৩. ততিযপণ্ণাসকং

(১১) ১. আসাদুপ্পজহৱগ্গো

১১৯. ‘‘দ্ৱেমা, ভিক্খৱে, আসা দুপ্পজহা. কতমা দ্ৱে? লাভাসা চ জীৱিতাসা চ. ইমা খো, ভিক্খৱে, দ্ৱে আসা দুপ্পজহা’’তি.

১২০. ‘‘দ্ৱেমে, ভিক্খৱে, পুগ্গলা দুল্লভা লোকস্মিং. কতমে দ্ৱে? যো চ পুব্বকাৰী, যো চ কতঞ্ঞূ কতৱেদী. ইমে খো, ভিক্খৱে, দ্ৱে পুগ্গলা দুল্লভা লোকস্মি’’ন্তি.

১২১. ‘‘দ্ৱেমে, ভিক্খৱে, পুগ্গলা দুল্লভা লোকস্মিং. কতমে দ্ৱে? তিত্তো চ তপ্পেতা চ. ইমে খো, ভিক্খৱে, দ্ৱে পুগ্গলা দুল্লভা লোকস্মি’’ন্তি.

১২২. ‘‘দ্ৱেমে, ভিক্খৱে, পুগ্গলা দুত্তপ্পযা. কতমে দ্ৱে? যো চ লদ্ধং লদ্ধং নিক্খিপতি, যো চ লদ্ধং লদ্ধং ৱিস্সজ্জেতি. ইমে খো, ভিক্খৱে, দ্ৱে পুগ্গলা দুত্তপ্পযা’’তি.

১২৩. ‘‘দ্ৱেমে, ভিক্খৱে, পুগ্গলা সুতপ্পযা. কতমে দ্ৱে? যো চ লদ্ধং লদ্ধং ন নিক্খিপতি, যো চ লদ্ধং লদ্ধং ন ৱিস্সজ্জেতি. ইমে খো, ভিক্খৱে, দ্ৱে পুগ্গলা সুতপ্পযা’’তি.

১২৪. ‘‘দ্ৱেমে, ভিক্খৱে, পচ্চযা ৰাগস্স উপ্পাদায. কতমে দ্ৱে? সুভনিমিত্তঞ্চ অযোনিসো চ মনসিকাৰো. ইমে খো, ভিক্খৱে, দ্ৱে পচ্চযা ৰাগস্স উপ্পাদাযা’’তি.

১২৫. ‘‘দ্ৱেমে, ভিক্খৱে, পচ্চযা দোসস্স উপ্পাদায. কতমে দ্ৱে? পটিঘনিমিত্তঞ্চ অযোনিসো চ মনসিকাৰো. ইমে খো, ভিক্খৱে, দ্ৱে পচ্চযা দোসস্স উপ্পাদাযা’’তি.

১২৬. ‘‘দ্ৱেমে, ভিক্খৱে, পচ্চযা মিচ্ছাদিট্ঠিযা উপ্পাদায. কতমে দ্ৱে? পৰতো চ ঘোসো অযোনিসো চ মনসিকাৰো. ইমে খো, ভিক্খৱে, দ্ৱে পচ্চযা মিচ্ছাদিট্ঠিযা উপ্পাদাযা’’তি.

১২৭. ‘‘দ্ৱেমে, ভিক্খৱে, পচ্চযা সম্মাদিট্ঠিযা উপ্পাদায. কতমে দ্ৱে? পৰতো চ ঘোসো, যোনিসো চ মনসিকাৰো. ইমে খো, ভিক্খৱে, দ্ৱে পচ্চযা সম্মাদিট্ঠিযা উপ্পাদাযা’’তি.

১২৮. ‘‘দ্ৱেমা, ভিক্খৱে, আপত্তিযো. কতমা দ্ৱে? লহুকা চ আপত্তি, গৰুকা চ আপত্তি. ইমা খো, ভিক্খৱে, দ্ৱে আপত্তিযো’’তি.

