১. ব্ৰাহ্মণপচ্চোৰোহণীসুত্তং

১৬৭. তেন খো পন সমযেন জাণুস্সোণি ব্ৰাহ্মণো তদহুপোসথে সীসংন্হাতো নৱং খোমযুগং নিৱত্থো অল্লকুসমুট্ঠিং আদায ভগৱতো অৱিদূৰে একমন্তং ঠিতো হোতি.

অদ্দসা খো ভগৱা জাণুস্সোণিং ব্ৰাহ্মণং তদহুপোসথে সীসংন্হাতং নৱং খোমযুগং নিৱত্থং অল্লকুসমুট্ঠিং আদায একমন্তং ঠিতং. দিস্ৱান জাণুস্সোণিং ব্ৰাহ্মণং এতদৱোচ – ‘‘কিং নু ত্ৱং, ব্ৰাহ্মণ, তদহুপোসথে সীসংন্হাতো নৱং খোমযুগং নিৱত্থো অল্লকুসমুট্ঠিং আদায একমন্তং ঠিতো? কিং ন্ৱজ্জ ব্ৰাহ্মণকুলস্সা’’তি? ‘‘পচ্চোৰোহণী, ভো গোতম, অজ্জ ব্ৰাহ্মণকুলস্সা’’তি.

‘‘যথা কথং পন, ব্ৰাহ্মণ, ব্ৰাহ্মণানং পচ্চোৰোহণী হোতী’’তি? ‘‘ইধ, ভো গোতম, ব্ৰাহ্মণা তদহুপোসথে সীসংন্হাতা নৱং খোমযুগং নিৱত্থা অল্লেন গোমযেন পথৱিং ওপুঞ্জিত্ৱা হৰিতেহি কুসেহি পত্থৰিত্ৱা অন্তৰা চ ৱেলং অন্তৰা চ অগ্যাগাৰং সেয্যং কপ্পেন্তি. তে তং ৰত্তিং তিক্খত্তুং পচ্চুট্ঠায পঞ্জলিকা অগ্গিং নমস্সন্তি – ‘পচ্চোৰোহাম ভৱন্তং, পচ্চোৰোহাম ভৱন্ত’ন্তি. বহুকেন চ সপ্পিতেলনৱনীতেন অগ্গিং সন্তপ্পেন্তি. তস্সা চ ৰত্তিযা অচ্চযেন পণীতেন খাদনীযেন ভোজনীযেন ব্ৰাহ্মণে সন্তপ্পেন্তি. এৱং, ভো গোতম, ব্ৰাহ্মণানং পচ্চোৰোহণী হোতী’’তি.

‘‘অঞ্ঞথা খো, ব্ৰাহ্মণ, ব্ৰাহ্মণানং পচ্চোৰোহণী হোতি, অঞ্ঞথা চ পন অৰিযস্স ৱিনযে পচ্চোৰোহণী হোতী’’তি. ‘‘যথা কথং পন, ভো গোতম, অৰিযস্স ৱিনযে পচ্চোৰোহণী হোতি? সাধু মে ভৱং গোতমো তথা ধম্মং দেসেতু যথা অৰিযস্স ৱিনযে পচ্চোৰোহণী হোতী’’তি.

‘‘তেন হি, ব্ৰাহ্মণ, সুণাহি, সাধুকং মনসি কৰোহি; ভাসিস্সামী’’তি. ‘‘এৱং, ভো’’তি খো জাণুস্সোণি ব্ৰাহ্মণো ভগৱতো পচ্চস্সোসি. ভগৱা এতদৱোচ –

‘‘ইধ, ব্ৰাহ্মণ, অৰিযসাৱকো ইতি পটিসঞ্চিক্খতি – ‘পাণাতিপাতস্স খো পাপকো ৱিপাকো দিট্ঠে চেৱ ধম্মে অভিসম্পৰাযঞ্চা’ তি. সো ইতি পটিসঙ্খায পাণাতিপাতং পজহতি; পাণাতিপাতা পচ্চোৰোহতি.

…অদিন্নাদানস্স খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চাতি. সো ইতি পটিসঙ্খায অদিন্নাদানং পজহতি; অদিন্নাদানা পচ্চোৰোহতি.

…কামেসুমিচ্ছাচাৰস্স খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চাতি. সো ইতি পটিসঙ্খায কামেসুমিচ্ছাচাৰং পজহতি; কামেসুমিচ্ছাচাৰা পচ্চোৰোহতি.

…মুসাৱাদস্স খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চাতি. সো ইতি পটিসঙ্খায মুসাৱাদং পজহতি; মুসাৱাদা পচ্চোৰোহতি.

…পিসুণায ৱাচায খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চাতি. সো ইতি পটিসঙ্খায পিসুণং ৱাচং পজহতি; পিসুণায ৱাচায পচ্চোৰোহতি.

…ফৰুসায ৱাচায খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চাতি. সো ইতি পটিসঙ্খায ফৰুসং ৱাচং পজহতি; ফৰুসায ৱাচায পচ্চোৰোহতি.

…সম্ফপ্পলাপস্স খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চাতি. সো ইতি পটিসঙ্খায সম্ফপ্পলাপং পজহতি; সম্ফপ্পলাপা পচ্চোৰোহতি.

…অভিজ্ঝায খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চাতি. সো ইতি পটিসঙ্খায অভিজ্ঝং পজহতি; অভিজ্ঝায পচ্চোৰোহতি.

…ব্যাপাদস্স খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চাতি. সো ইতি পটিসঙ্খায ব্যাপাদং পজহতি; ব্যাপাদা পচ্চোৰোহতি.

…মিচ্ছাদিট্ঠিযা খো পাপকো ৱিপাকো – দিট্ঠে চেৱ ধম্মে অভিসম্পৰাযঞ্চা’তি. সো ইতি পটিসঙ্খায মিচ্ছাদিট্ঠিং পজহতি; মিচ্ছাদিট্ঠিযা পচ্চোৰোহতি. এৱং খো, ব্ৰাহ্মণ, অৰিযস্স ৱিনযে পচ্চোৰোহণী হোতী’’তি.

‘‘অঞ্ঞথা খো, ভো গোতম, ব্ৰাহ্মণানং পচ্চোৰোহণী হোতি, অঞ্ঞথা চ পন অৰিযস্স ৱিনযে পচ্চোৰোহণী হোতি. ইমিস্সা, ভো গোতম, অৰিযস্স ৱিনযে পচ্চোৰোহণিযা ব্ৰাহ্মণানং পচ্চোৰোহণী কলং নাগ্ঘতি সোড়সিং. অভিক্কন্তং, ভো গোতম…পে… উপাসকং মং ভৱং গোতমো ধাৰেতু অজ্জতগ্গে পাণুপেতং সৰণং গত’’ন্তি. পঠমং.