৯. দুতিযসমাধিসুত্তং

১৯. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘সিযা নু খো ভিক্খৱে, ভিক্খুনো তথাৰূপো সমাধিপটিলাভো যথা নেৱ পথৱিযং পথৱিসঞ্ঞী অস্স, ন আপস্মিং আপোসঞ্ঞী অস্স…পে… ন আকিঞ্চঞ্ঞাযতনে আকিঞ্চঞ্ঞাযতনসঞ্ঞী অস্স, ন নেৱসঞ্ঞানাসঞ্ঞাযতনে নেৱসঞ্ঞানাসঞ্ঞাযতনসঞ্ঞী অস্স, ন ইধলোকে ইধলোকসঞ্ঞী অস্স, ন পৰলোকে পৰলোকসঞ্ঞী অস্স, যম্পিদং দিট্ঠং সুতং মুতং ৱিঞ্ঞাতং পত্তং পৰিযেসিতং অনুৱিচৰিতং মনসা তত্ৰাপি ন সঞ্ঞী অস্স; সঞ্ঞী চ পন অস্সা’’তি? ‘‘ভগৱংমূলকা নো, ভন্তে, ধম্মা ভগৱংনেত্তিকা ভগৱংপটিসৰণা. সাধু ৱত, ভন্তে, ভগৱন্তংযেৱ পটিভাতু এতস্স ভাসিতস্স অত্থো. ভগৱতো সুত্ৱা ভিক্খূ ধাৰেস্সন্তী’’তি.

‘‘তেন হি, ভিক্খৱে, সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘সিযা, ভিক্খৱে, ভিক্খুনো তথাৰূপো সমাধিপটিলাভো যথা নেৱ পথৱিযং পথৱিসঞ্ঞী অস্স…পে… যম্পিদং দিট্ঠং সুতং মুতং ৱিঞ্ঞাতং পত্তং পৰিযেসিতং অনুৱিচৰিতং মনসা তত্ৰাপি ন সঞ্ঞী অস্স; সঞ্ঞী চ পন অস্সা’’তি.

‘‘যথা কথং পন, ভন্তে, সিযা ভিক্খুনো তথাৰূপো সমাধিপটিলাভো যথা নেৱ পথৱিযং পথৱিসঞ্ঞী অস্স…পে… যম্পিদং দিট্ঠং সুতং মুতং ৱিঞ্ঞাতং পত্তং পৰিযেসিতং অনুৱিচৰিতং মনসা তত্ৰাপি ন সঞ্ঞী অস্স; সঞ্ঞী চ পন অস্সা’’তি?

‘‘ইধ, ভিক্খৱে, ভিক্খু এৱংসঞ্ঞী হোতি – ‘এতং সন্তং এতং পণীতং, যদিদং সব্বসঙ্খাৰসমথো সব্বূপধিপটিনিস্সগ্গো তণ্হাক্খযো ৱিৰাগো নিৰোধো নিব্বান’ন্তি. এৱং খো, ভিক্খৱে, সিযা ভিক্খুনো তথাৰূপো সমাধিপটিলাভো যথা নেৱ পথৱিযং পথৱিসঞ্ঞী অস্স…পে. … যম্পিদং দিট্ঠং সুতং মুতং ৱিঞ্ঞাতং পত্তং পৰিযেসিতং অনুৱিচৰিতং মনসা তত্ৰাপি ন সঞ্ঞী অস্স; সঞ্ঞী চ পন অস্সা’’তি. নৱমং.