৬. অচ্ছৰাসঙ্ঘাতৱগ্গো

৫১. ‘‘পভস্সৰমিদং, ভিক্খৱে, চিত্তং. তঞ্চ খো আগন্তুকেহি উপক্কিলেসেহি উপক্কিলিট্ঠং. তং অস্সুতৱা পুথুজ্জনো যথাভূতং নপ্পজানাতি. তস্মা ‘অস্সুতৱতো পুথুজ্জনস্স চিত্তভাৱনা নত্থী’তি ৱদামী’’তি. পঠমং.

৫২. ‘‘পভস্সৰমিদং, ভিক্খৱে, চিত্তং. তঞ্চ খো আগন্তুকেহি উপক্কিলেসেহি ৱিপ্পমুত্তং. তং সুতৱা অৰিযসাৱকো যথাভূতং পজানাতি. তস্মা ‘সুতৱতো অৰিযসাৱকস্স চিত্তভাৱনা অত্থী’তি ৱদামী’’তি. দুতিযং.

৫৩. ‘‘অচ্ছৰাসঙ্ঘাতমত্তম্পি চে, ভিক্খৱে, ভিক্খু মেত্তাচিত্তং [মেত্তং চিত্তং (সী.), মেত্তচিত্তং (স্যা. কং. পী. ক.)] আসেৱতি; অযং ৱুচ্চতি, ভিক্খৱে – ‘ভিক্খু অৰিত্তজ্ঝানো ৱিহৰতি সত্থুসাসনকৰো ওৱাদপতিকৰো, অমোঘং ৰট্ঠপিণ্ডং ভুঞ্জতি’. কো পন ৱাদো যে নং বহুলীকৰোন্তী’’তি! ততিযং.

৫৪. ‘‘অচ্ছৰাসঙ্ঘাতমত্তম্পি চে, ভিক্খৱে, ভিক্খু মেত্তাচিত্তং ভাৱেতি; অযং ৱুচ্চতি, ভিক্খৱে – ‘ভিক্খু অৰিত্তজ্ঝানো ৱিহৰতি সত্থুসাসনকৰো ওৱাদপতিকৰো, অমোঘং ৰট্ঠপিণ্ডং ভুঞ্জতি’. কো পন ৱাদো যে নং বহুলীকৰোন্তী’’তি! চতুত্থং.

৫৫. ‘‘অচ্ছৰাসঙ্ঘাতমত্তম্পি চে, ভিক্খৱে, ভিক্খু মেত্তাচিত্তং মনসি কৰোতি; অযং ৱুচ্চতি, ভিক্খৱে – ‘ভিক্খু অৰিত্তজ্ঝানো ৱিহৰতি সত্থুসাসনকৰো ওৱাদপতিকৰো অমোঘং ৰট্ঠপিণ্ডং ভুঞ্জতি’. কো পন ৱাদো যে নং বহুলীকৰোন্তী’’তি! পঞ্চমং.

৫৬. ‘‘যে কেচি, ভিক্খৱে, ধম্মা অকুসলা অকুসলভাগিযা অকুসলপক্খিকা, সব্বে তে মনোপুব্বঙ্গমা. মনো তেসং ধম্মানং পঠমং উপ্পজ্জতি, অন্ৱদেৱ অকুসলা ধম্মা’’তি. ছট্ঠং.

৫৭. ‘‘যে কেচি, ভিক্খৱে, ধম্মা কুসলা কুসলভাগিযা কুসলপক্খিকা, সব্বে তে মনোপুব্বঙ্গমা. মনো তেসং ধম্মানং পঠমং উপ্পজ্জতি, অন্ৱদেৱ কুসলা ধম্মা’’তি. সত্তমং.

৫৮. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, পমাদো. পমত্তস্স, ভিক্খৱে, অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ কুসলা ধম্মা পৰিহাযন্তী’’তি. অট্ঠমং.

৫৯. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা কুসলা ধম্মা উপ্পজ্জন্তি উপ্পন্না ৱা অকুসলা ধম্মা পৰিহাযন্তি যথযিদং, ভিক্খৱে, অপ্পমাদো. অপ্পমত্তস্স, ভিক্খৱে, অনুপ্পন্না চেৱ কুসলা ধম্মা উপ্পজ্জন্তি উপ্পন্না চ অকুসলা ধম্মা পৰিহাযন্তী’’তি. নৱমং.

৬০. ‘‘নাহং, ভিক্খৱে, অঞ্ঞং একধম্মম্পি সমনুপস্সামি যেন অনুপ্পন্না ৱা অকুসলা ধম্মা উপ্পজ্জন্তি উপ্পন্না ৱা কুসলা ধম্মা পৰিহাযন্তি যথযিদং, ভিক্খৱে, কোসজ্জং. কুসীতস্স, ভিক্খৱে, অনুপ্পন্না চেৱ অকুসলা ধম্মা উপ্পজ্জন্তি উপ্পন্না চ কুসলা ধম্মা পৰিহাযন্তী’’তি. দসমং.

অচ্ছৰাসঙ্ঘাতৱগ্গো ছট্ঠো.