(১৮) ৩. সাধুৱগ্গো

১. সাধুসুত্তং

১৭৮. [অ. নি. ১০.১৩৪] ‘‘সাধুঞ্চ ৱো, ভিক্খৱে, দেসেস্সামি অসাধুঞ্চ. তং সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘কতমঞ্চ, ভিক্খৱে, অসাধু? পাণাতিপাতো, অদিন্নাদানং, কামেসুমিচ্ছাচাৰো, মুসাৱাদো, পিসুণা ৱাচা, ফৰুসা ৱাচা, সম্ফপ্পলাপো, অভিজ্ঝা, ব্যাপাদো, মিচ্ছাদিট্ঠি – ইদং ৱুচ্চতি, ভিক্খৱে, অসাধু.

‘‘কতমঞ্চ, ভিক্খৱে, সাধু? পাণাতিপাতা ৱেৰমণী, অদিন্নাদানা ৱেৰমণী, কামেসুমিচ্ছাচাৰা ৱেৰমণী, মুসাৱাদা ৱেৰমণী, পিসুণায ৱাচায ৱেৰমণী, ফৰুসায ৱাচায ৱেৰমণী, সম্ফপ্পলাপা ৱেৰমণী, অনভিজ্ঝা, অব্যাপাদো, সম্মাদিট্ঠি – ইদং ৱুচ্চতি, ভিক্খৱে, সাধূ’’তি. পঠমং.

২. অৰিযধম্মসুত্তং

১৭৯. ‘‘অৰিযধম্মঞ্চ ৱো, ভিক্খৱে, দেসেস্সামি অনৰিযধম্মঞ্চ. তং সুণাথ…পে… কতমো চ, ভিক্খৱে, অনৰিযো ধম্মো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, অনৰিযো ধম্মো.

‘‘কতমো চ, ভিক্খৱে, অৰিযো ধম্মো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, অৰিযো ধম্মো’’তি. দুতিযং.

৩. কুসলসুত্তং

১৮০. ‘‘কুসলঞ্চ ৱো, ভিক্খৱে, দেসেস্সামি অকুসলঞ্চ. তং সুণাথ…পে… কতমঞ্চ, ভিক্খৱে, অকুসলং? পাণাতিপাতো…পে… মিচ্ছাদিট্ঠি – ইদং ৱুচ্চতি, ভিক্খৱে, অকুসলং.

‘‘কতমঞ্চ, ভিক্খৱে, কুসলং? পাণাতিপাতা ৱেৰমণী…পে… সম্মাদিট্ঠি – ইদং ৱুচ্চতি, ভিক্খৱে, কুসল’’ন্তি. ততিযং.

৪. অত্থসুত্তং

১৮১. ‘‘অত্থঞ্চ ৱো, ভিক্খৱে, দেসেস্সামি অনত্থঞ্চ. তং সুণাথ…পে… কতমো চ, ভিক্খৱে, অনত্থো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, অনত্থো.

‘‘কতমো চ, ভিক্খৱে, অত্থো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, অত্থো’’তি. চতুত্থং.

৫. ধম্মসুত্তং

১৮২. ‘‘ধম্মঞ্চ ৱো, ভিক্খৱে, দেসেস্সামি অধম্মঞ্চ. তং সুণাথ…পে… কতমো চ, ভিক্খৱে, অধম্মো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, অধম্মো.

‘‘কতমো চ, ভিক্খৱে, ধম্মো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, ধম্মো’’তি. পঞ্চমং.

৬. আসৱসুত্তং

১৮৩. ‘‘সাসৱঞ্চ ৱো, ভিক্খৱে, ধম্মং দেসেস্সামি অনাসৱঞ্চ. তং সুণাথ…পে… কতমো চ, ভিক্খৱে, সাসৱো ধম্মো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, সাসৱো ধম্মো.

‘‘কতমো চ, ভিক্খৱে, অনাসৱো ধম্মো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, অনাসৱো ধম্মো’’তি. ছট্ঠং.

৭. ৱজ্জসুত্তং

১৮৪. ‘‘সাৱজ্জঞ্চ ৱো, ভিক্খৱে, ধম্মং দেসেস্সামি অনৱজ্জঞ্চ. তং সুণাথ…পে… কতমো চ, ভিক্খৱে, সাৱজ্জো ধম্মো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, সাৱজ্জো ধম্মো.

‘‘কতমো চ, ভিক্খৱে, অনৱজ্জো ধম্মো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, অনৱজ্জো ধম্মো’’তি. সত্তমং.

৮. তপনীযসুত্তং

১৮৫. ‘‘তপনীযঞ্চ ৱো, ভিক্খৱে, ধম্মং দেসেস্সামি অতপনীযঞ্চ. তং সুণাথ…পে… কতমো চ, ভিক্খৱে, তপনীযো ধম্মো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, তপনীযো ধম্মো.

‘‘কতমো চ, ভিক্খৱে, অতপনীযো ধম্মো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, অতপনীযো ধম্মো’’তি. অট্ঠমং.

৯. আচযগামিসুত্তং

১৮৬. ‘‘আচযগামিঞ্চ ৱো, ভিক্খৱে, ধম্মং দেসেস্সামি অপচযগামিঞ্চ. তং সুণাথ…পে… কতমো চ, ভিক্খৱে, আচযগামী ধম্মো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, আচযগামী ধম্মো.

‘‘কতমো চ, ভিক্খৱে, অপচযগামী ধম্মো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, অপচযগামী ধম্মো’’তি. নৱমং.

১০. দুক্খুদ্ৰযসুত্তং

১৮৭. ‘‘দুক্খুদ্ৰযঞ্চ ৱো, ভিক্খৱে, ধম্মং দেসেস্সামি সুখুদ্ৰযঞ্চ. তং সুণাথ…পে… কতমো চ, ভিক্খৱে, দুক্খুদ্ৰযো ধম্মো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, দুক্খুদ্ৰযো ধম্মো.

‘‘কতমো চ, ভিক্খৱে, সুখুদ্ৰযো ধম্মো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, সুখুদ্ৰযো ধম্মো’’তি. দসমং.

১১. ৱিপাকসুত্তং

১৮৮. ‘‘দুক্খৱিপাকঞ্চ ৱো, ভিক্খৱে, ধম্মং দেসেস্সামি সুখৱিপাকঞ্চ. তং সুণাথ…পে… কতমো চ, ভিক্খৱে, দুক্খৱিপাকো ধম্মো? পাণাতিপাতো…পে… মিচ্ছাদিট্ঠি – অযং ৱুচ্চতি, ভিক্খৱে, দুক্খৱিপাকো ধম্মো.

‘‘কতমো চ, ভিক্খৱে, সুখৱিপাকো ধম্মো? পাণাতিপাতা ৱেৰমণী…পে… সম্মাদিট্ঠি – অযং ৱুচ্চতি, ভিক্খৱে, সুখৱিপাকো ধম্মো’’তি. একাদসমং.

সাধুৱগ্গো ততিযো.