৩. সঙ্গাৰৱসুত্তং

১৬৯. [অ. নি. ১০.১১৭] অথ খো সঙ্গাৰৱো ব্ৰাহ্মণো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো সঙ্গাৰৱো ব্ৰাহ্মণো ভগৱন্তং এতদৱোচ –

‘‘কিং নু খো, ভো গোতম, ওৰিমং তীৰং, কিং পাৰিমং তীৰ’’ন্তি? ‘‘পাণাতিপাতো খো, ব্ৰাহ্মণ, ওৰিমং তীৰং, পাণাতিপাতা ৱেৰমণী পাৰিমং তীৰং. অদিন্নাদানং খো, ব্ৰাহ্মণ, ওৰিমং তীৰং, অদিন্নাদানা ৱেৰমণী পাৰিমং তীৰং. কামেসুমিচ্ছাচাৰো ওৰিমং তীৰং, কামেসুমিচ্ছাচাৰা ৱেৰমণী পাৰিমং তীৰং. মুসাৱাদো ওৰিমং তীৰং, মুসাৱাদা ৱেৰমণী পাৰিমং তীৰং. পিসুণা ৱাচা ওৰিমং তীৰং, পিসুণায ৱাচায ৱেৰমণী পাৰিমং তীৰং. ফৰুসা ৱাচা ওৰিমং তীৰং, ফৰুসায ৱাচায ৱেৰমণী পাৰিমং তীৰং. সম্ফপ্পলাপো ওৰিমং তীৰং, সম্ফপ্পলাপা ৱেৰমণী পাৰিমং তীৰং. অভিজ্ঝা ওৰিমং তীৰং, অনভিজ্ঝা পাৰিমং তীৰং. ব্যাপাদো ওৰিমং তীৰং, অব্যাপাদো পাৰিমং তীৰং. মিচ্ছাদিট্ঠি ওৰিমং তীৰং, সম্মাদিট্ঠি পাৰিমং তীৰং. ইদং খো, ব্ৰাহ্মণ, ওৰিমং তীৰং, ইদং পাৰিমং তীৰন্তি.

‘‘অপ্পকা তে মনুস্সেসু, যে জনা পাৰগামিনো;

অথাযং ইতৰা পজা, তীৰমেৱানুধাৱতি.

‘‘যে চ খো সম্মদক্খাতে, ধম্মে ধম্মানুৱত্তিনো;

তে জনা পাৰমেস্সন্তি, মচ্চুধেয্যং সুদুত্তৰং.

‘‘কণ্হং ধম্মং ৱিপ্পহায, সুক্কং ভাৱেথ পণ্ডিতো;

ওকা অনোকমাগম্ম, ৱিৱেকে যত্থ দূৰমং.

‘‘তত্ৰাভিৰতিমিচ্ছেয্য, হিত্ৱা কামে অকিঞ্চনো;

পৰিযোদপেয্য অত্তানং, চিত্তক্লেসেহি পণ্ডিতো.

‘‘যেসং সম্বোধিযঙ্গেসু, সম্মা চিত্তং সুভাৱিতং;

আদানপটিনিস্সগ্গে, অনুপাদায যে ৰতা;

খীণাসৱা জুতিমন্তো, তে লোকে পৰিনিব্বুতা’’তি. ততিযং;