১২৯. ‘‘দ্ৱেমা, ভিক্খৱে, আপত্তিযো. কতমা দ্ৱে? দুট্ঠুল্লা চ আপত্তি, অদুট্ঠুল্লা চ আপত্তি. ইমা খো, ভিক্খৱে, দ্ৱে আপত্তিযো’’তি.

১৩০. ‘‘দ্ৱেমা, ভিক্খৱে, আপত্তিযো. কতমা দ্ৱে? সাৱসেসা চ আপত্তি, অনৱসেসা চ আপত্তি. ইমা খো, ভিক্খৱে, দ্ৱে আপত্তিযো’’তি.

আসাদুপ্পজহৱগ্গো পঠমো.

(১২) ২. আযাচনৱগ্গো

১৩১. ‘‘সদ্ধো, ভিক্খৱে, ভিক্খু এৱং সম্মা আযাচমানো আযাচেয্য – ‘তাদিসো হোমি যাদিসা সাৰিপুত্তমোগ্গল্লানা’তি. এসা, ভিক্খৱে, তুলা এতং পমাণং মম সাৱকানং ভিক্খূনং যদিদং সাৰিপুত্তমোগ্গল্লানা’’তি.

১৩২. ‘‘সদ্ধা, ভিক্খৱে, ভিক্খুনী এৱং সম্মা আযাচমানা আযাচেয্য – ‘তাদিসী হোমি যাদিসী খেমা চ ভিক্খুনী উপ্পলৱণ্ণা চা’তি. এসা, ভিক্খৱে, তুলা এতং পমাণং মম সাৱিকানং ভিক্খুনীনং যদিদং খেমা চ ভিক্খুনী উপ্পলৱণ্ণা চা’’তি.

১৩৩. ‘‘সদ্ধো, ভিক্খৱে, উপাসকো এৱং সম্মা আযাচমানো আযাচেয্য – ‘তাদিসো হোমি যাদিসো চিত্তো চ গহপতি হত্থকো চ আড়ৱকো’তি. এসা, ভিক্খৱে, তুলা এতং পমাণং মম সাৱকানং উপাসকানং যদিদং চিত্তো চ গহপতি হত্থকো চ আড়ৱকো’’তি.

১৩৪. ‘‘সদ্ধা, ভিক্খৱে, উপাসিকা এৱং সম্মা আযাচমানা আযাচেয্য – ‘তাদিসী হোমি যাদিসী খুজ্জুত্তৰা চ উপাসিকা ৱেড়ুকণ্ডকিযা [ৱেড়ুকণ্ডকী (অ. নি. ৬.৩৭; অ. নি. ৪.১৭৬ আগতং] চ নন্দমাতা’তি. এসা, ভিক্খৱে, তুলা এতং পমাণং মম সাৱিকানং উপাসিকানং যদিদং খুজ্জুত্তৰা চ উপাসিকা ৱেড়ুকণ্ডকিযা চ নন্দমাতা’’তি.

১৩৫. ‘‘দ্ৱীহি, ভিক্খৱে, ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেহি দ্ৱীহি? অননুৱিচ্চ অপৰিযোগাহেত্ৱা অৱণ্ণাৰহস্স ৱণ্ণং ভাসতি, অননুৱিচ্চ অপৰিযোগাহেত্ৱা ৱণ্ণাৰহস্স অৱণ্ণং ভাসতি. ইমেহি খো, ভিক্খৱে, দ্ৱীহি ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতীতি.

