৬. সামণেৰসুত্তং

৩৬. ‘‘কতিহি নু খো, ভন্তে, ধম্মেহি সমন্নাগতেন ভিক্খুনা সামণেৰো উপট্ঠাপেতব্বো’’তি? ‘‘দসহি খো, উপালি, ধম্মেহি সমন্নাগতেন ভিক্খুনা সামণেৰো উপট্ঠাপেতব্বো. কতমেহি দসহি? ইধুপালি, ভিক্খু সীলৱা হোতি…পে… সমাদায সিক্খতি সিক্খাপদেসু; বহুস্সুতো হোতি…পে… দিট্ঠিযা সুপ্পটিৱিদ্ধা; পাতিমোক্খং খো পনস্স ৱিত্থাৰেন স্ৱাগতং হোতি সুৱিভত্তং সুপ্পৱত্তং সুৱিনিচ্ছিতং সুত্তসো অনুব্যঞ্জনসো; পটিবলো হোতি গিলানং উপট্ঠাতুং ৱা উপট্ঠাপেতুং ৱা; পটিবলো হোতি অনভিৰতিং ৱূপকাসেতুং ৱা ৱূপকাসাপেতুং ৱা; পটিবলো হোতি উপ্পন্নং কুক্কুচ্চং ধম্মতো ৱিনোদেতুং; পটিবলো হোতি উপ্পন্নং দিট্ঠিগতং ধম্মতো ৱিৱেচেতুং; পটিবলো হোতি অধিসীলে সমাদপেতুং; পটিবলো হোতি অধিচিত্তে সমাদপেতুং; পটিবলো হোতি অধিপঞ্ঞায সমাদপেতুং. ইমেহি খো, উপালি, দসহি ধম্মেহি সমন্নাগতেন ভিক্খুনা সামণেৰো উপট্ঠাপেতব্বো’’তি. ছট্ঠং.