২০. অমতৱগ্গো

৬০০. ‘‘অমতং তে, ভিক্খৱে, ন পৰিভুঞ্জন্তি যে কাযগতাসতিং ন পৰিভুঞ্জন্তি. অমতং তে, ভিক্খৱে, পৰিভুঞ্জন্তি যে কাযগতাসতিং পৰিভুঞ্জন্তী’’তি.

৬০১. ‘‘অমতং তেসং, ভিক্খৱে, অপৰিভুত্তং যেসং কাযগতাসতি অপৰিভুত্তা. অমতং তেসং, ভিক্খৱে, পৰিভুত্তং যেসং কাযগতাসতি পৰিভুত্তা’’তি.

৬০২. ‘‘অমতং তেসং, ভিক্খৱে, পৰিহীনং যেসং কাযগতাসতি পৰিহীনা. অমতং তেসং, ভিক্খৱে, অপৰিহীনং যেসং কাযগতাসতি অপৰিহীনা’’তি.

৬০৩. ‘‘অমতং তেসং, ভিক্খৱে, ৱিৰদ্ধং যেসং কাযগতাসতি ৱিৰদ্ধা. অমতং তেসং, ভিক্খৱে, আৰদ্ধং [অৱিৰদ্ধং (ক.)] যেসং কাযগতাসতি আৰদ্ধা’’তি.

৬০৪. ‘‘অমতং তে, ভিক্খৱে, পমাদিংসু যে কাযগতাসতিং পমাদিংসু. অমতং তে, ভিক্খৱে, ন পমাদিংসু যে কাযগতাসতিং ন পমাদিংসু’’.

৬০৫. ‘‘অমতং তেসং, ভিক্খৱে, পমুট্ঠং যেসং কাযগতাসতি পমুট্ঠা. অমতং তেসং, ভিক্খৱে, অপ্পমুট্ঠং যেসং কাযগতাসতি অপ্পমুট্ঠা’’তি.

৬০৬. ‘‘অমতং তেসং, ভিক্খৱে, অনাসেৱিতং যেসং কাযগতাসতি অনাসেৱিতা. অমতং তেসং, ভিক্খৱে, আসেৱিতং যেসং কাযগতাসতি আসেৱিতা’’তি.

৬০৭. ‘‘অমতং তেসং, ভিক্খৱে, অভাৱিতং যেসং কাযগতাসতি অভাৱিতা. অমতং তেসং, ভিক্খৱে, ভাৱিতং যেসং কাযগতাসতি ভাৱিতা’’তি.

৬০৮. ‘‘অমতং তেসং, ভিক্খৱে, অবহুলীকতং যেসং কাযগতাসতি অবহুলীকতা. অমতং তেসং, ভিক্খৱে, বহুলীকতং যেসং কাযগতাসতি বহুলীকতা’’তি.

৬০৯. ‘‘অমতং তেসং, ভিক্খৱে, অনভিঞ্ঞাতং যেসং কাযগতাসতি অনভিঞ্ঞাতা. অমতং তেসং, ভিক্খৱে, অভিঞ্ঞাতং যেসং কাযগতাসতি অভিঞ্ঞাতা’’তি.

৬১০. ‘‘অমতং তেসং, ভিক্খৱে, অপৰিঞ্ঞাতং যেসং কাযগতাসতি অপৰিঞ্ঞাতা. অমতং তেসং, ভিক্খৱে, পৰিঞ্ঞাতং যেসং কাযগতাসতি পৰিঞ্ঞাতা’’তি.

৬১১. ‘‘অমতং তেসং, ভিক্খৱে, অসচ্ছিকতং যেসং কাযগতাসতি অসচ্ছিকতা. অমতং তেসং, ভিক্খৱে, সচ্ছিকতং যেসং কাযগতাসতি সচ্ছিকতা’’তি. (….) [(এককনিপাতস্স সুত্তসহস্সং সমত্তং.) (সী. স্যা. কং. পী.)]

(ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.) [( ) এত্থন্তৰে পাঠো সী. স্যা. কং. পী. পোত্থকেসু নত্থি]

অমতৱগ্গো ৱীসতিমো.