৫. পঠমঅধম্মসুত্তং

১৭১. [অ. নি. ১০.১১৩] ‘‘অধম্মো চ, ভিক্খৱে, ৱেদিতব্বো অনত্থো চ; ধম্মো চ ৱেদিতব্বো অত্থো চ. অধম্মঞ্চ ৱিদিত্ৱা অনত্থঞ্চ, ধম্মঞ্চ ৱিদিত্ৱা অত্থঞ্চ যথা ধম্মো যথা অত্থো তথা পটিপজ্জিতব্বং.

‘‘কতমো চ, ভিক্খৱে, অধম্মো চ অনত্থো চ? পাণাতিপাতো, অদিন্নাদানং, কামেসুমিচ্ছাচাৰো, মুসাৱাদো, পিসুণা ৱাচা, ফৰুসা ৱাচা, সম্ফপ্পলাপো, অভিজ্ঝা, ব্যাপাদো, মিচ্ছাদিট্ঠি – অযং ৱুচ্চতি, ভিক্খৱে, অধম্মো চ অনত্থো চ.

‘‘কতমো চ, ভিক্খৱে, ধম্মো চ অত্থো চ? পাণাতিপাতা ৱেৰমণী, অদিন্নাদানা ৱেৰমণী, কামেসুমিচ্ছাচাৰা ৱেৰমণী, মুসাৱাদা ৱেৰমণী, পিসুণায ৱাচায ৱেৰমণী, ফৰুসায ৱাচায ৱেৰমণী, সম্ফপ্পলাপা ৱেৰমণী, অনভিজ্ঝা, অব্যাপাদো, সম্মাদিট্ঠি – অযং ৱুচ্চতি, ভিক্খৱে, ধম্মো চ অত্থো চ.

‘‘‘অধম্মো চ, ভিক্খৱে, ৱেদিতব্বো অনত্থো চ; ধম্মো চ ৱেদিতব্বো অত্থো চ. অধম্মঞ্চ ৱিদিত্ৱা অনত্থঞ্চ, ধম্মঞ্চ ৱিদিত্ৱা অত্থঞ্চ যথা ধম্মো যথা অত্থো তথা পটিপজ্জিতব্ব’ন্তি, ইতি যং তং ৱুত্তং, ইদমেতং পটিচ্চ ৱুত্ত’’ন্তি. পঞ্চমং.