১০. আতপ্পকৰণীযসুত্তং

৫০. ‘‘তীহি, ভিক্খৱে, ঠানেহি আতপ্পং কৰণীযং. কতমেহি তীহি? অনুপ্পন্নানং পাপকানং অকুসলানং ধম্মানং অনুপ্পাদায আতপ্পং কৰণীযং, অনুপ্পন্নানং কুসলানং ধম্মানং উপ্পাদায আতপ্পং কৰণীযং, উপ্পন্নানং সাৰীৰিকানং ৱেদনানং দুক্খানং তিব্বানং খৰানং কটুকানং অসাতানং অমনাপানং পাণহৰানং অধিৱাসনায আতপ্পং কৰণীযং. ইমেহি তীহি, ভিক্খৱে, ঠানেহি আতপ্পং কৰণীযং.

‘‘যতো খো, ভিক্খৱে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায আতপ্পং কৰোতি, অনুপ্পন্নানং কুসলানং ধম্মানং উপ্পাদায আতপ্পং কৰোতি, উপ্পন্নানং সাৰীৰিকানং ৱেদনানং দুক্খানং তিব্বানং খৰানং কটুকানং অসাতানং অমনাপানং পাণহৰানং অধিৱাসনায আতপ্পং কৰোতি. অযং ৱুচ্চতি, ভিক্খৱে, ভিক্খু আতাপী নিপকো সতো সম্মা দুক্খস্স অন্তকিৰিযাযা’’তি. দসমং.