‘‘দ্ৱীহি, ভিক্খৱে, ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেহি দ্ৱীহি? অনুৱিচ্চ পৰিযোগাহেত্ৱা অৱণ্ণাৰহস্স অৱণ্ণং ভাসতি, অনুৱিচ্চ পৰিযোগাহেত্ৱা ৱণ্ণাৰহস্স ৱণ্ণং ভাসতি. ইমেহি খো, ভিক্খৱে, দ্ৱীহি ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

১৩৬. ‘‘দ্ৱীহি, ভিক্খৱে, ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেহি দ্ৱীহি? অননুৱিচ্চ অপৰিযোগাহেত্ৱা অপ্পসাদনীযে ঠানে পসাদং উপদংসেতি, অননুৱিচ্চ অপৰিযোগাহেত্ৱা পসাদনীযে ঠানে অপ্পসাদং উপদংসেতি. ইমেহি খো, ভিক্খৱে, দ্ৱীহি ধম্মেহি সমন্নাগতো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতীতি.

‘‘দ্ৱীহি, ভিক্খৱে, ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেহি দ্ৱীহি? অনুৱিচ্চ পৰিযোগাহেত্ৱা অপ্পসাদনীযে ঠানে অপ্পসাদং উপদংসেতি, অনুৱিচ্চ পৰিযোগাহেত্ৱা পসাদনীযে ঠানে পসাদং উপদংসেতি. ইমেহি খো, ভিক্খৱে, দ্ৱীহি ধম্মেহি সমন্নাগতো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

১৩৭. ‘‘দ্ৱীসু, ভিক্খৱে, মিচ্ছাপটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেসু দ্ৱীসু? মাতৰি চ পিতৰি চ. ইমেসু খো, ভিক্খৱে, দ্ৱীসু মিচ্ছাপটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতীতি.

‘‘দ্ৱীসু, ভিক্খৱে, সম্মাপটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেসু দ্ৱীসু? মাতৰি চ পিতৰি চ. ইমেসু খো, ভিক্খৱে, দ্ৱীসু সম্মাপটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

১৩৮. ‘‘দ্ৱীসু, ভিক্খৱে, মিচ্ছাপটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতি. কতমেসু দ্ৱীসু? তথাগতে চ তথাগতসাৱকে চ. ইমেসু খো, ভিক্খৱে, মিচ্ছাপটিপজ্জমানো বালো অব্যত্তো অসপ্পুৰিসো খতং উপহতং অত্তানং পৰিহৰতি, সাৱজ্জো চ হোতি সানুৱজ্জো চ ৱিঞ্ঞূনং, বহুঞ্চ অপুঞ্ঞং পসৱতীতি.

‘‘দ্ৱীসু, ভিক্খৱে, সম্মাপটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতি. কতমেসু দ্ৱীসু? তথাগতে চ তথাগতসাৱকে চ. ইমেসু খো, ভিক্খৱে, দ্ৱীসু সম্মাপটিপজ্জমানো পণ্ডিতো ৱিযত্তো সপ্পুৰিসো অক্খতং অনুপহতং অত্তানং পৰিহৰতি, অনৱজ্জো চ হোতি অননুৱজ্জো চ ৱিঞ্ঞূনং, বহুঞ্চ পুঞ্ঞং পসৱতী’’তি.

১৩৯. ‘‘দ্ৱেমে, ভিক্খৱে, ধম্মা. কতমে দ্ৱে? সচিত্তৱোদানঞ্চ ন চ কিঞ্চি লোকে উপাদিযতি. ইমে খো, ভিক্খৱে, দ্ৱে ধম্মা’’তি.

১৪০. ‘‘দ্ৱেমে, ভিক্খৱে, ধম্মা. কতমে দ্ৱে? কোধো চ উপনাহো চ. ইমে খো, ভিক্খৱে, দ্ৱে ধম্মা’’তি.

১৪১. ‘‘দ্ৱেমে, ভিক্খৱে, ধম্মা. কতমে দ্ৱে? কোধৱিনযো চ উপনাহৱিনযো চ. ইমে খো, ভিক্খৱে, দ্ৱে ধম্মা’’তি.

আযাচনৱগ্গো দুতিযো.

