৭. ততিযঅধম্মসুত্তং

১৭৩. ‘‘অধম্মো চ, ভিক্খৱে, ৱেদিতব্বো ধম্মো চ; অনত্থো চ ৱেদিতব্বো অত্থো চ. অধম্মঞ্চ ৱিদিত্ৱা ধম্মঞ্চ, অনত্থঞ্চ ৱিদিত্ৱা অত্থঞ্চ যথা ধম্মো যথা অত্থো তথা পটিপজ্জিতব্বং.

‘‘কতমো চ, ভিক্খৱে, অধম্মো, কতমো চ ধম্মো; কতমো চ অনত্থো, কতমো চ অত্থো? পাণাতিপাতো, ভিক্খৱে, অধম্মো; পাণাতিপাতা ৱেৰমণী ধম্মো; যে চ পাণাতিপাতপচ্চযা অনেকে পাপকা অকুসলা ধম্মা সম্ভৱন্তি, অযং অনত্থো; পাণাতিপাতা ৱেৰমণিপচ্চযা চ অনেকে কুসলা ধম্মা ভাৱনাপাৰিপূৰিং গচ্ছন্তি, অযং অত্থো.

‘‘অদিন্নাদানং, ভিক্খৱে, অধম্মো; অদিন্নাদানা ৱেৰমণী ধম্মো… কামেসুমিচ্ছাচাৰো, ভিক্খৱে, অধম্মো; কামেসুমিচ্ছাচাৰা ৱেৰমণী ধম্মো… মুসাৱাদো, ভিক্খৱে, অধম্মো; মুসাৱাদা ৱেৰমণী ধম্মো… পিসুণা ৱাচা, ভিক্খৱে, অধম্মো; পিসুণায ৱাচায ৱেৰমণী ধম্মো… ফৰুসা ৱাচা, ভিক্খৱে, অধম্মো; ফৰুসায ৱাচায ৱেৰমণী ধম্মো… সম্ফপ্পলাপো, ভিক্খৱে, অধম্মো; সম্ফপ্পলাপা ৱেৰমণী ধম্মো… অভিজ্ঝা, ভিক্খৱে, অধম্মো; অনভিজ্ঝা ধম্মো… ব্যাপাদো, ভিক্খৱে, অধম্মো; অব্যাপাদো ধম্মো….

‘‘মিচ্ছাদিট্ঠি, ভিক্খৱে, অধম্মো; সম্মাদিট্ঠি ধম্মো; যে চ মিচ্ছাদিট্ঠিপচ্চযা অনেকে পাপকা অকুসলা ধম্মা সম্ভৱন্তি, অযং অনত্থো; সম্মাদিট্ঠিপচ্চযা চ অনেকে কুসলা ধম্মা ভাৱনাপাৰিপূৰিং গচ্ছন্তি, অযং অত্থো.

‘‘‘অধম্মো চ, ভিক্খৱে, ৱেদিতব্বো ধম্মো চ; অনত্থো চ ৱেদিতব্বো অত্থো চ. অধম্মঞ্চ ৱিদিত্ৱা ধম্মঞ্চ, অনত্থঞ্চ ৱিদিত্ৱা অত্থঞ্চ যথা ধম্মো যথা অত্থো তথা পটিপজ্জিতব্ব’ন্তি, ইতি যং তং ৱুত্তং, ইদমেতং পটিচ্চ ৱুত্ত’’ন্তি. সত্তমং.