৮. তিকিচ্ছকসুত্তং

১০৮. ‘‘তিকিচ্ছকা, ভিক্খৱে, ৱিৰেচনং দেন্তি পিত্তসমুট্ঠানানম্পি আবাধানং পটিঘাতায, সেম্হসমুট্ঠানানম্পি আবাধানং পটিঘাতায, ৱাতসমুট্ঠানানম্পি আবাধানং পটিঘাতায. অত্থেতং, ভিক্খৱে, ৱিৰেচনং; ‘নেতং নত্থী’তি ৱদামি. তঞ্চ খো এতং, ভিক্খৱে, ৱিৰেচনং সম্পজ্জতিপি ৱিপজ্জতিপি.

‘‘অহঞ্চ খো, ভিক্খৱে, অৰিযং ৱিৰেচনং দেসেস্সামি, যং ৱিৰেচনং সম্পজ্জতিযেৱ নো ৱিপজ্জতি, যং ৱিৰেচনং আগম্ম জাতিধম্মা সত্তা জাতিযা পৰিমুচ্চন্তি, জৰাধম্মা সত্তা জৰায পৰিমুচ্চন্তি, মৰণধম্মা সত্তা মৰণেন পৰিমুচ্চন্তি, সোকপৰিদেৱদুক্খদোমনস্সুপাযাসধম্মা সত্তা সোকপৰিদেৱদুক্খদোমনস্সুপাযাসেহি পৰিমুচ্চন্তি. তং সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘কতমঞ্চ তং, ভিক্খৱে, অৰিযং ৱিৰেচনং, যং ৱিৰেচনং সম্পজ্জতিযেৱ নো ৱিপজ্জতি, যং ৱিৰেচনং আগম্ম জাতিধম্মা সত্তা জাতিযা পৰিমুচ্চন্তি, জৰাধম্মা সত্তা জৰায পৰিমুচ্চন্তি, মৰণধম্মা সত্তা মৰণেন পৰিমুচ্চন্তি, সোকপৰিদেৱদুক্খদোমনস্সুপাযাসধম্মা সত্তা সোকপৰিদেৱদুক্খদোমনস্সুপাযাসেহি পৰিমুচ্চন্তি?

‘‘সম্মাদিট্ঠিকস্স, ভিক্খৱে, মিচ্ছাদিট্ঠি ৱিৰিত্তা হোতি; যে চ মিচ্ছাদিট্ঠিপচ্চযা অনেকে পাপকা অকুসলা ধম্মা সম্ভৱন্তি তে চস্স ৱিৰিত্তা হোন্তি; সম্মাদিট্ঠিপচ্চযা চ অনেকে কুসলা ধম্মা ভাৱনাপাৰিপূৰিং গচ্ছন্তি.

‘‘সম্মাসঙ্কপ্পস্স, ভিক্খৱে, মিচ্ছাসঙ্কপ্পো ৱিৰিত্তো হোতি…পে… সম্মাৱাচস্স, ভিক্খৱে, মিচ্ছাৱাচা ৱিৰিত্তা হোতি… সম্মাকম্মন্তস্স, ভিক্খৱে, মিচ্ছাকম্মন্তো ৱিৰিত্তো হোতি… সম্মাআজীৱস্স, ভিক্খৱে, মিচ্ছাআজীৱো ৱিৰিত্তো হোতি… সম্মাৱাযামস্স, ভিক্খৱে, মিচ্ছাৱাযামো ৱিৰিত্তো হোতি… সম্মাসতিস্স, ভিক্খৱে, মিচ্ছাসতি ৱিৰিত্তা হোতি… সম্মাসমাধিস্স, ভিক্খৱে, মিচ্ছাসমাধি ৱিৰিত্তো হোতি… সম্মাঞাণিস্স, ভিক্খৱে, মিচ্ছাঞাণং ৱিৰিত্তং হোতি…পে….

‘‘সম্মাৱিমুত্তিস্স, ভিক্খৱে, মিচ্ছাৱিমুত্তি ৱিৰিত্তা হোতি; যে চ মিচ্ছাৱিমুত্তিপচ্চযা অনেকে পাপকা অকুসলা ধম্মা সম্ভৱন্তি তে চস্স ৱিৰিত্তা হোন্তি; সম্মাৱিমুত্তিপচ্চযা চ অনেকে কুসলা ধম্মা ভাৱনাপাৰিপূৰিং গচ্ছন্তি. ইদং খো তং, ভিক্খৱে, অৰিযং ৱিৰেচনং যং ৱিৰেচনং সম্পজ্জতিযেৱ নো ৱিপজ্জতি, যং ৱিৰেচনং আগম্ম জাতিধম্মা সত্তা জাতিযা পৰিমুচ্চন্তি…পে… সোকপৰিদেৱদুক্খদোমনস্সুপাযাসেহি পৰিমুচ্চন্তী’’তি. অট্ঠমং.