(১৩) ৩. দানৱগ্গো

১৪২. ‘‘দ্ৱেমানি, ভিক্খৱে, দানানি. কতমানি দ্ৱে? আমিসদানঞ্চ ধম্মদানঞ্চ. ইমানি খো, ভিক্খৱে, দ্ৱে দানানি. এতদগ্গং, ভিক্খৱে, ইমেসং দ্ৱিন্নং দানানং যদিদং ধম্মদান’’ন্তি.

১৪৩. ‘‘দ্ৱেমে, ভিক্খৱে, যাগা. কতমে দ্ৱে? আমিসযাগো চ ধম্মযাগো চ. ইমে খো, ভিক্খৱে, দ্ৱে যাগা. এতদগ্গং, ভিক্খৱে, ইমেসং দ্ৱিন্নং যাগানং যদিদং ধম্মযাগো’’তি.

১৪৪. ‘‘দ্ৱেমে, ভিক্খৱে, চাগা. কতমে দ্ৱে? আমিসচাগো চ ধম্মচাগো চ. ইমে খো, ভিক্খৱে, দ্ৱে চাগা. এতদগ্গং, ভিক্খৱে, ইমেসং দ্ৱিন্নং চাগানং যদিদং ধম্মচাগো’’তি.

১৪৫. ‘‘দ্ৱেমে, ভিক্খৱে, পৰিচ্চাগা. কতমে দ্ৱে? আমিসপৰিচ্চাগো চ ধম্মপৰিচ্চাগো চ. ইমে খো, ভিক্খৱে, দ্ৱে পৰিচ্চাগা. এতদগ্গং, ভিক্খৱে, ইমেসং দ্ৱিন্নং পৰিচ্চাগানং যদিদং ধম্মপৰিচ্চাগো’’তি.

১৪৬. ‘‘দ্ৱেমে, ভিক্খৱে, ভোগা. কতমে দ্ৱে? আমিসভোগো চ ধম্মভোগো চ. ইমে খো, ভিক্খৱে, দ্ৱে ভোগা. এতদগ্গং, ভিক্খৱে, ইমেসং দ্ৱিন্নং ভোগানং যদিদং ধম্মভোগো’’তি.

১৪৭. ‘‘দ্ৱেমে, ভিক্খৱে, সম্ভোগা. কতমে দ্ৱে? আমিসসম্ভোগো চ ধম্মসম্ভোগো চ. ইমে খো, ভিক্খৱে, দ্ৱে সম্ভোগা. এতদগ্গং, ভিক্খৱে, ইমেসং দ্ৱিন্নং সম্ভোগানং যদিদং ধম্মসম্ভোগো’’তি.

১৪৮. ‘‘দ্ৱেমে, ভিক্খৱে, সংৱিভাগা. কতমে দ্ৱে? আমিসসংৱিভাগো চ ধম্মসংৱিভাগো চ. ইমে খো, ভিক্খৱে, দ্ৱে সংৱিভাগা. এতদগ্গং, ভিক্খৱে, ইমেসং দ্ৱিন্নং সংৱিভাগানং যদিদং ধম্মসংৱিভাগো’’তি.

১৪৯. ‘‘দ্ৱেমে, ভিক্খৱে, সঙ্গহা. কতমে দ্ৱে? আমিসসঙ্গহো চ ধম্মসঙ্গহো চ. ইমে খো, ভিক্খৱে, দ্ৱে সঙ্গহা. এতদগ্গং, ভিক্খৱে, ইমেসং দ্ৱিন্নং সঙ্গহানং যদিদং ধম্মসঙ্গহো’’তি.

১৫০. ‘‘দ্ৱেমে, ভিক্খৱে, অনুগ্গহা. কতমে দ্ৱে? আমিসানুগ্গহো চ ধম্মানুগ্গহো চ. ইমে খো, ভিক্খৱে, দ্ৱে অনুগ্গহা. এতদগ্গং, ভিক্খৱে, ইমেসং দ্ৱিন্নং অনুগ্গহানং যদিদং ধম্মানুগ্গহো’’তি.

