১. কোধপেয্যালং

১৮১. ‘‘দ্ৱেমে, ভিক্খৱে, ধম্মা. কতমে দ্ৱে? কোধো চ উপনাহো চ…পে… মক্খো চ পড়াসো [পলাসো (ক.)] চ… ইস্সা চ মচ্ছৰিযঞ্চ… মাযা চ সাঠেয্যঞ্চ… অহিৰিকঞ্চ অনোত্তপ্পঞ্চ. ইমে খো, ভিক্খৱে, দ্ৱে ধম্মা’’.

১৮২. ‘‘দ্ৱেমে, ভিক্খৱে, ধম্মা. কতমে দ্ৱে? অক্কোধো চ অনুপনাহো চ… অমক্খো চ অপড়াসো চ… অনিস্সা চ অমচ্ছৰিযঞ্চ… অমাযা চ অসাঠেয্যঞ্চ… হিৰী চ ওত্তপ্পঞ্চ. ইমে খো, ভিক্খৱে, দ্ৱে ধম্মা’’.

১৮৩. ‘‘দ্ৱীহি, ভিক্খৱে, ধম্মেহি সমন্নাগতো দুক্খং ৱিহৰতি. কতমেহি দ্ৱীহি? কোধেন চ উপনাহেন চ… মক্খেন চ পড়াসেন চ… ইস্সায চ মচ্ছৰিযেন চ… মাযায চ সাঠেয্যেন চ… অহিৰিকেন চ অনোত্তপ্পেন চ. ইমেহি খো, ভিক্খৱে, দ্ৱীহি ধম্মেহি সমন্নাগতো দুক্খং ৱিহৰতি’’.

১৮৪. ‘‘দ্ৱীহি, ভিক্খৱে, ধম্মেহি সমন্নাগতো সুখং ৱিহৰতি. কতমেহি দ্ৱীহি? অক্কোধেন চ অনুপনাহেন চ… অমক্খেন চ অপড়াসেন চ… অনিস্সায চ অমচ্ছৰিযেন চ… অমাযায চ অসাঠেয্যেন চ … হিৰিযা চ ওত্তপ্পেন চ. ইমেহি খো, ভিক্খৱে, দ্ৱীহি ধম্মেহি সমন্নাগতো সুখং ৱিহৰতি’’.

১৮৫. ‘‘দ্ৱেমে, ভিক্খৱে, ধম্মা সেখস্স ভিক্খুনো পৰিহানায সংৱত্তন্তি. কতমে দ্ৱে? কোধো চ উপনাহো চ… মক্খো চ পড়াসো চ… ইস্সা চ মচ্ছৰিযঞ্চ… মাযা চ সাঠেয্যঞ্চ… অহিৰিকঞ্চ অনোত্তপ্পঞ্চ. ইমে খো, ভিক্খৱে, দ্ৱে ধম্মা সেখস্স ভিক্খুনো পৰিহানায সংৱত্তন্তি’’.

১৮৬. ‘‘দ্ৱেমে, ভিক্খৱে, ধম্মা সেখস্স ভিক্খুনো অপৰিহানায সংৱত্তন্তি. কতমে দ্ৱে? অক্কোধো চ অনুপনাহো চ… অমক্খো চ অপড়াসো চ… অনিস্সা চ অমচ্ছৰিযঞ্চ… অমাযা চ অসাঠেয্যঞ্চ… হিৰী চ ওত্তপ্পঞ্চ. ইমে খো, ভিক্খৱে, দ্ৱে ধম্মা সেখস্স ভিক্খুনো অপৰিহানায সংৱত্তন্তি’’.

১৮৭. ‘‘দ্ৱীহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং নিৰযে. কতমেহি দ্ৱীহি? কোধেন চ উপনাহেন চ… মক্খেন চ পড়াসেন চ… ইস্সায চ মচ্ছৰিযেন চ… মাযায চ সাঠেয্যেন চ… অহিৰিকেন চ অনোত্তপ্পেন চ. ইমেহি খো, ভিক্খৱে, দ্ৱীহি ধম্মেহি সমন্নাগতো যথাভতং নিক্খিত্তো এৱং নিৰযে’’.

১৮৮. ‘‘দ্ৱীহি, ভিক্খৱে, ধম্মেহি সমন্নাগতো যথাভতং নিক্খিত্তো এৱং সগ্গে. কতমেহি দ্ৱীহি? অক্কোধেন চ অনুপনাহেন চ… অমক্খেন চ অপড়াসেন চ… অনিস্সায চ অমচ্ছৰিযেন চ… অমাযায চ অসাঠেয্যেন চ… হিৰিযা চ ওত্তপ্পেন চ. ইমেহি খো, ভিক্খৱে, দ্ৱীহি ধম্মেহি সমন্নাগতো যথাভতং নিক্খিত্তো এৱং সগ্গে’’.

১৮৯. ‘‘দ্ৱীহি, ভিক্খৱে, ধম্মেহি সমন্নাগতো ইধেকচ্চো কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জতি. কতমেহি দ্ৱীহি? কোধেন চ উপনাহেন চ… মক্খেন চ পড়াসেন চ… ইস্সায চ মচ্ছৰিযেন চ… মাযায চ সাঠেয্যেন চ… অহিৰিকেন চ অনোত্তপ্পেন চ. ইমেহি খো, ভিক্খৱে, দ্ৱীহি ধম্মেহি সমন্নাগতো ইধেকচ্চো কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জতি’’.

১৯০. ‘‘দ্ৱীহি, ভিক্খৱে, ধম্মেহি সমন্নাগতো ইধেকচ্চো কাযস্স ভেদা পৰং মৰণা সুগতিং সগ্গং লোকং উপপজ্জতি. কতমেহি দ্ৱীহি? অক্কোধেন চ অনুপনাহেন চ… অমক্খেন চ অপড়াসেন চ… অনিস্সায চ অমচ্ছৰিযেন চ… অমাযায চ অসাঠেয্যেন চ… হিৰিযা চ ওত্তপ্পেন চ. ইমেহি খো, ভিক্খৱে, দ্ৱীহি ধম্মেহি সমন্নাগতো ইধেকচ্চো কাযস্স ভেদা পৰং মৰণা সুগতিং সগ্গং লোকং উপপজ্জতি’’.

কোধপেয্যালং নিট্ঠিতং.