তীহি, ভিক্খৱে…পে… সাৱজ্জেন কাযকম্মেন, সাৱজ্জেন ৱচীকম্মেন, সাৱজ্জেন মনোকম্মেন…পে….

‘‘তীহি, ভিক্খৱে…পে… অনৱজ্জেন কাযকম্মেন, অনৱজ্জেন ৱচীকম্মেন, অনৱজ্জেন মনোকম্মেন…পে…. ছট্ঠং.

৭. ততিযখতসুত্তং

১৫৩. ‘‘তীহি, ভিক্খৱে…পে… ৱিসমেন কাযকম্মেন, ৱিসমেন ৱচীকম্মেন, ৱিসমেন মনোকম্মেন…পে….

‘‘তীহি, ভিক্খৱে…পে… সমেন কাযকম্মেন, সমেন ৱচীকম্মেন, সমেন মনোকম্মেন…পে…. সত্তমং.

৮. চতুত্থখতসুত্তং

১৫৪. ‘‘তীহি, ভিক্খৱে…পে… অসুচিনা কাযকম্মেন, অসুচিনা ৱচীকম্মেন, অসুচিনা মনোকম্মেন…পে….

‘‘তীহি, ভিক্খৱে…পে… সুচিনা কাযকম্মেন, সুচিনা ৱচীকম্মেন, সুচিনা মনোকম্মেন – ইমেহি খো, ভিক্খৱে, তীহি ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি. অট্ঠমং.

৯. ৱন্দনাসুত্তং

১৫৫. ‘‘তিস্সো ইমা, ভিক্খৱে, ৱন্দনা. কতমা তিস্সো? কাযেন, ৱাচায, মনসা – ইমা খো, ভিক্খৱে, তিস্সো ৱন্দনা’’তি. নৱমং.

১০. পুব্বণ্হসুত্তং

১৫৬. ‘‘যে, ভিক্খৱে, সত্তা পুব্বণ্হসমযং কাযেন সুচৰিতং চৰন্তি, ৱাচায সুচৰিতং চৰন্তি, মনসা সুচৰিতং চৰন্তি, সুপুব্বণ্হো, ভিক্খৱে, তেসং সত্তানং.

‘‘যে, ভিক্খৱে, সত্তা মজ্ঝন্হিকসমযং কাযেন সুচৰিতং চৰন্তি, ৱাচায সুচৰিতং চৰন্তি, মনসা সুচৰিতং চৰন্তি, সুমজ্ঝন্হিকো, ভিক্খৱে, তেসং সত্তানং.

‘‘যে, ভিক্খৱে, সত্তা সাযন্হসমযং কাযেন সুচৰিতং চৰন্তি, ৱাচায সুচৰিতং চৰন্তি, মনসা সুচৰিতং চৰন্তি, সুসাযন্হো, ভিক্খৱে, তেসং সত্তান’’ন্তি.

‘‘সুনক্খত্তং সুমঙ্গলং, সুপ্পভাতং সুহুট্ঠিতং [সুৱুট্ঠিতং (সী. পী.)];

সুখণো সুমুহুত্তো চ, সুযিট্ঠং ব্ৰহ্মচাৰিসু.

‘‘পদক্খিণং কাযকম্মং, ৱাচাকম্মং পদক্খিণং;

পদক্খিণং মনোকম্মং, পণীধি তে পদক্খিণে [পণিধিযো পদক্খিণা (সী. পী.), পণিধি তে পদক্খিণা (স্যা. কং.)];

পদক্খিণানি কত্ৱান, লভন্তত্থে [লভতত্থে (সী. পী.)] পদক্খিণে.

‘‘তে অত্থলদ্ধা সুখিতা, ৱিৰুড়্হা বুদ্ধসাসনে;

অৰোগা সুখিতা হোথ, সহ সব্বেহি ঞাতিভী’’তি. দসমং;

মঙ্গলৱগ্গো পঞ্চমো.