১৫১. ‘‘দ্ৱেমা, ভিক্খৱে, অনুকম্পা. কতমা দ্ৱে? আমিসানুকম্পা চ ধম্মানুকম্পা চ. ইমা খো, ভিক্খৱে, দ্ৱে অনুকম্পা. এতদগ্গং, ভিক্খৱে, ইমাসং দ্ৱিন্নং অনুকম্পানং যদিদং ধম্মানুকম্পা’’তি.

দানৱগ্গো ততিযো.

(১৪) ৪. সন্থাৰৱগ্গো

১৫২. ‘‘দ্ৱেমে, ভিক্খৱে, সন্থাৰা [সন্ধাৰা (ক.)]. কতমে দ্ৱে? আমিসসন্থাৰো চ ধম্মসন্থাৰো চ. ইমে খো, ভিক্খৱে, দ্ৱে সন্থাৰা. এতদগ্গং, ভিক্খৱে, ইমেসং দ্ৱিন্নং সন্থাৰানং যদিদং ধম্মসন্থাৰো’’তি.

১৫৩. ‘‘দ্ৱেমে, ভিক্খৱে, পটিসন্থাৰা [পটিসন্ধাৰা (ক.)]. কতমে দ্ৱে? আমিসপটিসন্থাৰো চ ধম্মপটিসন্থাৰো চ. ইমে খো, ভিক্খৱে, দ্ৱে পটিসন্থাৰা. এতদগ্গং, ভিক্খৱে, ইমেসং দ্ৱিন্নং পটিসন্থাৰানং যদিদং ধম্মপটিসন্থাৰো’’তি.

১৫৪. ‘‘দ্ৱেমা, ভিক্খৱে, এসনা. কতমা দ্ৱে? আমিসেসনা চ ধম্মেসনা চ. ইমা খো, ভিক্খৱে, দ্ৱে এসনা. এতদগ্গং, ভিক্খৱে, ইমাসং দ্ৱিন্নং এসনানং যদিদং ধম্মেসনা’’তি.

১৫৫. ‘‘দ্ৱেমা, ভিক্খৱে, পৰিযেসনা. কতমা দ্ৱে? আমিসপৰিযেসনা চ ধম্মপৰিযেসনা চ. ইমা খো, ভিক্খৱে, দ্ৱে পৰিযেসনা. এতদগ্গং, ভিক্খৱে, ইমাসং দ্ৱিন্নং পৰিযেসনানং যদিদং ধম্মপৰিযেসনা’’তি.

১৫৬. ‘‘দ্ৱেমা, ভিক্খৱে, পৰিযেট্ঠিযো. কতমা দ্ৱে? আমিসপৰিযেট্ঠি চ ধম্মপৰিযেট্ঠি চ. ইমা খো, ভিক্খৱে, দ্ৱে পৰিযেট্ঠিযো. এতদগ্গং, ভিক্খৱে, ইমাসং দ্ৱিন্নং পৰিযেট্ঠীনং যদিদং ধম্মপৰিযেট্ঠী’’তি.

১৫৭. ‘‘দ্ৱেমা, ভিক্খৱে, পূজা. কতমা দ্ৱে? আমিসপূজা চ ধম্মপূজা চ. ইমা খো ভিক্খৱে, দ্ৱে পূজা. এতদগ্গং, ভিক্খৱে, ইমাসং দ্ৱিন্নং পূজানং যদিদং ধম্মপূজা’’তি.

১৫৮. ‘‘দ্ৱেমানি, ভিক্খৱে, আতিথেয্যানি. কতমানি দ্ৱে? আমিসাতিথেয্যঞ্চ ধম্মাতিথেয্যঞ্চ. ইমানি খো, ভিক্খৱে, দ্ৱে আতিথেয্যানি. এতদগ্গং, ভিক্খৱে, ইমেসং দ্ৱিন্নং আতিথেয্যানং যদিদং ধম্মাতিথেয্য’’ন্তি.

