২. অৰিযপচ্চোৰোহণীসুত্তং

১৬৮. ‘‘অৰিযং ৱো, ভিক্খৱে, পচ্চোৰোহণিং দেসেস্সামি. তং সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘কতমা চ, ভিক্খৱে, অৰিযা পচ্চোৰোহণী? ইধ, ভিক্খৱে, অৰিযসাৱকো ইতি পটিসঞ্চিক্খতি – ‘পাণাতিপাতস্স খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চা’তি. সো ইতি পটিসঙ্খায পাণাতিপাতং পজহতি; পাণাতিপাতা পচ্চোৰোহতি.

… ‘অদিন্নাদানস্স খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চা’তি. সো ইতি পটিসঙ্খায অদিন্নাদানং পজহতি; অদিন্নাদানা পচ্চোৰোহতি.

… ‘কামেসুমিচ্ছাচাৰস্স খো পাপকো ৱিপাকো…পে… কামেসুমিচ্ছাচাৰা পচ্চোৰোহতি.

… ‘মুসাৱাদস্স খো পাপকো ৱিপাকো…পে… মুসাৱাদা পচ্চোৰোহতি.

… ‘পিসুণায ৱাচায খো পাপকো ৱিপাকো…পে… পিসুণায ৱাচায পচ্চোৰোহতি.

… ‘ফৰুসায ৱাচায খো পাপকো ৱিপাকো…পে… ফৰুসায ৱাচায পচ্চোৰোহতি.

… ‘সম্ফপ্পলাপস্স খো পাপকো ৱিপাকো…পে… সম্ফপ্পলাপা পচ্চোৰোহতি.

… ‘অভিজ্ঝায খো পাপকো ৱিপাকো…পে… অভিজ্ঝায পচ্চোৰোহতি.

… ‘ব্যাপাদস্স খো পাপকো ৱিপাকো…পে… ব্যাপাদা পচ্চোৰোহতি.

‘‘কতমা চ, ভিক্খৱে, অৰিযা পচ্চোৰোহণী? ইধ, ভিক্খৱে, অৰিযসাৱকো ইতি পটিসঞ্চিক্খতি – ‘মিচ্ছাদিট্ঠিযা খো পাপকো ৱিপাকো দিট্ঠে চেৱ ধম্মে অভিসম্পৰাযঞ্চা’তি. সো ইতি পটিসঙ্খায মিচ্ছাদিট্ঠিং পজহতি; মিচ্ছাদিট্ঠিযা পচ্চোৰোহতি. অযং ৱুচ্চতি, ভিক্খৱে, অৰিযা পচ্চোৰোহণী’’তি. দুতিযং.