৫. অযোনিসোসুত্তং

৫. ‘‘তীহি, ভিক্খৱে, ধম্মেহি সমন্নাগতো বালো ৱেদিতব্বো. কতমেহি তীহি? অযোনিসো পঞ্হং কত্তা হোতি, অযোনিসো পঞ্হং ৱিস্সজ্জেতা হোতি, পৰস্স খো পন যোনিসো পঞ্হং ৱিস্সজ্জিতং পৰিমণ্ডলেহি পদব্যঞ্জনেহি সিলিট্ঠেহি উপগতেহি নাব্ভনুমোদিতা হোতি. ইমেহি খো, ভিক্খৱে, তীহি ধম্মেহি সমন্নাগতো বালো ৱেদিতব্বো.

‘‘তীহি, ভিক্খৱে, ধম্মেহি সমন্নাগতো পণ্ডিতো ৱেদিতব্বো. কতমেহি তীহি? যোনিসো পঞ্হং কত্তা হোতি, যোনিসো পঞ্হং ৱিস্সজ্জেতা হোতি, পৰস্স খো পন যোনিসো পঞ্হং ৱিস্সজ্জিতং পৰিমণ্ডলেহি পদব্যঞ্জনেহি সিলিট্ঠেহি উপগতেহি অব্ভনুমোদিতা হোতি. ইমেহি খো, ভিক্খৱে, তীহি ধম্মেহি সমন্নাগতো পণ্ডিতো ৱেদিতব্বো. তস্মাতিহ…. পঞ্চমং.