১৫৯. ‘‘দ্ৱেমা, ভিক্খৱে, ইদ্ধিযো. কতমা দ্ৱে? আমিসিদ্ধি চ ধম্মিদ্ধি চ. ইমা খো, ভিক্খৱে, দ্ৱে ইদ্ধিযো. এতদগ্গং, ভিক্খৱে, ইমাসং দ্ৱিন্নং ইদ্ধীনং যদিদং ধম্মিদ্ধী’’তি.

১৬০. ‘‘দ্ৱেমা, ভিক্খৱে, ৱুদ্ধিযো. কতমা দ্ৱে? আমিসৱুদ্ধি চ ধম্মৱুদ্ধি চ. ইমা খো, ভিক্খৱে, দ্ৱে ৱুদ্ধিযো. এতদগ্গং, ভিক্খৱে, ইমাসং দ্ৱিন্নং ৱুদ্ধীনং যদিদং ধম্মৱুদ্ধী’’তি.

১৬১. ‘‘দ্ৱেমানি, ভিক্খৱে, ৰতনানি. কতমানি দ্ৱে? আমিসৰতনঞ্চ ধম্মৰতনঞ্চ. ইমানি খো, ভিক্খৱে, দ্ৱে ৰতনানি. এতদগ্গং, ভিক্খৱে, ইমেসং দ্ৱিন্নং ৰতনানং যদিদং ধম্মৰতন’’ন্তি.

১৬২. ‘‘দ্ৱেমে, ভিক্খৱে, সন্নিচযা. কতমে দ্ৱে? আমিসসন্নিচযো চ ধম্মসন্নিচযো চ. ইমে খো, ভিক্খৱে, দ্ৱে সন্নিচযা. এতদগ্গং, ভিক্খৱে, ইমেসং দ্ৱিন্নং সন্নিচযানং যদিদং ধম্মসন্নিচযো’’তি.

১৬৩. ‘‘দ্ৱেমানি, ভিক্খৱে, ৱেপুল্লানি. কতমানি দ্ৱে? আমিসৱেপুল্লঞ্চ ধম্মৱেপুল্লঞ্চ. ইমানি খো, ভিক্খৱে, দ্ৱে ৱেপুল্লানি. এতদগ্গং, ভিক্খৱে, ইমেসং দ্ৱিন্নং ৱেপুল্লানং যদিদং ধম্মৱেপুল্ল’’ন্তি.

সন্থাৰৱগ্গো চতুত্থো.

(১৫) ৫. সমাপত্তিৱগ্গো

১৬৪. ‘‘দ্ৱেমে, ভিক্খৱে, ধম্মা. কতমে দ্ৱে? সমাপত্তিকুসলতা চ সমাপত্তিৱুট্ঠানকুসলতা চ. ইমে খো, ভিক্খৱে, দ্ৱে ধম্মা’’তি.

১৬৫. ‘‘দ্ৱেমে, ভিক্খৱে, ধম্মা. কতমে দ্ৱে? অজ্জৱঞ্চ মদ্দৱঞ্চ. ইমে খো, ভিক্খৱে, দ্ৱে ধম্মা’’.

১৬৬. ‘‘দ্ৱেমে, ভিক্খৱে, ধম্মা. কতমে দ্ৱে? খন্তি চ সোৰচ্চঞ্চ. ইমে খো, ভিক্খৱে, দ্ৱে ধম্মা’’.

১৬৭. ‘‘দ্ৱেমে, ভিক্খৱে, ধম্মা. কতমে দ্ৱে? সাখল্যঞ্চ পটিসন্থাৰো চ. ইমে খো, ভিক্খৱে, দ্ৱে ধম্মা’’.

১৬৮. ‘দ্ৱেমে, ভিক্খৱে, ধম্মা. কতমে দ্ৱে? অৱিহিংসা চ সোচেয্যঞ্চ. ইমে খো, ভিক্খৱে, দ্ৱে ধম্মা’’.

