(২০) ৫. অপৰপুগ্গলৱগ্গো

নসেৱিতব্বাদিসুত্তানি

১৯৯. ‘‘দসহি, ভিক্খৱে, ধম্মেহি সমন্নাগতো পুগ্গলো ন সেৱিতব্বো. কতমেহি দসহি? পাণাতিপাতী হোতি, অদিন্নাদাযী হোতি, কামেসুমিচ্ছাচাৰী হোতি, মুসাৱাদী হোতি, পিসুণৱাচো হোতি, ফৰুসৱাচো হোতি, সম্ফপ্পলাপী হোতি, অভিজ্ঝালু হোতি, ব্যাপন্নচিত্তো হোতি, মিচ্ছাদিট্ঠিকো হোতি – ইমেহি খো, ভিক্খৱে, দসহি ধম্মেহি সমন্নাগতো পুগ্গলো ন সেৱিতব্বো.

‘‘দসহি, ভিক্খৱে, ধম্মেহি সমন্নাগতো পুগ্গলো সেৱিতব্বো. কতমেহি দসহি? পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, পিসুণায ৱাচায পটিৱিৰতো হোতি, ফৰুসায ৱাচায পটিৱিৰতো হোতি, সম্ফপ্পলাপা পটিৱিৰতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠিকো হোতি – ইমেহি খো, ভিক্খৱে, দসহি ধম্মেহি সমন্নাগতো পুগ্গলো সেৱিতব্বো’’.

২০০-২০৯. ‘‘দসহি, ভিক্খৱে, ধম্মেহি সমন্নাগতো পুগ্গলো ন ভজিতব্বো…পে… ভজিতব্বো… ন পযিৰুপাসিতব্বো… পযিৰুপাসিতব্বো… ন পুজ্জো হোতি… পুজ্জো হোতি… ন পাসংসো হোতি… পাসংসো হোতি… অগাৰৱো হোতি… গাৰৱো হোতি… অপ্পতিস্সো হোতি… সপ্পতিস্সো হোতি… ন আৰাধকো হোতি… আৰাধকো হোতি… ন ৱিসুজ্ঝতি… ৱিসুজ্ঝতি… মানং নাধিভোতি [নাভিভোতি (সী.) অ. নি. ১০.১৫৬-১৬৬] … মানং অধিভোতি… পঞ্ঞায ন ৱড্ঢতি… পঞ্ঞায ৱড্ঢতি…পে….

২১০. ‘‘দসহি, ভিক্খৱে, ধম্মেহি সমন্নাগতো পুগ্গলো বহুং অপুঞ্ঞং পসৱতি… বহুং পুঞ্ঞং পসৱতি. কতমেহি দসহি? পাণাতিপাতা পটিৱিৰতো হোতি, অদিন্নাদানা পটিৱিৰতো হোতি, কামেসুমিচ্ছাচাৰা পটিৱিৰতো হোতি, মুসাৱাদা পটিৱিৰতো হোতি, পিসুণায ৱাচায পটিৱিৰতো হোতি, ফৰুসায ৱাচায পটিৱিৰতো হোতি, সম্ফপ্পলাপা পটিৱিৰতো হোতি, অনভিজ্ঝালু হোতি, অব্যাপন্নচিত্তো হোতি, সম্মাদিট্ঠিকো হোতি – ইমেহি খো, ভিক্খৱে, দসহি ধম্মেহি সমন্নাগতো পুগ্গলো বহুং পুঞ্ঞং পসৱতী’’তি.

অপৰপুগ্গলৱগ্গো পঞ্চমো.