৯. পঠমআনন্দসুত্তং

৩৯. অথ খো আযস্মা আনন্দো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা আনন্দো ভগৱন্তং এতদৱোচ – ‘‘‘সঙ্ঘভেদো সঙ্ঘভেদো’তি, ভন্তে, ৱুচ্চতি. কিত্তাৱতা নু খো, ভন্তে, সঙ্ঘো ভিন্নো হোতী’’তি? ‘‘ইধানন্দ, ভিক্খূ অধম্মং ধম্মোতি দীপেন্তি, ধম্মং অধম্মোতি দীপেন্তি, অৱিনযং ৱিনযোতি দীপেন্তি…পে… পঞ্ঞত্তং তথাগতেন অপঞ্ঞত্তং তথাগতেনাতি দীপেন্তি. তে ইমেহি দসহি ৱত্থূহি অৱকস্সন্তি অপকস্সন্তি আৱেনি কম্মানি কৰোন্তি আৱেনি পাতিমোক্খং উদ্দিসন্তি. এত্তাৱতা খো, আনন্দ, সঙ্ঘো ভিন্নো হোতী’’তি.

‘‘সমগ্গং পন, ভন্তে, সঙ্ঘং ভিন্দিত্ৱা কিং সো পসৱতী’’তি? ‘‘কপ্পট্ঠিকং, আনন্দ, কিব্বিসং পসৱতী’’তি. ‘‘কিং পন, ভন্তে, কপ্পট্ঠিকং কিব্বিস’’ন্তি? ‘‘কপ্পং, আনন্দ, নিৰযম্হি পচ্চতীতি –

‘‘আপাযিকো নেৰযিকো, কপ্পট্ঠো সঙ্ঘভেদকো;

ৱগ্গৰতো অধম্মট্ঠো, যোগক্খেমা পধংসতি;

সঙ্ঘং সমগ্গং ভিন্দিত্ৱা [ভেত্ৱান (সী. স্যা.), ভিত্ৱান (ক.) চূড়ৱ. ৩৫৪; ইতিৱু. ১৮; কথাৱ. ৬৫৭] কপ্পং নিৰযম্হি পচ্চতী’’তি. নৱমং;