১৬৯. ‘‘দ্ৱেমে, ভিক্খৱে, ধম্মা. কতমে দ্ৱে? ইন্দ্ৰিযেসু অগুত্তদ্ৱাৰতা চ ভোজনে অমত্তঞ্ঞুতা চ. ইমে খো, ভিক্খৱে, দ্ৱে ধম্মা’’.

১৭০. ‘‘দ্ৱেমে, ভিক্খৱে, ধম্মা. কতমে দ্ৱে? ইন্দ্ৰিযেসু গুত্তদ্ৱাৰতা চ ভোজনে মত্তঞ্ঞুতা চ. ইমে খো, ভিক্খৱে, দ্ৱে ধম্মা’’.

১৭১. ‘‘দ্ৱেমে, ভিক্খৱে, ধম্মা. কতমে দ্ৱে? পটিসঙ্খানবলঞ্চ ভাৱনাবলঞ্চ. ইমে খো, ভিক্খৱে, দ্ৱে ধম্মা’’.

১৭২. ‘‘দ্ৱেমে, ভিক্খৱে, ধম্মা. কতমে দ্ৱে? সতিবলঞ্চ সমাধিবলঞ্চ. ইমে খো, ভিক্খৱে, দ্ৱে ধম্মা’’.

১৭৩. ‘‘দ্ৱেমে, ভিক্খৱে, ধম্মা. কতমে দ্ৱে? সমথো চ ৱিপস্সনা চ. ইমে খো, ভিক্খৱে, দ্ৱে ধম্মা’’.

১৭৪. ‘‘দ্ৱেমে, ভিক্খৱে, ধম্মা. কতমে দ্ৱে? সীলৱিপত্তি চ দিট্ঠিৱিপত্তি চ. ইমে খো, ভিক্খৱে, দ্ৱে ধম্মা’’.

১৭৫. ‘‘দ্ৱেমে, ভিক্খৱে, ধম্মা. কতমে দ্ৱে? সীলসম্পদা চ দিট্ঠিসম্পদা চ. ইমে খো, ভিক্খৱে, দ্ৱে ধম্মা’’.

১৭৬. ‘‘দ্ৱেমে, ভিক্খৱে, ধম্মা. কতমে দ্ৱে? সীলৱিসুদ্ধি চ দিট্ঠিৱিসুদ্ধি চ. ইমে খো, ভিক্খৱে, দ্ৱে ধম্মা’’.

১৭৭. ‘‘দ্ৱেমে, ভিক্খৱে, ধম্মা. কতমে দ্ৱে? দিট্ঠিৱিসুদ্ধি চ যথাদিট্ঠিস্স চ পধানং. ইমে খো, ভিক্খৱে, দ্ৱে ধম্মা’’.

১৭৮. ‘‘দ্ৱেমে, ভিক্খৱে, ধম্মা. কতমে দ্ৱে? অসন্তুট্ঠিতা চ কুসলেসু ধম্মেসু, অপ্পটিৱানিতা চ পধানস্মিং. ইমে খো, ভিক্খৱে, দ্ৱে ধম্মা’’.

১৭৯. ‘‘দ্ৱেমে, ভিক্খৱে, ধম্মা. কতমে দ্ৱে? মুট্ঠস্সচ্চঞ্চ অসম্পজঞ্ঞঞ্চ. ইমে খো, ভিক্খৱে, দ্ৱে ধম্মা’’.

১৮০. ‘‘দ্ৱেমে, ভিক্খৱে, ধম্মা. কতমে দ্ৱে? সতি চ সম্পজঞ্ঞঞ্চ. ইমে খো, ভিক্খৱে, দ্ৱে ধম্মা’’তি.

সমাপত্তিৱগ্গো পঞ্চমো.

ততিযো পণ্ণাসকো সমত্তো.