(১২) ২. আযাচনৱগ্গো

১৩১. ‘‘সদ্ধো, ভিক্খৱে, ভিক্খু এৱং সম্মা আযাচমানো আযাচেয্য – ‘তাদিসো হোমি যাদিসা সাৰিপুত্তমোগ্গল্লানা’তি. এসা, ভিক্খৱে, তুলা এতং পমাণং মম সাৱকানং ভিক্খূনং যদিদং সাৰিপুত্তমোগ্গল্লানা’’তি.

১৩২. ‘‘সদ্ধা, ভিক্খৱে, ভিক্খুনী এৱং সম্মা আযাচমানা আযাচেয্য – ‘তাদিসী হোমি যাদিসী খেমা চ ভিক্খুনী উপ্পলৱণ্ণা চা’তি. এসা, ভিক্খৱে, তুলা এতং পমাণং মম সাৱিকানং ভিক্খুনীনং যদিদং খেমা চ ভিক্খুনী উপ্পলৱণ্ণা চা’’তি.

১৩৩. ‘‘সদ্ধো, ভিক্খৱে, উপাসকো এৱং সম্মা আযাচমানো আযাচেয্য – ‘তাদিসো হোমি যাদিসো চিত্তো চ গহপতি হত্থকো চ আড়ৱকো’তি. এসা, ভিক্খৱে, তুলা এতং পমাণং মম সাৱকানং উপাসকানং যদিদং চিত্তো চ গহপতি হত্থকো চ আড়ৱকো’’তি.

১৩৪. ‘‘সদ্ধা, ভিক্খৱে, উপাসিকা এৱং সম্মা আযাচমানা আযাচেয্য – ‘তাদিসী হোমি যাদিসী খুজ্জুত্তৰা চ উপাসিকা ৱেড়ুকণ্ডকিযা [ৱেড়ুকণ্ডকী (অ. নি. ৬.৩৭; অ. নি. ৪.১৭৬ আগতং] চ নন্দমাতা’তি. এসা, ভিক্খৱে, তুলা এতং পমাণং মম সাৱিকানং উপাসিকানং যদিদং খুজ্জুত্তৰা চ উপাসিকা ৱেড়ুকণ্ডকিযা চ নন্দমাতা’’তি.

১৩৫. ‘‘দ্ৱীহি, ভিক্খৱে, ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেহি দ্ৱীহি? অননুৱিচ্চ অপৰিযোগাহেত্ৱা অৱণ্ণাৰহস্স ৱণ্ণং ভাসতি, অননুৱিচ্চ অপৰিযোগাহেত্ৱা ৱণ্ণাৰহস্স অৱণ্ণং ভাসতি. ইমেহি খো, ভিক্খৱে, দ্ৱীহি ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতীতি.

‘‘দ্ৱীহি, ভিক্খৱে, ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেহি দ্ৱীহি? অনুৱিচ্চ পৰিযোগাহেত্ৱা অৱণ্ণাৰহস্স অৱণ্ণং ভাসতি, অনুৱিচ্চ পৰিযোগাহেত্ৱা ৱণ্ণাৰহস্স ৱণ্ণং ভাসতি. ইমেহি খো, ভিক্খৱে, দ্ৱীহি ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

১৩৬. ‘‘দ্ৱীহি, ভিক্খৱে, ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেহি দ্ৱীহি? অননুৱিচ্চ অপৰিযোগাহেত্ৱা অপ্পসাদনীযে ঠানে পসাদং উপদংসেতি, অননুৱিচ্চ অপৰিযোগাহেত্ৱা পসাদনীযে ঠানে অপ্পসাদং উপদংসেতি. ইমেহি খো, ভিক্খৱে, দ্ৱীহি ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতীতি.

‘‘দ্ৱীহি, ভিক্খৱে, ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেহি দ্ৱীহি? অনুৱিচ্চ পৰিযোগাহেত্ৱা অপ্পসাদনীযে ঠানে অপ্পসাদং উপদংসেতি, অনুৱিচ্চ পৰিযোগাহেত্ৱা পসাদনীযে ঠানে পসাদং উপদংসেতি. ইমেহি খো, ভিক্খৱে, দ্ৱীহি ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

১৩৭. ‘‘দ্ৱীসু, ভিক্খৱে, মিচ্ছাপটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেসু দ্ৱীসু? মাতৰি চ পিতৰি চ. ইমেসু খো, ভিক্খৱে, দ্ৱীসু মিচ্ছাপটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতীতি.

‘‘দ্ৱীসু, ভিক্খৱে, সম্মাপটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেসু দ্ৱীসু? মাতৰি চ পিতৰি চ. ইমেসু খো, ভিক্খৱে, দ্ৱীসু সম্মাপটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

১৩৮. ‘‘দ্ৱীসু, ভিক্খৱে, মিচ্ছাপটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেসু দ্ৱীসু? তথাগতে চ তথাগতসাৱকে চ. ইমেসু খো, ভিক্খৱে, মিচ্ছাপটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতীতি.

‘‘দ্ৱীসু, ভিক্খৱে, সম্মাপটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেসু দ্ৱীসু? তথাগতে চ তথাগতসাৱকে চ. ইমেসু খো, ভিক্খৱে, দ্ৱীসু সম্মাপটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

১৩৯. ‘‘দ্ৱেমে, ভিক্খৱে, ধম্মা. কতমে দ্ৱে? সচিত্তৱোদানঞ্চ ন চ কিঞ্চি লোকে উপাদিযতি. ইমে খো, ভিক্খৱে, দ্ৱে ধম্মা’’তি.

১৪০. ‘‘দ্ৱেমে, ভিক্খৱে, ধম্মা. কতমে দ্ৱে? কোধো চ উপনাহো চ. ইমে খো, ভিক্খৱে, দ্ৱে ধম্মা’’তি.

১৪১. ‘‘দ্ৱেমে, ভিক্খৱে, ধম্মা. কতমে দ্ৱে? কোধৱিনযো চ উপনাহৱিনযো চ. ইমে খো, ভিক্খৱে, দ্ৱে ধম্মা’’তি.

আযাচনৱগ্গো দুতিযো.