৭. ৱীৰিযাৰম্ভাদিৱগ্গো

৬১. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, ৱীৰিযাৰম্ভো [ৱিৰিযাৰম্ভো (সী. স্যা. কং. পী.)]. আৰদ্ধৱীৰিযস্স, ভিক্খৱে, অনুপ্পন্না চেৱ কুসলা ধম্মা উপ্পজ্জন্তি উপ্পন্না চ অকুসলা ধম্মা পৰিহাযন্তী’’তি. পঠমং.

৬২. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, মহিচ্ছতা. মহিচ্ছস্স, ভিক্খৱে, অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ কুসলা ধম্মা পৰিহাযন্তী’’তি. দুতিযং.

৬৩. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, অপ্পিচ্ছতা. অপ্পিচ্ছস্স, ভিক্খৱে, অনুপ্পন্না চেৱ কুসলা ধম্মা উপ্পজ্জন্তি উপ্পন্না চ অকুসলা ধম্মা পৰিহাযন্তী’’তি. ততিযং.

৬৪. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, অসন্তুট্ঠিতা. অসন্তুট্ঠস্স, ভিক্খৱে, অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ কুসলা ধম্মা পৰিহাযন্তী’’তি. চতুত্থং.

৬৫. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, সন্তুট্ঠিতা. সন্তুট্ঠস্স, ভিক্খৱে, অনুপ্পন্না চেৱ কুসলা ধম্মা উপ্পজ্জন্তি উপ্পন্না চ অকুসলা ধম্মা পৰিহাযন্তী’’তি. পঞ্চমং.

৬৬. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, অযোনিসোমনসিকাৰো. অযোনিসো, ভিক্খৱে, মনসি কৰোতো অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ কুসলা ধম্মা পৰিহাযন্তী’’তি. ছট্ঠং.

৬৭. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, যোনিসোমনসিকাৰো. যোনিসো, ভিক্খৱে, মনসি কৰোতো অনুপ্পন্না চেৱ কুসলা ধম্মা উপ্পজ্জন্তি উপ্পন্না চ অকুসলা ধম্মা পৰিহাযন্তী’’তি. সত্তমং.

৬৮. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, অসম্পজঞ্ঞং. অসম্পজানস্স, ভিক্খৱে, অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ কুসলা ধম্মা পৰিহাযন্তী’’তি. অট্ঠমং.

৬৯. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, সম্পজঞ্ঞং. সম্পজানস্স, ভিক্খৱে, অনুপ্পন্না চেৱ কুসলা ধম্মা উপ্পজ্জন্তি উপ্পন্না চ অকুসলা ধম্মা পৰিহাযন্তী’’তি. নৱমং.

৭০. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, পাপমিত্ততা. পাপমিত্তস্স, ভিক্খৱে, অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ কুসলা ধম্মা পৰিহাযন্তী’’তি. দসমং.

ৱীৰিযাৰম্ভাদিৱগ্গো সত্তমো.