৮. কল্যাণমিত্তাদিৱগ্গো

৭১. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, কল্যাণমিত্ততা. কল্যাণমিত্তস্স, ভিক্খৱে, অনুপ্পন্না চেৱ কুসলা ধম্মা উপ্পজ্জন্তি উপ্পন্না চ অকুসলা ধম্মা পৰিহাযন্তী’’তি. পঠমং.

৭২. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, অনুযোগো অকুসলানং ধম্মানং, অননুযোগো কুসলানং ধম্মানং. অনুযোগা, ভিক্খৱে, অকুসলানং ধম্মানং, অননুযোগা কুসলানং ধম্মানং অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ কুসলা ধম্মা পৰিহাযন্তী’’তি. দুতিযং.

৭৩. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, অনুযোগো কুসলানং ধম্মানং, অননুযোগো অকুসলানং ধম্মানং. অনুযোগা, ভিক্খৱে, কুসলানং ধম্মানং, অননুযোগা অকুসলানং ধম্মানং অনুপ্পন্না চেৱ কুসলা ধম্মা উপ্পজ্জন্তি উপ্পন্না চ অকুসলা ধম্মা পৰিহাযন্তী’’তি. ততিযং.

৭৪. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা বোজ্ঝঙ্গা নুপ্পজ্জন্তি উপ্পন্না ৱা বোজ্ঝঙ্গা ন ভাৱনাপাৰিপূৰিং গচ্ছন্তি যথযিদং, ভিক্খৱে, অযোনিসোমনসিকাৰো. অযোনিসো, ভিক্খৱে, মনসি কৰোতো অনুপ্পন্না চেৱ বোজ্ঝঙ্গা নুপ্পজ্জন্তি উপ্পন্না চ বোজ্ঝঙ্গা ন ভাৱনাপাৰিপূৰিং গচ্ছন্তী’’তি. চতুত্থং.

৭৫. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা বোজ্ঝঙ্গা উপ্পজ্জন্তি উপ্পন্না ৱা বোজ্ঝঙ্গা ভাৱনাপাৰিপূৰিং গচ্ছন্তি যথযিদং, ভিক্খৱে, যোনিসোমনসিকাৰো. যোনিসো, ভিক্খৱে, মনসি কৰোতো অনুপ্পন্না চেৱ বোজ্ঝঙ্গা উপ্পজ্জন্তি উপ্পন্না চ বোজ্ঝঙ্গা ভাৱনাপাৰিপূৰিং গচ্ছন্তী’’তি. পঞ্চমং.

৭৬. ‘‘অপ্পমত্তিকা এসা, ভিক্খৱে, পৰিহানি যদিদং ঞাতিপৰিহানি. এতং পতিকিট্ঠং, ভিক্খৱে, পৰিহানীনং যদিদং পঞ্ঞাপৰিহানী’’তি. ছট্ঠং.

৭৭. ‘‘অপ্পমত্তিকা এসা, ভিক্খৱে, ৱুদ্ধি যদিদং ঞাতিৱুদ্ধি. এতদগ্গং, ভিক্খৱে, ৱুদ্ধীনং যদিদং পঞ্ঞাৱুদ্ধি. তস্মাতিহ, ভিক্খৱে, এৱং সিক্খিতব্বং – ‘পঞ্ঞাৱুদ্ধিযা ৱদ্ধিস্সামা’তি. এৱঞ্হি ৱো, ভিক্খৱে, সিক্খিতব্ব’’ন্তি. সত্তমং.

৭৮. ‘‘অপ্পমত্তিকা এসা, ভিক্খৱে, পৰিহানি যদিদং ভোগপৰিহানি. এতং পতিকিট্ঠং, ভিক্খৱে, পৰিহানীনং যদিদং পঞ্ঞাপৰিহানী’’তি. অট্ঠমং.

৭৯. ‘‘অপ্পমত্তিকা এসা, ভিক্খৱে, ৱুদ্ধি যদিদং ভোগৱুদ্ধি. এতদগ্গং, ভিক্খৱে, ৱুদ্ধীনং যদিদং পঞ্ঞাৱুদ্ধি. তস্মাতিহ, ভিক্খৱে, এৱং সিক্খিতব্বং – ‘পঞ্ঞাৱুদ্ধিযা ৱদ্ধিস্সামা’তি. এৱঞ্হি ৱো, ভিক্খৱে, সিক্খিতব্ব’’ন্তি. নৱমং.

৮০. ‘‘অপ্পমত্তিকা এসা, ভিক্খৱে, পৰিহানি যদিদং যসোপৰিহানি. এতং পতিকিট্ঠং, ভিক্খৱে, পৰিহানীনং যদিদং পঞ্ঞাপৰিহানী’’তি. দসমং.

কল্যাণমিত্তাদিৱগ্গো অট্ঠমো.